یوحنا موکاشیفَه 3 - کتاب مقدس به زبان تالشی شمالی

مسیح پیغوم، ساردِسی کلیسا را

¹ «ساردِسی کلیسا ملائیکه را بینیویس: «اَ که خِدا هفت گِله روح و هفت گِله ستاره هِستِشَه، اِنتَه بَواتی: اِشتِه کارون کا خَوَرداریمَه. اِمی واسی سَرشِناسیش که زِندَه ایش، امّا مَردَه ایش.

² پِرِز و اَچیی که باقی مَندَه و کارا بَمَردی، تقویت بِکَه! چوم که از اِشتِه کارون چِمِن خِدا وَری کا کامل نِویندِمَه.

³ بَس ویر بوعَه، اَ چیی که ویگِتَرَه و دَرَسَرَه. اَیی غَم بَه و توبه بِکَه. اَگم مَپِرِزی، ایلَه دِزدی شیوار بومَیم و تِه نیمَزنیش که چِه ساعتی کا اِشتِه ضِد بومَیم.

⁴ «با اِم حال حَلا، ساردِسی کا بعضیون هِستِرَه که اِشتَن خَلااوون چِرکین کَردَه نیشونَه و اَوِن ایسبی یَه خَلااون نَه، مِنَه قدم ژَنِن، چوم که لایِقی نَه.

⁵ هَر کسی که پیروز بِبو، اِنتَه رَه ایسبی یَه خَلا دَکَرِه و از چَیی نومی هرگز دفتر حیاتی کا پاک آنِکَرَم، و چِمِن دَده و چَیی ملائیکه اون وَری کا چَیی نومی بَواتیم.

⁶ اَ کسی که گوش هِستِشَه دَرَسِه که خِدا روح کلیسا اون نَه چِه بَواتی.

مسیح پَیغوم، فیلادِلفیَه کلیسا را

⁷ «فیلادِلفیَه کلیسا ملائیکه را بینیویس: «اَ که قدّوسَه، اَ که حَقَّ، اَ که داوودی اَچَری هِستِشَه، اَ که آکَرِه و هیچکس نیمَشا دَوِندِه، و اَ که دَوِندِه و هیچکس نیمَشا آکَرِه، اِنتَه بَواتی:

⁸ از اِشتِه کارون کا خَوَرداریمَه. دَیِس، ایلَه آواجَه بَری اِشتِه ناری کا نوعَمَه که هیچ‌کس نیمَشا اَیی دَوِندِه. بَزنیم که اِشتِه قُوّت کَمَه، امّا چِمِن کلامی غَم هَردِرَه و چِمِن نومی حاشا نِکَردِرَه.

⁹ دَیِس، از کسونی که شیطونی عبادتگاه کا اینَه و اِشتَن یهودی بَزنین ولی نینَه، بَلکَم دوع بَواتین، دَیِس از اَوون وادار بَکَردیم بان و اِشتِه پا جیری کا دَلَکِن تا بِزونِن که از تِنَه خِشیمَه.

¹⁰ حِسَه که تِه چِمِن کلامی که مقاومتی دربارَه یَه، غَم هَردِرَه، از نی تِه اَ آزمایشی ساعتی کا غَم بَردیم، اَ ساعتی که تمون دنیا سَر بومَی تا زمینی مردمی، آزمایش بِکَرِه.

¹¹ «هِم زودیون بومَیم. اَ چیی که هِستِرَه، مُحکم غَم بَه تا کسی اِشتِه تاجی بَه تِه کا مَویگِرِه.

¹² هَر کسی که پیروز بِبو، چِمِن خِدا معبدی کا اَیی ایلَه ستونی بَکَردیم، و دِ هرگز آوا نَه نِشو. و از چِمِن خِدا نومی و چِمِن خِدا شهری نومی چَیی سَری کا بَنویشتیم یعنی تازَه اورشلیم که چِمِن خِدا طرفی کا آسِمونی کا بومَی، و چِمِن تازَه نومی نی چَیی سَری کا بَنویشتیم.

¹³ اَ کسی که گوش هِستِشَه دَرَسِه که خِدا روح کلیسا اون نَه چِه بَواتی.

مسیح پَیغوم، لائودیکیه کلیسا را

¹⁴ «لائودیکیه کلیسا ملائیکه را بینیویس: «اَ که آمین اِستَه، اَ که وفادارَه و حقیقی یَه شاهِدَه، اَ که خِدا خِلقتی سَرچِشمَه یَه، اِنتَه بَواتی:

¹⁵ اِشتِه کارون کا خَوَرداریمَه؛ که نِه سَردیش و نِه گرم. کَشکی یا سَرد بِبیش یا گرم.

¹⁶ بَس چوم وِلَرمیش نِه گرم و نِه سرد، ایلَه چافی شیوار چِمِن گ کا تِه بِرون فِرآدَم.

¹⁷ چوم بَواتیش: دولتمندیمَه، مال و مَنال هِستِمَه و هچیی مُحتاج نیمَه.“ ولی نیمَزنیش که بدبخت، ذلیل، نَدار و کور و لُخت و سُختیش.

¹⁸ تِه نصیحت بَکَردیم خالِصَه طِلایی که آتشی کا دَوییَردَه بَه مِن کا بِخِری تا دولتمند بِبی؛ و ایسبی خَلا اون، تا دَکَری و اِشتِه لُخت و سُختی شرم‌ ویندَه مَبو و مَرهم، که اِشتِه چمون کا دَسونی تا بِوینی.

¹⁹ «از کسونی نَه که خِشیمَه توبیخ و تربیت بَکَردیم. بَس غیرتی بِبَش و توبه بِکَه.

²⁰ دَیِس، از بَری پِشتی کا مَندیمَه و کارا بَر ژَنِم. اَگم کسی چِمِن سَسی دَرَسِه و بَری چِمن دیمی کا آکَرِه، بومَیم دیلَه و اَیی نَه سور بَردیم و اَ نی مِنَه.

²¹ «هَر‌ کسی که پیروز بِبو، اِمی آدَم اَئی که مِنَه تختی سَری کا بِنِشِه، هَتَه که از نی پیروز بیمَه و چِمن دَده نَه تختی سَری کا نِشتیمَه.

²² اَ کسی که گوش هِستِشَه دَرَسِه که خِدا روح کلیسا اون نَه چِه بَواتی.»