یوحنا موکاشیفَه 22 - کتاب مقدس به زبان تالشی شمالیزندگی بَخشَ رِواری آو 1 دومله، اَ ملائیکه زندگی بخشَ رِواری آوی بَه مِن نیشون دوشَه که بُلوری شیوار زُلال بَه و خِدا تخت و وَرَه کا ویبی. 2 و شهری مَیدونی وسطی نَه دَوییَری. رِواری دِ طرفی کا زندگی بَخشَ دار بَه که دونزَه مُدل میوه بَدای، یعنی هَر مانگ ایی مُدل. و چَیی لیوِن میلّتون را شفا بَه. 3 و دِ هیچ لَعنتی اوآکا نییَه. بَلکَم خِدا تخت و وَرَه تخت اَیی کا بَمَندی و چَیی خادِمِن اَئی پرستش بَکَردین. 4 اَوِن چَیی دیمی بَویندین و چَیی نوم چَوون تَقالی کا بَبی. 5 و دِ شوی نییَه و اَوِن چِرا یا آفتاوی نوری اِحتیاجی نیشونه، چوم خِداوندْخِدا چَوون نور بَبی. و اَوِن تا اَبَد و تا اَبَد سلطنت بَکَردین. عیسی بومَی 6 ملائیکه مِنَه واتِشه: «اِم گَفِن راستی نَه و بَبی اَوون اِعتماد کَردِه. خِداوند، پیغمبرون روحون خِدا، اِشتَن ملائیکه ویسا آکَردِشَه تا اَ چیی که بَسی هِم زودیون اِتفاق دَلَکِه، اِشتَن خادِمون نیشون بِدَه.» 7 «و دَیِس، از هِم زودیون بومَیم! خَسَه بِبو اَ کسی که اِم کتابی نبوّتی کلامی غَم بَرِه.» 8 از، یوحنا، هَ کسی اِستیمَه که اِم چیون ویندِمَه و دَرَسِمَه. از، چَوون ویندِه و دَرَسِه پَش، اَ ملائیکه پااون پیشی کا که اَوون بَه مِن نیشون دوعَش بَه، بَلَکیمَه تا اَیی پرستش بِکَرِم. 9 امّا ملائیکه مِنَه واتِشه: «اَتَه مَکَه! از نی اِشتِه شیوار و اِشتِه بِرا اون شیوار، یعنی پیغمبرون، و کسونی که اِم کتابی کلامی انجام بَداین، همخِدمتیمَه. خِدا پرستِش بِکَه.» 10 اَ مِنه واتِشه: «اِم کتابی نبوّتی کلامی مُهر و موم مَکَه چوم اَ وخت نِزدیکَه. 11 بِدا بَدَه آدَم، اِشتَن بَدی کَردِه اِدامه بِدَه و فاسِدَه آدَم، هِنتَه اِشتَن فَسادی اِدامه بِدَه؛ صالِحَ آدَم اَ چیی که دُرُستَه اِدامه بِدَه و مقدّسَ آدَم، هَتَه مقدّس بومونِه.» 12 «دَیِس، از هِم زودیون بومَیم و چِمِن اَ پاداشی که بَسی آدَم، اِشتَن نَه بواَردیم تا هَر کسی طبق اَ کاری که کَردَشَه عوض آدَم. 13 از ’الف‘ و ’ی‘، اوّل و آخِر، شروع و پایان اِستیمَه.» 14 خَسَه بِبو اَ کسونی که اِشتَن اَبا اون شورِن تا اِم حقّی بَدارِن که زندگی بَخشَ داری کا بَرِن و بِشان بان شهری دروازه اون دیلَه. 15 اِسبَه اِن و جادوگرِن و زنا کارِن و آدَمکِشِن و بُت‌پرستِن و گِردِ کسونی که دوروع نَه خِشی نَه و اَیی انجام بَداین، شهری بِرونی کا بَمَندین. 16 «از، عیسی، چِمِن ملائیکه ویسا آکَردِمَه شِمَه وَر تا اِم چییون کلیسا اون را شهادتی بِدَه. از داوودی ریشه ایمَه و صِبی ستارۀ ایمَه که دَتاوِه.» 17 خِدا روح و وَیو بَواتین: «بِری!» هَر کسی که اِمی دَرَسِه بوآجِه: «بِری!» هَر کسی که تِشی یَه با؛ و هَر کسی که پیستِشَه زندگی بَخشَ آوی کا مِفتَه ویگِرِه. 18 از، هَر کسی که اِم کتابی نبوّتی کلامی دَرَسِه، هُشدار بَدایم که اَگم کسی چیی بَیی اِضافه آکَرِه، خِدا، اِم بَلااونی که اِم کیتابی کا نیویشته بییَه چَیی سَر بواَردی. 19 و اَگم کسی اِم کیتابی نبوّتی کلامی کا چیی کم آکَرِه، خِدا اَئی زندگی بَخشَ داری کا و مقدّسَ شهری کا، که اِم کتابی دیلَه کا نیویشتَه بییَه، بی‌نصیب بَکَردی. 20 اَ کسی که اِم چییون را شهادتی بَدای، اِنتَه بَواتی: «حَتمن، هِم زودیون بومَیم.» آمین. بِری، اِی خِداوندْ عیسی! 21 خداوندْ عیسی فیض شِمَه گِردی نَه بِبو.آمین. |
@ 2024 Korpu Company