یوحنا موکاشیفَه 21 - کتاب مقدس به زبان تالشی شمالی

تازه آسمون و تازه زمین

¹ دومله ایلَه تازه آسمون و ایلَه تازه زمینی ویندِمَه، چوم اوّلین آسمون و اوّلین زمین از بِین شَه بینَه و دِ دریایی نوعَه نِبَه.

² و مقدّسَ شهر، یعنی تازه اورشلیمی ویندِمَه که آسمونی کا خِدا وَری نَه بومَی جیر، ایلَه وَیویی شیوار که اِشتَن، اِشتَن شو را بَزَک کَردَشَه، حاضیر آبَه.

³ و تختی کا، ایلَه بِلندَه سَسی دَرَسِمَه که واتِشه: «دَیِس، خِدا مَنزِل آدَمون هَمراه یَه. و اَ، اَوون نَه بَمَندی، و اَوِون چَیی قوم بَبین، و خِدا اِشتَن اَوون نَه بَبی و چَوون خِدا بَبی.

⁴ اَ هَر اِسِرگی چَوون چِمون کا پاک آکَرِه. و دِ مرگ نییَه؛ و دِ هیچ شیون و هیچ داد و هیچ داجی نییَه، چوم که اوّلین چییِن از بِین شَه اینَه.»

⁵ و اَ تخت‌نشین واتِشه: «دَیِس، از گِردِ چییون تازه آکَرِم.» و هَنی واتِشه: «اِمی بینیویس چوم اِم گَفِن راستی نَه و بَبی اَیی اِعتماد کَردِه.»

⁶ و اَ مِنَه واتِشه: «انجام بَه! از ’الف‘ و ’ی‘ و اوّل و آخِریمَه. هَر کسی که تِشیش بِبو، از زندگی خانی آوی کا مِفتَه آدَم بَیی.

⁷ هَر کسی که پیروز بِبو اِمی بِه ارث بَبَردی، و از چَیی خِدا بَبیم و اَ چِمِن زوعَه بَبی.

⁸ ولی تَرسو اِن و بی ایمانِن و فاسِدِن و آدَمکِشِن و زِنا کارِن و جادوگرِن و بُت‌پرستِن و گِردِ دروعَه واجِن، چَوون گِردی سهم، دریاچه ای بَبی که گوگِرد و آتشی نَه وَش گِتَشه. اِم دوّمین مَرگَه.»

تازَه اورشلیم

⁹ دومله ایلَه اَ هفت گِله ملائیکه کا که هفت گِله قَدَرَه پُر هفت گِله بَلا کا داری، اومَه و مِنَه واتِشه: «بِری! از وَیو یعنی وَرَه ژِنی بَه تِن نیشون بَدایم.»

¹⁰ و اَ، خِدا روح کا مِن بَردِشَه ایلَه یال و بِلندَه کو سَر و اورشلیمی مقدّس شهری مِن نیشون دوشَه که آسمونی کا خِدا وَری نَه بومَی جیر.

¹¹ خِدا جلالی داری و چَیی سوسو ایلَه گِرون قیمَت و کَمیابَه گوهری شیوار بَه، یَشمی شیوار و بُلوری شیوار شفاف.

¹² ایلَه یالَ بِلندَه حصاری داری، دونزَه گِله دروازه نَه و دونزَه گِله ملائیکه چَیی دروازه اون سَری کا مَند بینَه. و اَ دروازه اون سَری کا بنی‌اسرائیلی دونزَه گِله قبیله نوم نیویشته بَه.

¹³ سِه گِله دروازه مشرقی طرف، سِه گِله دروازه شُمالی طرف، سِه گِله دروازه جنوبی طرف و سِه گِله دروازه مغربی طرفی کا بَه.

¹⁴ و شهری حصار دونزَه گِله پِی داری، که چَوون سَری کا وَرَه دونزَه گِله رسولی نوم نیویشته بَه.

¹⁵ و اَ ملائیکه که مِنَه گَف ژَنی، ایلَه طِلایی یَه چویی اندازه‌گِری را اِشتَن دَسی کا داری تا شهری و چَیی دروازه اون و چَیی حَصارون اندازه‌ بِژَنِه.

¹⁶ شهر مربع شکل بَه، و چَیی دِرازی و وِشایی بَرابر بَه. ملائیکه اَ اَندازَه گِری یَه چو نَه اَ شهری اَندازَه گِتِشَه که دو هَزار و چارصد کیلومتر بَه. چَیی دارزی و وِشایی و بِلندی ایی اَندازَه بَه.

¹⁷ اَ ملائیکه حَصاری اَندازَه گِتِشَه، و آدَمی قیاسی نَه اَ حَصار شَصت و پینج متر بَه، که ملائیکه قیاس نی هِم بَه.

¹⁸ شهری حصار یَشمی کا وَج آبَه بَه، و شهر خالِصَ طلا کا شیشه شیوار شفاف بَه.

¹⁹ شهری حَصاری پِی هَمه مدل جواهری نَه بَزَک بییَه بَه. اوّلین پِی یَشمی کا بَه، دوّمین پی لاجِوَردی یَه یاقوتی کا، سوّمین پِی ایسبی یَه عَقیقی کا، و چارمین پِی زُمرّدی کا،

²⁰ پینجَمین پِی سِرَه عَقیقی کا، شیشمین پِی آتشی نَه عَقیقی کا، هفتمین پِی زِبَرجَدی کا، هشتمین پِی کَویَه یاقوتی کا، نُهمین پِی زردَه یاقوتی کا، دهمین پِی سَوزَه عَقیقی کا، یازدهمین پِی فیروزه کا و دونزَه همین پِی بَنوشَه یاقوتی کا.

²¹ و شهری دونزَه گِله دروازه، دونزَه گِله مِرواری بینَه، هَر کمیله دروازه اون کا ایلَه مِرواری کا وَج آبَه بَه. شهری خیابون خالِصَه طلا کا و شیشه شیوار شفاف بَه.

²² شهری دیلَه کا هیچ معبدی نِویندِمَه، چوم خِداوندْخِدای قادر مطلق و وَرَه، چَیی معبدی نَه.

²³ و شهر آفتاو و مانگی اِحتیاجی نیشَه که اَیی روشون آکَرِه. چوم خِدا جَلال، نور آدَه بَیی و وَرَه چَیی چِرا یَه.

²⁴ میلّتِن چَیی نوری دیلَه کا قدم ژَنِن و زمینی پاُتشا اِن، اِشتَن جاه و جَلالی بواَردین اوآ.

²⁵ اَ شهری دروازه اِن هرگز روزی کا دَوَستَه نِبون، و اوآ هرگز شَو آنییَب.

²⁶ و میلّتون جَلال و حُرمتی بواَردین اوآ.

²⁷ امّا هیچ ناپاکی و هیچ‌کسی که چَیی کارِن دوروع کا و نفرت اَنگیز بِبون، اَصلا نان چَیی دیلَه، بَلکَم فقط کسونی که چَوون نوم وَرَه دفتر حیاتی دیلَه کا نیویشته بییَه، بومَین چَیی دیلَه.