یوحنا موکاشیفَه 20 - کتاب مقدس به زبان تالشی شمالیهَزار سال سلطنت 1 دومله ویندِمَه ایلَه ملائیکه آسمونی کا بومَی جیر، و هاویَه چاه اَچَر، چَیی همرایَه، و ایلَه یالَه زنجیری اِشتَن دَسی کا هِستِشَه. 2 و ملائیکه، اِژدها، اَ قدیمی یَه نَلتی، که هَ اِبلیس یا شیطونَه، گِتِشه و تا هَزار سال اَیی دَرَفَندِشَه زندانی کا 3 و اَئی دَرَفَندِشَه هاویَه چاه دیلَه کا و چَیی بَری دَوَستِشَه و مُهرو موم کَردِشَه، تا دِ میلّتون گول مَژَنِه تا چَیی هَزار سال تَمون آبو. دومله اَ بَسی روکَتِه زمان آزاد آبو. 4 دومله تختونی ویندِمَه که چَوون سَری کا کسونی نِشت بینَه که داوری کَردِه اِقتدار اَوون آدوعَه بَه. آدَمون جانی ویندِمَه که، بِه عیسایِ مسیح شهادت دوعِه واسی و خِدا کلامی واسی چَوون سَرِن، بَدَنی کا جِدا آبَه بَه. کسونی نی ویندِمَه که اَ وحشی یَه حَیوونی و چَیی مجسمه پرستش نِکَردِشونَه و چَیی نیشونه اِشتَن تَقال یا دَسی سَری کا قبول کَردَشون نِبَه. اِمِن هَنی زِنده آبینَه و مسیح نَه هَزار سال سلطنت کَردِشونَه. 5 اِم اوّلین زِنده آبییِه مَردَه اون دیلَه کا بَه. و مَردَه اِن دِ زِنده آنِبینِه تا اَ هَزار سال تَمون آبو. 6 مقدّس و مِوارکَه اَ کسی که اوّلین زِنده آبییِه کا سهم دارِه. دوّمین مَرگ چَوون سَری کا هیچ قدرتی نیشَه بَلکَم اَوِن خِدا و مسیح کاهِنِن بَبین و اَیی نَه هَزار سال سلطنت بَکَردین. شیطونی شکست 7 هِنتَه که اَ هَزار سال تَمون آبو، شیطون اِشتَن زندانی کا آزاد آبو 8 و بومَی بِرون، تا میلّتون زمینی چهارگوشۀ کا گول بِژَنِه- یعنی جوج و مأجوج که چَوون تعداد دریا کَناری فورشی شیوارَه- تا اَوون جنگی را جمع آکَرِه. 9 و اَوِن زمینی دَشتون سَری کا ناری را شیینَه و مُقدسون اردوگاه، و اَ عَزیزگِرامی یَه شهری محاصره کَردِشونَه. امّا آسمونی کا آتش جیر اومَه و اَوون نابود کَردِشَه. 10 و اِبلیس، که اَوون گول ژَندَش بَه، آتش و گوگِردی دریاچه دیلَه کا دَرَفَنده بَه، جِگایی که اَ وَحشی یَه حَیوون و اَ دوروعی نَه پیغمبر دَرَفَندَه بینَه. اِمن شَو اَندَه روز تا اَبَد و تا اَبَد عذاب بَکَشدین. داوری یالَ ایسبی یَه تختی پیشی کا 11 دومله ایلَه یالَ ایسبی یَه تختی ویندِمَه، و ایی نفر که چَیی سَری کا نِشت بَه. آسمون و زمین چَیی حضوری کا دَوَشتینَه و چَوون را هیچ جِگایی پیدا نِبَه. 12 و مَردَه اون ویندِمَه، یالی نَه تا روک، که تختی پیشی کا مَندَه بینَه و دَفترِن آبینَه. دومله ایلَه دییَر دفتری آبَه که دفتر حیات بَه. مَردَه اِن اَ چیونی نَه که دَفترون دیلَه کا نیویشته بییَه بَه، طبق چَوون اَعمال، داوری بینَه. 13 و دریا اَ مَردَه اونی که اِشتَن دیلَه کا داری، پَس آدوشَه؛ مرگ و مَردَه اون دنیا اَ مَردَه اون که چَوون دیلَه کا بَه پَس آدوشونَه، و هَر کس طبق کارونی که انجام دوعَش بَه، داوری بَه. 14 دومله مرگ و مَردَه اون دنیا دَرَفَنده بینَه آتشی دریاچه دیلَه کا. اِم آتشی دریاچه، دوّمین مرگَه. 15 و هَر کسی که چَیی نوم دفتر حیاتی دیلَه کا نیویشته بَه نِبَه، دَرَفَنده بَه آتشی دریاچه دیلَه کا. |
@ 2024 Korpu Company