یوحنا موکاشیفَه 2 - کتاب مقدس به زبان تالشی شمالی

مسیح پیغوم اَفِسُسی کلیسا را

¹ «اَفِسُسی کلیسا ملائیکه را بینیویس: «اَ که هفت گِله ستاره اِشتَن راستَه دَسی کا هِستِشَه و هفت گِله طِلا چِراپوعَه میانَه کا قدم ژَنِه، اِنتَه بَواتی:

² اِشتِه کارون بَزنیم و اِشتِه مقاومت و عذابون کا خَوَر داریمَه و بَزنیم که نیمَشای شَرورَه آدَمون تاو بواَری بَلکَم کسونی که اِشتَن رسول بَزنین ولی نینَه، اَوون اِمتحان کردَرَه و فَهمِستَرَه دروعَه واجی نَه.

³ بَزنیم که چِمِن نومی واسی صَبری نَه تاو وَردَرَه و تحمّل کَردرَه و خسته آبَه نیشَه.

⁴ «امّا از اِم شکایتی بَه تِه کا هِستِمَه که اَ محبتی که اَوّل داریش وِل آکَردَرَه.

⁵ بَس ویر بوعَه که کییا کا بَلَکه ایشَه، توبه بِکَه و اَ کارونی که اوّل بَکَردیش اَنجام بِدَه. اَگم مَکَری، بومَیم اِشتِه وَر و اِشتِه چراپوعَه چَیی جِگا کا پِگِرِم، مَگر اِمکه توبه بِکَری.

⁶ ولی اِم ایلَه چاکی هِستِرَه که نیکولاییون دارو دَسته کارون کا بیزاریش، هَتَه که از نی بیزاریمَه.

⁷ «اَ کسی که گوش هِستِشَه دَرَسِه، که خِدا روح کلیسا اون نَه چِه بَواتی. هَر کسی که پیروز بِبو، اِمی بَبَخشِستیم بَیی تا زِندگی داری میوه کا بَرِه که خِدا بهشتی دیلَه کایَه.

مسیح پیغوم، اِسمیرنا کلیسا را

⁸ «اِسمیرنا کلیسا ملائیکه را بینیویس: «اَ که اوّلَ و اَ که آخِرَه، اَ که مَردَه و زِندَه آبَه، اِنتَه بَواتی:

⁹ اِشتِه عذاب و نَداری کا خَوَرداریمَه، ولی تِه دولتمَندیش! و اَ آدَمون اِفترا کا خَوَر دارِم. که بَواتین یهودی نَه ولی نینَه، بَلکَم شیطونی عِبادتگاه اینَه.

¹⁰ اَ عذابونی کا که هِم زودیون کَشی، مَتَرس. دَیِس، هِم زودیون اِبلیس شِمَه کا بعضیون زندانی کا دَرَفَنِه تا آزمایش بِبییَه و دَه روز عذاب بِکَشَه. تِه تا مرگ وفادار بومون،که از زِندگی تاجی آدَم بَه تِن.

¹¹ «اَ کسی که گوش هِستِشَه دَرَسِه، که خِدا روح کلیسا اون نَه چِه بَواتی. هَر کسی که پیروز بِبو، دوّمین مرگی کا چَیی سَر بَلایی نا.

مسیح پیغوم، پِرگامومی کلیسا را

¹² «پِرگامومی کلیسا ملائیکه را بینیویس: «اَ که دِ دَمَه تیجَه شمشیری هِستِشَه، اِنتَه بَواتی:

¹³ بَزنیم کییا کا ایش، اوآ که شیطانی پاُتشایی تختَه. با اِم حال مُحکم دَچیکیستَه ایش چِمِن نومی، و حتّی اَ روزونی کا که آنتیپاس، چِمِن اَ وفادارَه شاهِد که شِمَه دیلَه کا، اوآ که شیطان مَندَه، اَیی کِشتِشونَه، ایمانی که بَه مِن داری حاشا نِکَردِرَه.

¹⁴ «امّا از، روکَتِه شکایت بَه تِه کا هِستِمَه. اوآ کا کسونی هِستِرَه که بَلعامی تعلیمی دَچیکه اینَه؛ هَ که بالاقی آموتِشه که قوم اِسرائیلی پیشی کا سِنگی بِبو که بَلَکِه باعیث بِبو، تا اَ غذایی که بُتون را تقدیم بَبی بَرِن و بی‌عفتی بِکَرِن.

¹⁵ و هِنتَه نی، کسونی هِستِرَه که نیکولاییونی دارودَسته تعلیمی دَچیکِسته اینَه.

¹⁶ بَس توبه بِکَه، اَگم نِه هِم زودیون بومَیم اِشتِه وَر و چِمِن گَ شمشیری نَه چَوون ضِد جنگ بَکَردیم.

¹⁷ «اَ کسی که گوش هِستِشَه دَرَسِه که خِدا روح کلیسا اون نَه چِه بَواتی. هَر کسی که پیروز بِبو، اَ نِین آکَردَه”مَنّا“ کا آدَم بَیی و ایلَه ایسبی یَه سِنگی آدَم بَیی، که چَیی سَری کا ایلَه تازه نومی نیویشتَه بییَه که هیچکس اَیی نیمَزنِه اَ کسی غِیراز که اَیی ویگِرِه.

مسیح پِیغوم، تیاتیرا کلیسا را

¹⁸ «تیاتیرا کلیسا ملائیکه را بینیویس: خِدا زوعَه، که چَیی چِمِن آتَشی شعله شیواری نَه و چَیی پا اِن شَفق ژَنَه مَفرقی شیوار، اِنتَه بواتی:

¹⁹ از اِشتِه کارون کا، اِشتِه محبت و ایمان و خدمت و اِشتِه مقاومتی کا خَوَرداریمَه، و بَزنیم که اِشتِه آخِرین کارِن اِشتِه اوّلین کارون کا وِرتَری نَه.

²⁰ امّا بَه تِه کا اِم شکایتی هِستِمَه، اَ ژِنَکی را که چَیی نوم ایزابلَ و اِشتَن پیغمبر بَزنی، راحت گِری. اَ که چِمِن نوکرون تعلیم بَدای و اَوون راه کا بَرکَرِه تا بی‌عفتی بِکَرِن و اَ غذا اونی کا که بُتون را تقدیم بَبی، بَرِن.

²¹ اَیی مُهلت دوعَمَه تا توبَه بِکَرِه، امّا اَ نِپیستِشَه که اِشتَن بی عفتی کا توبه بِکَرِه.

²² دَیِس، از اَئی دَرَفَنِم مریضی یَه رختخوابی کا و کسونی که اَیی نَه زِنا بَکَردین بَرک یالَ مصیبتی کا دَرَفَنِم، مَگر اِمکه چَیی کارون کا توبه بِکَرِن.

²³ و چَیی خِردَنون نی هلاک بَکَردیم. اَ موقع گِردِ کلیسا اِن بَزنین که از اَ کسی ایمَه که دیلون و فیکرون گَردِم و شِمَه هَر کمیلَه را طبق شِمَه کارون، عَوض آدَم.

²⁴ امّا شِمَه الباقی تیاتیرا کا، شِمَه که اِم تعلیمی دَچیکَه نیرونَه و اَ چییونی که بعضی اِن بَواتین ”شیطونی عَمیقَ سِرّون“ آموتَه نیرونَه، شِمَه نَه بَواتیم که اِمی کا وِرتَر شِمَه دوشی سَری کا بار نِنَم.

²⁵ فقط اِمکه، اَ چیی که هِستِرونَه مُحکم دَچیکه تا از بام.

²⁶ «هَر‌ کسی که پیروز بِبو و چِمِن کارون تا آخِر اَنجام بِدَه، اَئی اِقتدار آدَم تا گِردِ میلتون سَر حکومت بِکَرِه،

²⁷ «‌و ”آهنی یَه عصا نَه چَوون سَر حُکم بَکَردی؛ و اَوون سُفالی یَه نِرَه شیوار خُورد بَکَردی،“ دُرُست هَتَه که از، چِمِن دَده کا اِقتدار ویگَتَمَه.

²⁸ و از صِبحی ستاره آدَم بَیی.

²⁹ اَ کسی که گوش هِستِشَه دَرَسِه که خِدا روح کلیسا اون نَه چِه بَواتی.