یوحنا موکاشیفَه 17 - کتاب مقدس به زبان تالشی شمالییالَ فاحیشۀ و وحشی یَه حَیوون 1 دومله ایلَه اَ هفت گِله ملائیکه کا که هفت گِله قَدرَه داری اومَه نار و مِنَه واتِشه: «بِری تا اَ یالَ فاحیشۀ داوری که وِرَه آوون سَری کا نِشتَه، تِه نیشون بِدَم. 2 اَ که زمینی پاُتشااِن اَیی نَه زِنا کَردِشونَه و کسونی که زمینی سَری کا بینَه چَیی زِنا شَراوی کا مست آبینَه.» 3 اَ ملائیکه مِن خِدا روح کا بَردِشَه ایلَه ویاوونی را. اوآ کا ایلَه ژِنی ویندِمَه که ایلَه سِرَه وحشی یَه حَیوونی کولی سَری کا نِشت بَه، اَ حَیوونی بَدَن کُفر آمیزَه نومون نَه پوشوندَه بییَه بَه، و هفت گِله سَر و دَه گِله شاخ داری. 4 اَ ژِن، سِر و اَرغوانی یَه خَلا دَکَردَش بَه که طِلا، جواهرون و مِرواریون نَه خوشگیل آبَه بَه و ایلَه طِلایی یَه قَدَرَه اِشتَن دَسی کا داری که چَیی زِنا زِشتیون و ناپاکیون کا پُور بَه. 5 چَیی تَقالی سَری کا اِم مرموزَه نوم نیویشته بییَه بَه: «یالَ بابِل، فاحیشه اون و زمینی زِشتیون نَنه.» 6 و ویندِمَه که اَ ژِن مقدّسون خونی نَه و کسونی خونی نَه که عسیی واسی شهید بَه بینَه، مَستَه. هِنتَه که اَ ژِنَکی ویندِمَه بَرک مات آبیمَه. 7 ولی ملائیکه مِنَه واتِشَه: «چیرا هِندی مات آبَه ایش؟ از اَ ژِنَکی سِرّی و اَ وحشی یَه حَیوونی سِرّی که هفت گِله سَر و دَه گِله شاخ هِستِشَه و ژِن چَیی سَری کا سِوارَه، بَه تِرا بَواتیم. 8 اَ وحشی یَه حَیوون که ویندِرَه اِستبَه، حِسَه دِ نییَه، هِم زودیون هاویَه چاه کا بِرون بومَی و بَشی هلاکتی طرفی را. و کسونی که زمینی سَری کا اینَه و چَوون نوم دنیا خَلق بییِه نَه دفتر حَیاتی دیلَه کا نیویشته بییَه نییَه، اَ وحشی یَه حَیوونی ویندِه کا مات بَبین، چوم که اَ اِستبَه، حِسَه نییَه، و بومَی. 9 «اِم، ایلَه حِکمَتی نَه عقلی پیستِشَه. اَ هفت گِله سَر، هفت گِله کو اینَه که اَ ژِن چَوون سَری کا نِشتَه. 10 که هفت گِله پاُتشا اینَه که پنج گِله اَوون کا از بِین شَینه، و ایلَه مَندَه و ایلَه اَوون کا حَلا اومَه نییَه و وختی که با، بَسی بومونِه ولی روکَتِه زمان. 11 اَ وحشی یَه حَیوون که اِستبَه و حِسَه نییَه، هشتمین پاُتشایَه. اَ نی که اَ هفت گِله شِنَه و هلاکتی طرفی را بَشی. 12 «و اَ دَه گِله شاخ که ویندِرَه، دَه گِله پاُتشااینَه که حَلا بِه سلطنت آرَستَه نینَه. امّا قَرارَه که اَوِن ایی ساعتی کا، اَ وحشی یَه حَیوونی نَه پاُتشا اون اِقتداری ویگِرِن. 13 اَوِن گِرد ایلَه فیکر هِستِشونَه و اِشتَن قدرت و اِقتداری آدَن اَ وحشی یَه حَیوونی. 14 اَوِن وَرَه نَه جنگ بَکَردین، امّا اَ وَرَه پیروز بَبی، چوم که اَ خِداوندون خِداوند و پاُتشا اون پاُتشایَه- و کسونی که اَیی نَه مَندینَه، چَیی دَعوَتی اِن، و اِنتخاب بییَه اِن و و چَیی وفادارِه نی نَه.» 15 و اَ ملائیکه مِنَه واتِشَه: «اَ آوونی که ویندِرَه، اَ جِگایی که فاحیشه نِشتَه، اَوِن هَ، قومِن، جماعتِن، میلّتِن و زَوونِن اِستینَه. 16 و اَ دَه گِله شاخ و اَ وحشی یَه حَیوون که ویندِرَه، فاحیشه کا بیزار بَبین. اَوِن اَ فاحیشَه تَنخا بَناین و اَیی لُخت و سُوخت وِل آکَرِن. چَیی جانی گوشتی بَردین و اَیی آتشی دیلَه کا سونِن. 17 چوم که خِدا چَوون دیلی دیلَه کا نوعَشه که چَیی پیستَه انجام بِدَن و همفیکر بِبون، تا اِشتَن سلطنتی قدرتی دَسپارِن اَ وحشی یَه حَیوونی دَس، تا خِدا کلام بِه انجام آرَستِه. 18 اَ ژِنی که ویندِرَه، هَ یالَ شهرَه، که زمینی پاُتشااون سَر حکومت بَکَردی.» |
@ 2024 Korpu Company