یوحنا موکاشیفَه 16 - کتاب مقدس به زبان تالشی شمالیخِدا غَضبی هفت گِله قَدَرَه 1 دومله معبدی کا ایلَه بِلندَه خِلِع دَرَسِمَه که اَ هفت گِله ملائیکه نَه بَواتی: «بِشَه و خِدا غَضبی هفت گِله قَدَرَه زمینی سَری کا ویکَرَه.» 2 بَس اوّلین ملائیکه شَه و اِشتَن قَدَرَه زمینی سَری کا ویکَردِشه، و زخمونی که زِشت و داج دار بینَه، اَ مردمی سَری کا ظاهر آبَه که اَ وحشی یَه حَیوونی نیشونَه اِشتَن کا دارین و چَیی مجسمه پرستش بَکَردین. 3 دوّمین ملائیکه اِشتَن قَدَرَه دریا کا ویکَردِشه، و دریا ایلَه مَردَه آدَمی خونی شیوار بَه، و هَر چیی که دریا دیلَه کا جان داری مَردَه. 4 سوّمین ملائیکه اِشتَن قَدَرَه رِوارون و آوَه خانیون دیلَه کا ویکَردِشه، و اَوِن خون آبینَه. 5 و دَرَسِمَه اَ ملائیکه که آوون اِختیار اَیی آدوعَه بَه، واتِشَه: «اِی قدّوس، تِه عادلیش، تِه که اِستیش و اِستبیش، چوم که اِم مُجازاتون تِه وَردِرَه. 6 چوم که اَوِن مقدّسین و پیغمبَرون خونی ویکَردِشونَه، و تِه اَوون خون آدورَه تا بِنجِن. اِم اَ چیی یَه که چَوون حَقَّ!» 7 و دَرَسِمَه که قِربونگاه بَواتی: «ها، اِی خِداوندْ خِدای قادر مطلق، اِشتِه داوری اِن حَقّ و عدلی نَه» 8 چارمین ملائیکه اِشتَن قَدَرَه آفتاوی سَری کا ویکَردِشه، و آفتاوی اِجازَه دوعَه بَه تا مردمی آتشی نَه بوسونِه. 9 مردم گرما شدّتی کا سوتینَه و خِدا نومی که اِم بَلااون قدرتی اِستِشه، لعنت کَردِشونَه. اَوِن توبه نِکَردِشونَه و اَئی جلال نِدوشونَه. 10 پنجمین ملائیکه اِشتَن قَدَرَه اَ وحشی یَه حَیوونی تختی سَری کا ویکَردِشَه و چَیی پاُتشایی مملیکتی ظُلمات گِتِشَه. آدَمِن هِندی داج دارین که، اِشتَن زَوونی گاز بَگتین. 11 و اِشتَن دَردون و زخمون واسی آسمونی خِدا لعنت بَکَردین، اَوِن اِشتَن کارون کا توبه نِکَردِشونَه. 12 شیشمین ملائیکه اِشتَن قَدَرَه اَ یالَه رِوار، فُراتی سَری کا ویکَردِشَه و چَیی آو ویسیستَه تا اَ پاُتشااونی را که مشرقی کا بومَین، راه آماده آکَرِه. 13 دومله ویندِمَه اِژدها گَ کا و اَ وحشی یَه حَیوونی گَ کا و دورعی نَه پیغمبری گَ کا سِه گِله پلیدَه روح که گوزگا شیوار بینَه بِرون اومینَه. 14 چوم که اِمن دیوون ارواح اِستینَه که علامت و معجزه اونی بواَردین و گِردِ دنیا پاُتشااون وَر بَشین تا اَوون، خِدای قادر مطلقی یالَه روزی کا جَنگی را، جمع آکَرِن. 15 «دَیِس، از ایلَه دِزدی شیوار بومَیم! خَسه بِبو اَ کسی که آگا بَمندی و خَلا دَکَردَش بِبو، مَبو که لُخت و سُوخت راه دَلَکِه و گِرد چَیی رِسوایی بِوینِن.» 16 و اَ سِه گِلَه پلیدَه روح، زمینی پاُتشااون ایی جِگا کا جَمع آکَردِشونَه، که عِبرانی زَوونی کا اَیی نَه بَواتین ’حارمَگِدّون‘. 17 هفتمین ملائیکه اِشتَن قَدَرَه هوا کا ویکَردِشَه و ایلَه بِلندَه سَسی اَ تخت و معبدی کا اومَه که بَواتی: «تَمون آبَه!» 18 و آسمونی برق و گِرخونَه پِرِشتَه، و یالَه زِلزِلَه ای اِتِفاق دَلَکَه، اِنتَه یال که چَیی شیوار اَ موقع نَه که آدَمی زمینی کا بَه، تا حِسَه اِتفاق دَلَکَه نِبَه. 19 یالَ شهر سِه پَلَه بَه و میلّتون شَهرِن ویرونَه بینَه. و خِدا اَ یالَ بابِلی ویر وَردِشَه و ایلَه شراوی قَدَرَه کا، که اِشتَنِش غَضبی آتشی کا پُور بَه، اَیی هِنتونیشَه. 20 و هَر جزیره ای دَوَشتَه و دِ هیچ کوهی نِبَه. 21 و آسمونی کا بَرک یالَ تَگرگی آدَمون سَری کا بَوارِستی که هَر کمیله، حدود پِینجاه کیلو وزن داری؛ آدَمِن تَگرگی واسی خِدا لعنت کَردِشونَه، چوم که اِم بَلا بَرک چَتین بَه. |
@ 2024 Korpu Company