یوحنا موکاشیفَه 15 - کتاب مقدس به زبان تالشی شمالی

هفت گِله ملائیکه هفت گِله بَلا نَه

¹ اَ موقع ایلَه دییَر یال و عجیبَ علامتی آسمونی کا ویندِمَه، هفت گِله ملائیکه که هفت گِله بَلا چَوون همراه بَه، اَوِن آخِرین بَلاان اینَه، چوم که اَوون نَه خِدا غَضب تمون آبو.

² و ایی چیی ویندِمَه که شیشَه ای یَه دریا شیوار بَه که آتشی نَه قاطی آبَه بَه، و هَم کسونی ویندِمَه که شیشَه ای یَه دریا وَری کا مَند بینَه و اَ وحشی یَه حَیوون و چَیی مجسمه و چَیی نومی شماره سَر پیروز بَه بینَه و خِدا چَنگَه سازِن چَوون دَسی کا بَه.

³ و اَوِن خِدا خِدمتکار موسی سرودی، و وَرَه سرودی بَخَندین و بَواتین: «اِشتِه کارِن یال و عجیبی نَه، اِی خِداوندْ خِدای قادر مطلق اِشتِه راه اِن چِندی عدل و حقّی نَه. اِی گِردِ میلّتون پاُتشا.

⁴ اِی خِداوند کییَه که بَه تِکا مَتَرسِه، و اِشتِه نومی جَلال مَدَه؟ چوم که، فقط تِه، قدّوسیش. گِردِ میلّتِن بومَین و تِه پرستش بَکَردین چوم که اِشتِه عادلانه کارِن آشکار آبَینه.»

⁵ دومله ویندِمَه که شهادتی خِیمَه مقدّس جِگا، آسمونی دیلَه کا آبَه.

⁶ و هفت گِله ملائیکه که هفت گِله بَلا دارین اَ مقدّس جِگا کا بِرون اومینَه و اَوِن ایلَه خَلا کتانَ پارچه کا که پاک بَه و سوسو ژَنی دَکَردَشون بَه و ایلَه طِلایی یَه شالی اِشتَن سینَه دُوری کا دارین.

⁷ و ایلَه اَ چار گِله مخلوق زِندَه کا، هفت گِله طِلایی یَه قَدَرَه که خِدا غَضبی کا پُور بَه، آدوشَه اَ هفت گِله ملائیکه، خِدایی که تا اَبَد و تا اَبَد زِندَه یَه.

⁸ و اَ مقدّسَ جِگا، خِدا جلال و قدرتی نَه، دو کا پُور آبَه، تا اَ وختی که اَ هفت گِله ملائیکه هفت گِله بَلا تمون آبَه نِبی، هیچکس نِشاستِشَه دَشو اَ مقدّسَ جِگا دیلَه.