یوحنا موکاشیفَه 13 - کتاب مقدس به زبان تالشی شمالی

اوّلین وحشی یَه حَیوون

¹ دومله ویندِمَه ایلَه وحشی یَه حیوونی دریا کا بِرون بومَی. دَه گِله شاخ و هفت گِله سَر داری، دَه گِله تاج چَیی شاخون سَری کا نوعَه بَه؛ و چَیی هَر سَری کا ایلَه کفرآمیزَه نوم نیویشتَه بییَه بَه.

² اَ وحشی یَه حیوونی که از ویندِمَه پَلنگی شیوار بَه، و خِرسی پااون و شیری گَ داری. و اژدها اِشتَن قدرت و اِشتَن تخت و ایلَه بَرکَ اِقتداری، آدوشَه وحشی یَه حَیوونی.

³ اَ وحشی یَه حَیوونی ایلَه سَرون کا، اِنگاری ایلَه کُشندَه زخمی پِگِتَش بَه، امُا اَ کُشندَه زخم وَج آبَه و گِردِ زمین مات آبیینه و اَ وحشی یَه حَیوونی کا پیروی کَردِشونَه.

⁴ مردم اِژدها پرستش بَکَردین، چوم اِشتَن اِقتداری آدوعَش بَه اَ وحشی یَه حَیوونی، و اَ وحشی یَه حَیوونی پرستش بَکَردین و بَواتین: «کییَه که بِشا اَ وحشی یَه حَیوونی شیوار بِبو؟ کییَه که بِشا اَیی نَه جنگ بِکَرِه؟»

⁵ اَ وحشی یَه حَیوونی ایلَه گَ آدوعَه بَه تا غرور و کُفری نَه گف بِژَنِه، و اَیی اِجازه دوعَه بَه تا اِشتَن اِقتداری چِل و دِ مانگ بِه‌کار بِبَرِه.

⁶ اَ اِشتَن گَ آکَردِشَه تا خِدا نَه کُفر بوآجِه، کُفر واتِه چَیی نومی و جِگایی که اوآکا بَمَندی، یعنی کسونی که آسمونی کا اینَه.

⁷ و حِسَه نی، اَیی اِجازه دوعَه بَه تا مقدسون نَه جنگ بِکَرِه و پیروز بِبو. و اَیی اِقتدار آدوعَه بَه تا هَر طایفه و میلّت و زَوون و قومی سَر حاکِم بِبو.

⁸ و گِردِ کسونی که زمینی سَری کا اینَه و اَ وَحشی یَه حَیوونی پرستش بَکَردین- یعنی هَر کسی که چَیی نوم، وَرَه دفتر حیاتی دیلَه کا نیویشته بَه نییَه، هَ وَرَه ایی که دنیا صِفتَه نَه قربونی بییَه بَه.

⁹ اَ کسی که گوش هِستِشَه دَرَسِه:

¹⁰ اَگم قرار بِبو کسی اَسیر بِبو، اَسیری را بَشی. اَگم قرارَه کسی شمشیری نَه کِشتَه بِبو، بَسی شمشیری نَه کِشتَه بِبو. و اِم، مقدّسون مقاومت و چَوون ایمانی پیستِشَه.

دوّمین وَحشی یَه حَیوون

¹¹ دومله ایلَه دییَر وَحشی یَه حَیوونی ویندِمَه که زمینی کا بِرون بومَی. دِ گِله شاخ داری وَرَه شاخی شیوار و اِژدها شیوار گَف ژَنی.

¹² اَ اوّلین وَحشی یَه حَیوونی تَمون اِقتداری چَیی عَوض بِه کار بَگَتی، و زمین و کسونی که زمینی سَری کا اینَه زور بَکَردی که اَ اوّلین وَحشی یَه حَیوونی که چَیی کُشندَه زخم وَج آبَه بَه، پرستش بِکَرِن.

¹³ دوّمین وَحشی یَه حَیوون یالَ علامتون و معجزه اون نمایش دوشَه، جوری که حتی مردمی چِمی پیشی کا آسمونی کا زمینی سَر آتش ویکَری.

¹⁴ و علامتون و معجزه اون واسی که اِجازه داری اَ اوّلین وَحشی یَه حَیوونی عَوض بِه کار بگِرِه، کسونی که زمینی سَری کا اینَه گول ژَندِشَه و اَوون نَه واتِشه ایلَه مجسمه اَ وَحشی حَیوونی کا وَج آکَرَه که شمشیری نَه زخمی بییَه، ولی با اِم حال زِنده مَندَه.

¹⁵ و اَیی اِجازه دوعَه بَه تا اَ وَحشی یَه حَیوونی مجسمه نَفَس آدَه تا اَ وَحشی یَه حیوونی مجسمه بِشا حتّی گف بِژَنه و باعث بِبو کسونی که اَ وَحشی یَه حَیوونی مجسمه پرستش نِکَرِن،کِشتَه بِبون.

¹⁶ هَنتَه نی، گِردِ کسون، روکی نَه تا یال، دارا و نَدار، و نوکَر و آزادی، زور کَردِشه تا اِشتَن راستَ دَس یا اِشتَن تَقالی کا نیشونه ای بِنَن.

¹⁷ تا هیچ‌کس مَشا بِخِرِه یا بِخرَشِه، اَ کسی غِیراز که اَ نیشونَه، یعنی اَ وَحشی یَه حَیوونی نومی یا چَیی نومی شمارۀ بِدارِه.

¹⁸ اِم، حکمت پیستِشَه. هَر کسی که فهم هِستِشَه، بِدا اَ وَحشی یَه حَیوونی شماره حساب بِکَرِه، چیرا که اَ شماره، اِنسانی شماره یَه و اَ شماره شیشصد و شصت و شیش اِستَه.