یوحنا موکاشیفَه 12 - کتاب مقدس به زبان تالشی شمالیژِن و اژدها 1 و ایلَه یالَه نیشونَه ای آسمونی کا آشکار آبَه: ایلَه ژِنی که آفتاوی دَکَردَش بَه و مانگ چَیی پا جیر و ایلَه تاجی دونزَه گِله ستاره نَه چَیی سَری کا نوعَه بَه. 2 اَ ژِن حامیله بَه و زَندِه داج و عذابی کا خَراخِلِع بَکَردی. 3 دومله ایلَه دییَر نیشونَه ای آسمونی کا آشکار آبَه: دَیِس، ایلَه یالَه سِرَه اژدها که هفت گِله سَر و دَه گِله شاخ داری، و چَیی سَرون کا هفت گِله تاج نوعَه بَه. 4 اِشتَن دُمی نَه آسمونی ستارَه اون یک‌سوّمی جمع آکَردِشَه و زمینی سَری کا ویکَردِشَه. اژدها اَ ژِنی ناری کا که کارا بَزَندی مَندَه، تا هِنتَه که چَیی خِردَن دنیا اومَه، اَیی ویبَره. 5 اَ ژن ایلَه زوعَه ایی دنیا وردِشَه، ایلَه زوعَه که قَرارَه آهنی یَه عصا نَه گِردِ میلّتون سَری کا حُکومت بِکَرِه. ولی چَیی خِردَن خِدا و چَیی تختی وَری کا پِگِتَه بَه. 6 و اَ ژِن دَوَشتَه ویاوونی را، اَ جِگایی که خِدا اَیی را فراهم کَردَش بَه، تا اوآ کا هَزار و دویست و شصت روز اَیی رَسیدگی بِکَرِن. شیطون فِر آدوعَه بَبی زمینی سَر 7 و آسمونی کا جنگ بَه. میکائیل و چَیی ملائیکه اِن اِژدها نَه بَجنگِستی نَه. اِژدها و چَیی ملائیکه اِن چَوون پیشی کا جَنگی را پِرِشتی نَه، 8 امّا اِژدها شکست هَردِشَه و دِ آسمونی کا چَوون را جِگایی نِبَه. 9 و یالَ اِژدها فِرآدوعَه بَه جیری را، یعنی هَ قدیمی یَه نَلتی که اِبلیس یا شیطان دَخوندَه بَبی و گِردِ دِنیا گمراه بَکَردی. اَ فِرآدوعَه بَه زمینی سَر و چَیی ملائیکه اِن نی اَیی نَه فِرآدوعَه بینَه جیر. 10 دومله ایلَه بِلندَه خِلِعی آسمونی کا دَرَسِمَه، که بَواتی: «حِسَه، چَمَه خِدا نجات و قدرت و پاُتشایی، و چَیی مسیح اِقتدار آرَستَه. چوم اَ که چَمَه بِرا اون اِفتِرا ژَنی، که شَو اَندَه روز چَمَه خِدا حضوری کا اَوون اِفتِرا ژَنِه، فِر آدوعَه بَه جیری را. 11 و اَوِن وَرَه خونی نَه و کلامی شهادتی نَه اَیی اَفجور بَیینَه. چوم که اَوِن اِشتَن جانی نَه خِش نِبینَه، حتی تا مَردِه موقع. 12 بَس اِی آسمونِن و اِی کَسونی که آسمونی دیلَه کا ایرونَه، شادی بِکَرَه! امّا وای بَر شِمَه اِی زمین، اِی دریا، چوم که اِبلیس بَدجورَه خَشمی نَه شِمَه را اومَه جیر، چوم که بَزنی وخت کَمَه.» 13 و اَ موقع که اژدها ویندِشَه که زمینی سَر فِرآدوعَه بَه جیر، شَه اَ ژِنی دومله که ایلَه زوعَه دنیا وَردَش بَه. 14 امّا اَ یالَ عقابی دِ گِله بال، آدوعَه بَه اَ ژِنَکی، تا جِگایی را پرواز بِکَرِه که ویاوونی کا چَیی را فَراهم بییَه بَه و اوآ کا، اَ نَلتی کا دور بومونِه، و ایی زَمانی و زَمانونی و نِصبَه زَمانی اَیی رَسیدگی بِبو. 15 اَ نَلَتی اِشتَن گَ کا، ایلَه آوی رِواری آوی شیوار ویکَردِشَه بِرون تا اَ ژِنَکی دومله بِشو و سیل اَئی اِشتَن نَه بِبَرِه. 16 امّا زمین اَ ژِنَکی کمکی را اومَه و اِشتَن گَ آکَردِشه و سیلی که اِژدها اِشتَن گَ کا ویکَردَش بَه بِرون، ویبَردِشَه. 17 دومله اِژدها اَ ژِنَکی را عصبانی آبَه و شَه تا چَیی نسلی اَلباقی نَه جنگ بِکَرِه، یعنی کسونی نَه که خِدا اَحکامی کا اِطاعت بَکَردین و مُحکم دَچیکِستَه اینَه عیسی شَهادت دوعِه. 18 و اِژدها دریا وَری کا منتظر مَندَه. |
@ 2024 Korpu Company