یوحنا موکاشیفَه 11 - کتاب مقدس به زبان تالشی شمالیدِ گِله شاهد 1 دومله ایلَه دِرازَه لَلَه ایی، که اَندازه‌گیری یَه چو شیوار بَه آدوشونَه بَه مِن و واتِشونَه: «پِرِز و قِربونگاه و خِدا معبدی اندازَه بِژَن و کسونی که اوآکا پرستش بَکَردین بیشمار، 2 ولی معبدی صَحنی نَه که بِرونی کایَه کاریر مَبو و اَیی اَندازَه مَگِه، چومکه اَ، دَسپَردَه بَه میلّتون و اَوِن مقدّسَ شهری چِل و دِ مانگ لَگدمال بَکَردین. 3 و از چِمِن دِ گِله شاهدی اِقتدار بَدایم که کیل دَکَرِن و هَزار و دویست و شصت روز نبوّت بِکَرِن.» 4 اِمِن، هَ دِ گِله زیتونَ داری نَه و هَ دِ گِله چِرا پوعَه ای نَه که زمینی کا خداوندی ناری کا، بَمَندین. 5 و اَگم کسی بِپی اَوون صَدَمَه بِژَنِه، چَوون گَ کا آتَش بومَی بِرون و چَوون دِشمَنون بَسوتی و خاکستر بَکَردی. بَس اَگم ایی نفر بِپی اَوون صَدَمَه بِژَنِه، بَسی اِنتَه کِشتَه بِبو. 6 اَوِن اِم قدرتی دارِن که آسمونی دَوِندِن تا اَ روزون کا که نبوّت بَکَردین وارِش مَوارِه و قوّت دارِن که آوون خونی شیوار وَج آکَرِن و هَر چِندی کَرَه که بِپین هَر مُدل بَلایی زمینی سَر بواَرِن. 7 هَتَه که اَوِن اِشتَن شهادتی تَمون آکَردِشونَه، اَ وَحشی یَه حَیوون که هاویَه چاه کا بِرون بومَی، اَوون نَه جَنگ بَکَردی و اَوون اَفجور بَبی و اَوون کِشِه. 8 و چَوون جَنازه اِن اَ یالَ شهری خیابونی کا که کینایَه نَه سُدوم و مصر واتَه بَبی زمینی سَری کا بَمَندی؛ اوآ که چَوون خِداوند، مصلوب بَه. 9 سه روز و نیمی قَدَر، بعضی آدَمِن هَر میلّت و هَر طایفه و هَر زَوون و هَر قومی کا، چَوون جِنازَه اون ویندِه را بَشین و نییَرزِن اَوون دَفن بِکَرِن. 10 کسونی که زمینی کا اینَه چَوون مَردِه کا ذوق بَکَردین و جَشن بَگتین یَندی را هدیه اون ویسا آکَرِن، چوم اَ دِ گِله پیغمبر اَ کسونی که زمینی سَری کا بینَه عذاب دوعَشون بَه. 11 امّا سه روز و نیم که دَوییَردَه، زندگی نَفَس، خِدا طرفی نَه اَ دِ گِله پیغمبری دیلَه دَشَه و اَوِن پا مَندینَه، و کسونی که کارا دَیِسین بَرکَ ترسی اَوون گِتِشَه. 12 دومله ایلَه بِلندَه خِلِع ایی آسمونی کا دَرَسِشونَه که اَوون نَه بَواتی: «بایَه اییا کَفا!» و اَوِن ایلَه خِری دیلَه کا شینَه کَفا آسمون و چَوون دِشمَنِن کارا اَوون دَیِسین. 13 و هَ ساعتی کا، ایلَه یالَ زلزله ای اومَه و شهری یک دَهم ویبَه و هفت هَزار نفر اَ زلزله کا کِشتَه بیینَه و کسونی که زِنده مَندینَه نی وِر تَرسی نَه و آسمونی خِدا جلال دوشونَه. 14 دوّمین’وای‘ دَوییَردَه. دَیِس، سوّمین ’وای‘ هِم زودیون بَسی با. هفتمین شیپور 15 دومله هفتمین ملائیکه اِشتَن شیپوری دیلَه کا فو دَکَردِشه، و بِلندَه خِلِع اونی آسمونی کا دَپیچستِشه که بَواتین: «دنیا پاُتشایی، چَمَه خِداوند و چَیی مسیح شِن بییَه. و اَ، تا اَبَد و تا اَبَد سلطنت بَکَردی.» 16 و اَ بیست و چار گِله پیر که خِداوندی حضوری کا اِشتَن تختی سَری کا نِشت بینَه، اِشتَن دیمی سَر بَلَکینَه و خِدا پرستش کَردِشونَه، 17 واتِشونَه: «اِی خداوندْ خِدای قادر مطلق، تِه شُکر بَکَردیمون، اِی تِه که اِستبیش و اِستیش. چوم که تِه اِشتِه بَرکَه قدرتی اِشتِه دَس گِتَرَه و دَمَندیش سلطنت کَردِه. 18 و میلّتِن عصبانی بینَه، ولی اِشتِه غَضَب آرَستَه، مَردَه اون داوری یَه روز آرَستَه، و اَ وخت آرَستَه که اِشتِه خِدمتکارِن، پیغمبرِن، مقدّسِن و کسونی که اِشتِه نومی حُرمتی غَم بَردین، یالی نَه تا روک، پاداش آدَی، و کسونی که زمینی نابود بَکَردین، نابود آکَری.» 19 دومله خِدا معبد، آسمونی کا آبَه؛ و خِدا عهدی صوندُق چَیی معبدی دیلَه کا آشکار آبَه؛ و ایی دَفعه آسمونی کا برق و گِرخونَه و بِلَندَه خِلِع و زلزله و تِندَه تَگرگ بَه که کارا بومَی. |
@ 2024 Korpu Company