نامَه فیلیپی کلیسا را 1 - کتاب مقدس به زبان تالشی شمالی1 پولُس و تیموتائوسی طرفی کا، که مسیحْ عیسی نوکری نَه: گِردِ مقدّسون را مسیحْ عیسی کا که فیلیپی شهری کا اینه، ناظِرِن و شَماسِن: 2 فیض و صُلح و سلامتی خِدا طرفی کا، چَمَه دَده، و خِداوند عیسایِ مسیح، شِمَه را با. دعا و شُکرکَردِه 3 هَر موقع شِمَه یاد بواَردیم، چِمِن خِدا شُکر بَکَردیم 4 هَمیشه چِمِن گِردِ دعااون کا گِردِ شِمَه را شادی نَه دعا بَکَردیم، 5 اَ همکاری واسی که مسیح اِنجیلی کاری دیلَه کا اوّلین روزی نَه تا بِه اوری هِستِرونه. 6 و از مُطمئِنیمَه اَ که شِمَه دیلَه کا چاکَه کاری شروع کَردَشه، تا مسیح عیسی آگَردِستِه روز، اَیی کامل آکَرِه. 7 از اِم حَقی هِستِمَه که شِمَه گِردی دربارَه اِم اِحساسی بِدارِم، چیرا که چِمِن دیلی دیلَه کا جِگا هِستِرونه، چوم شِمَه گِرد مِنه خِدا فیضی کا شریکی رونه، هَم چِمِن زیندان دَلَکِه کا، و هَم اِنجیلی دفاع کَردِه کا و چَیی حقیقتی ثابت کَردِه کا. 8 چوم خِدا چِمِن شاهدَه که چِنتَه اَ اِحساساتی نَه که مسیحْ عیسی کا سرچِشمَه بَگتی، شِمَه گِردی مُشتاقیمَه. 9 چِمِن دعا اِمَه که شِمَه مُحبت وِرتَر و وِرتَر آبو، دانایی و فهم کاملی نَه هَمراه بِبو، 10 تا بِشایَه اَ چیی که چاکتَرَه قبول بِکَرَه و مسیح روزی کا، پاک و بی‌عیب بِبییَه، 11 صالِحی ثَمرَه کا پور بِبییَه که عیسایِ مسیح واسطه نَه، خِدا جلال و ستایشی را ختم بَبی. اِنجیلی پیشرفت 12 اِی بِرااِن، پیستِمَه بِزونه اَ چیی که چِمِن سَر اومَه، در اَصل اِنجیلی پیشرفتی باعیث بَه، 13 جوری که کاخ سلطنتی نگهبونون گِردی را و گِردِ مردمی را عیان بَه که اَز مسیح واسی زیندانی کا ایمَه؛ 14 و چِمِن زیندان دَلَکِه باعیث بَه که خِداوندی کا وِرتَر بِرااون دیل قُرص بِبو تا جرئَتی نَه، خِدا کلامی بیدون واهیمَه بوآجِن. 15 بَعضی حسودی کا و چِم و هَم چِمی کا مَسیح موعظه بَکَردین، ولی بَعضی نی چاکَه نیّتی نَه. 16 اِم دوّمین دَسته مُحبتی کا اِنتَه بَکَردین، چوم بَزنین که از اِنجیلی کا دفاع کَردِه واسی اییاکا نوعَه بَه ایمَه. 17 امّا اَ اوّلین دَسته چِم و هَم چِمی واسی مسیح موعظه بَکَردین، نِه چاکَه نیّتی نَه، چوم خَیال بَکَردین که اِم کاری نَه زیندانی کا مِن عذاب بَداین. 18 بَس چِه؟ مهم اِمَه که هَر جوری یَه، مسیح اِعلام بِبو، چِه دُرست نیَّتی نَه، چِه نادُرستَ نیَّتی نَه! اَز اِمی واسی شادی بَکَردیم، ها، و هَنی شادی بَکَردیم، 19 چوم بَزنیم که شِمَه دعااون و عیسایِ مسیح روح کمکی نَه، اِمِن چِمِن آزادی باعث بَبین، 20 هَتَه که اِشتیاقی نَه اِنتظار بَکَشدیم و اُمید هِستِمه که هیچی کا خِجِل نِبوم، بَلکَم جرئَت کامِلی نَه، حِسَه نی هَمیشه شیوار، چِه مرگی کا و چِه زِندگی کا، مسیح چِمِن بَدنی کا جلال بَگتی. 21 چوم بَه مِرا زِندگی کَردِه مَسیحَ، و مَردهِ، بَه مِرا سود. 22 اَگم بَسی چِمِن زِندگی اِم بَدنی کا اِدامه بِدَم، اِم بَه مِرا ایلَه کاری یَه پُور ثَمَر. با اِم حال نیمَشام بوآجِم کَمیله اِنتخاب بِکَرِم! 23 اِم دِ گِله وسطی کا بَرک دَرگیریمَه. چیرا که آرِزو دارِم اِم دنیا کا بِشوم و مَسیح نَه بِبوم، چوم که اِم چاکتَرَه. 24 امّا چِمِن مَندِه جِسمی کا شِمَه را واجِبتَره. 25 چوم که اِمی کا مُطمئنیمَه، بَزنیم که شِمَه پیشرفت و شادی واسی ایمانی کا، زِنده بَمَندیم و شِمَه گِردی نَه اِدامه بَدایم، 26 تا وختی هَنی بام شِمَه وَر، شِمَه فَخر مسیحْ عیسی کا چِمِن واسی وِرتَر و وِرتَر بِبو. 27 فَقَط بِدارَه شِمَه زِندگی رَوِش، مسیح اِنجیلی شَئنی کا بِبو، اَتَه که چِه بام شِمَه بِوینِم و چِه مام، شِمَه کا دَرَسِم که ایلَه روح کا پابَرجا ایرونه و یَک فیکر، یَندی نَه دوش بِه دوش، اِنجیل ایمانی واسی تَقّلا بَکَردیرون، 28 و هیچ چی کا کَسونی کا که شِمَه ضِد اینه تَرسی نیرونَه. اِم چَوون را ایلَه آشکارَه نیشونه ای یَه هَلاکَتی را، امّا شِمَه را نجاتی نیشونه، و اِم خِداکا یَه. 29 چوم اِم اِفتخار شِمَه نَصیب بییَه که نِه فقط بِه مسیح ایمان بواَرَه، بَلکَم چَیی راه کا رَنج و عذاب نی بِکَشه. 30 شِمَه را نی هَ جنگی یَه که مِن چَیی دیلَه کا ویندِرونه و حِسَه دَرَسَه که حَلا نی اَیی نَه سَر و کَله بَژَیم. |
@ 2024 Korpu Company