نامَه فیلیمونیرا 1 - کتاب مقدس به زبان تالشی شمالی

¹ پولُسی طرفی کا، مسیحْ عیسی زندانی، و چَمَه بِرا تیموتائوس، چَمَه عزیزَه همکار فیلیمونی را،

² چَمَه خالا آپْفیا و چَمَه هَمرزم آرخیپوس، و کلیسایی کا که اِشتِه کَ کایَه:

³ فیض و صُلح و سلامتی چَمَه دَده، خِدا، و خداوندْ عیسایِ مسیح طرفی کا شِمَه را با.

فیلیمونی محبت و ایمان

⁴ از چِمِن دعا اون کا تِه ویر بواَردیم، هَمیشه چِمِن خِدا شُکر بَکَردیم،

⁵ چوم از اِشتِه محبت و ایمانی درباره که خداوندْ عیسی و گِردِ مقدّسون را هِستِرَه، دَرَسِم،

⁶ و دعا بَکَردیم که اِشتِه ایمانی شریک بییِه، کمک بِکَرِه که هَر چاکَه چیی درباره که مسیح واسی چَمَه دیلَه کا دَرییَه، ایلَه تمام کمالَ آزونِستِه ثَمر بواَرِه.

⁷ اِی بِرا، چوم که اِشتِه محبتی کا بَرک شاد بیمَه و تَسلی گِتِمَه، چوم مقدّسون دیلِن اِشتِه واسی هَنی تازَه جان گِتِشونَه.

پولُسی خواهیشت اونیسیموسی درباره

⁸ اِمی واسی، هَر چَن مسیح کا اِم جرئتی دارِم که بَه تِن حکم بِکَرِم اَ چیی که لازِمَه انجام بِدَی،

⁹ با اِم وجود، محبتی واسی صَلاح بَزنیم که تِه کا خواهیشت بِکَرِم: از، پولُس که ایلَه پیرَه مِردیمَه، و حِسَه نی مسیحْ عیسی زندانی ایمَه،

¹⁰ چِمِن خِردَن اونیسیموسی درباره که زندانی دیلَه کا چَیی دَده بَییمَه، تِه کا خواهیشتی دارِم.

¹¹ اَ قدیمون بَه تِه را فایده ای نِداری، امّا حِسَه هم بَه تِه را و هم بَه مِرا فایده هِستِشه.

¹² از چِمِن جیگر گوشه ویسا آکَرِم اِشتَه وَر.

¹³ از خوشحال بَبیم که اَیی چِمِن وَری کا غَم بَرِم تا اِم مدتی که اِنجیلی واسی زندانی دیلَه کا ایمَه، اِشتَه عَوض اَ مِن خدمت بِکَرِه.

¹⁴ امّا صَلاح ویندِمَه که بیدون اِشتِه رضایت کاری مَکَرِم، تا اِشتِه چاکی کَردِه اِشتِه میلی نَه بِبو، نِه زوری نَه.

¹⁵ شاید چوم، اِمی واسی بَه که روکَتِه زمان تِه کا جدا آبَه تا همیشه را آگَردِه اِشتِه وَر،

¹⁶ امّا دِ نِه نوکری شیوار، بَلکَم نوکری کا کفاتَر، ایلَه عَزیزَه بِرایی شیوار. اَلَلخصوص بَه مِرا، ولی چِندی وِرتَر بَه تِه را، هَم جِسمی کا هَم خِداوندی کا.

¹⁷ بَس اَگم مِن اِشتِه رَفِق بَزنیش، اَیی هَتَه قبول بِکَه که مِن قبول بَکَردیش.

¹⁸ اَگم بَه تِنه بَدی کَردَشه، یا چیی بَه تِه قرضدارَه، اَیی چِمِن حساب بِنَه.

¹⁹ از، پولُس، چِمِن دَسی نه بَنیویشتیم: از اَیی را جبران بَکَردیم- البته لازم نییَه بوآجِم که تِه اِشتِه جانی نی بَه مِن مدیونیش.

²⁰ ها اِی بِرا، پیستِمَه که خداوندی دیلَه کا بَه تِه کا منفعتی بَه مِن آرَسته. چِمِن جانی مسیح کا تازَه آکَه.

²¹ اِمی بَنیویشتیم چوم که اِشتِه اِطاعت کَردِه کا خاطر جَمع ایمَه و بَزنیم حتی اَ چیی کا که بَواتیم وِرتَر، بَکَردیش.

²² ضِمنَن، ایلَه اتاق بَه مِرا حاضیر آکَه، چوم اُمید دارِم خِدا شِمَه دعااون مستجاب بَکَردی و اِشتَن لُطفی نه مِن آگاردِنه شِمَه وَر.

²³ اِپافْراس، که مسیحْ عیسی واسی مِنه زندانی کایَه، بَه تِه را سلام ویسا آکَرِه.

²⁴ اِنتَه نی چِمِن همکارِن، مَرقُس، آریستارخوس، دیماس و لوقا بَه تِه را سلام ویسا آکَرِن.

²⁵ عیسایِ مسیح خِداوندْی فیض شِمَه روح نَه بِبو.