مَرقُس 8 - کتاب مقدس به زبان تالشی شمالیعیسی چهار هَزار نفری غَذا بَدای 1 اَ روزون کا، هَنی وِرَه جماعتی عیسی دور جمع آبینَه. وختی چییشون نِبه که بَرین، عیسی اِشتَن شاگِردون دَخوندِشه و اَوون نَه واتِشه: 2 «اِم جماعتی را چِمِن دیل سوجه. چوم حِسَه سه روزه اَوِن مِنه اینَه و چیی هَردِه را نیشونَه. 3 اَگم اَوون وِشی رایی بِکَرِم تا اِشتَن کَ اون را بِشون، راه کا ضعف بَکَردین. بعضی اَوون کا دورَه راه نَه اومَینَه.» 4 شاگِردِن جَواو دوشونَه: «اِنتَه رَه دور افتاده جِگایی کا چِنتَه کسی بَشای اِم مردمی سیر آکَردِه را نون فراهم بِکَرِه؟» 5 عیسی دَفَرسِشه: «چَن گِله نون هِستِرونَه؟» اَوِن جَواو دوشونَه: «هفت گِله.» 6 اَ موقع عیسی جماعتی دستور دوشَه که زمینی سَری کا بِنِشِن. دومله هفت گِله نونی پِگِتِشه و شُکور کَردِه پَش، اَوون پَله کَردِشه، آدوشَه اِشتَن شاگِردون تا مردمی ناری کا بِنَن؛ و شاگِردِن نی اَوون نوشونَه جماعتی ناری کا. 7 چَن گِله روک مایی نی اِستِشون بَه. عیسی ماییون نی برکت دوشَه و واتِشه تا اَوون نی بِنَن مردمی ناری کا. 8 گِرد هَردِشونَه و سیر آبینَه، شاگِردِن، نون و مایی تیکه خوردَه اون کا که مَندَه بَه، هفت گِله سَبد پور جمع آکَردِشونَه. 9 اوآ کا تقریبا چار هَزار نفر بینَه. دومله عیسی جماعتی رایی کَردِشه 10 و اَلبَحَل اِشتَن شاگِردون نَه لوتکا دَنشته و شَه دَلمانوتَه منطقه را. فریسییِن ایلَه آسِمونی یَه نیشونه پیستِشونَه 11 فریسی فِرقه عُلما اومینَه عیسی وَر و دَمَندینَه اَیی نَه بحث کَردِشونَه. اَوِن عیسی اِمتحان کَردِه را، اَیی کا ایلَه آسِمونی یَه نیشونه ای پیستِشونَه. 12 عیسی، اِشتَن دیلی کا آهی کَشِشَه و واتِشه: «چیرا اِم نَسل نیشونه دومله گردِن؟ حقیقتن شِمَه نَه بَواتیم، هیچ نیشونه ای اِم نسلی آدوعَه نییَب.» 13 دومله چَوون وَری نَه شَه و هَنی لوتکا دَنِشته، شَه آوی اَ طرفی را. فریسیون و هیرودیسی خمیره مایَه 14 شاگِردِن ویر بَرکَردَشون بَه اِشتَن نَه نون پِگِرِن، و لوتکا کا فقط ایلَه نونِشون اِستبَه. 15 عیسی اَوون هشدار دوشَه و واتِشه: «ویرا بِبییَه و فریسیون و هیرودیسی خمیره مایَه کا دوری بِکَرَه.» 16 بَس شاگِردن چِمی درباره که نون نیشونه دَمَندینَه یَندی نَه بحث کَردِه 17 عیسی که اِمی بَزنی، اَوون نَه واتِشه: «چیرا چِمی درباره که نون نیرونَه یَندی نَه بحث بَکَردیرون؟ حَلا نیمَزنه و درک نِکَرَه؟ مَگم شِمَه دیل سِنگی کایَه؟ 18 چِم هِستِرونَه و نِوینَه؟ گوش هِستِرونَه و نِدَرَسَه؟ ویرِرون نییَه؟ 19 وختی که اَ پینج گِله نونی، پینج هَزار نفری را پَلَه کَردِمَه، چَن گِله زنبیل پور تیکه خورده اون کا جَمع آکَردِرونَه؟» اَوِن واتِشونَه: «دونزَه گِله زنبیل.» 20 «و وختی اَ هفت گِله نونی چار هَزار نفری را پَلَه کَردِمَه، چَن گِله زنبیل پور تیکه خورده اون کا جمع آکَردِرونَه؟» اَوِن واتِشونَه: «هفت گِله زنبیل.» 21 عیسی اَوون نَه واتِشه: «حَلا درک نِکَرَه؟» عیسی، بِیت صِدا کا ایلَه کورَه مِردی شفا بَدای 22 وختی اَوِن آرَستینَه بِیت‌صِیْدا شهری دیله، چَن نفر ایلَه کورَه مِردی وَردِشونَه عیسی وَر، و عیسی مِنَّت کَردِشونَه چَیی سَر دَس پِنَه. 23 عیسی اَ کورَه مِردی دَسی گِتِشه و اَئی دِه کا بَردِشه بِرون. دومله چَیی چِمون کا چاف ویکَردِشه و اِشتَن دَسون چَیی سَر نوشه و دَفَرسِشه: «چیی بَویندیش؟» 24 اَ مِرد اِشتن سَری راست آکَردِشه و واتِشه: «مردمی بَویندیم ولی اَوِن دارونی شیواری نَه که راه بَشین.» 25 دومله هَنی عیسی اِشتَن دَسون چَیی چِمون کا نوشه و اَ مِردی چِمِن آبینَه، چَیی چِمون سو آگَردَه و گِرد چییون واضِح ویندِشه. 26 عیسی اَئی ویسا آکَردِشه چَیی کَ را و واتِشه: «حتی اَ دِه دیلَه نی مَش.» پطرسی اِعتراف درباره عیسی 27 عیسی اِشتَن شاگِردون نَه شَه قیصریۀ فیلیپی اَطرافی دِه اون را. راه کا، عیسی اِشتَن شاگِردون کا دَفَرسِشه: «مردم بَواتین اَز کی ایمَه؟» 28 اَوِن جَواو دوشونَه: «بعضی بَواتین تِه یحیای تعمید دهنده ایش، بعضی بَواتین ایلیا پیغمبریش و بعضی نی بَواتین ایلَه پیغمبرون کا ایش.» 29 عیسی اَوون کا دَفَرسِشه: «امّا شِمَه چِه بَواتیرون اَز کی ایمَه؟» پطرس جَواو دوشَه: «تِه مسیح موعود ایش.» 30 عیسی اَوون بَرک قَدغَن کَردِشه که چَیی درباره کسی نَه چیی مَواجِن. عیسی پیشگویی درباره اِشتَنِش مرگ و زِندَه آبییِه 31 اَ موقع عیسی دَمَنده چَوون تعلیم دوعِه که اِنسانی زوعَه بَسی وِر عذاب بِکَشه و شیخون و سَران کاهنون و توراتی معلمون طرفی کا رَد آبو، کِشته بِبو و سه روز پش زِندَه آبو. 32 عیسی اِم گفی اَوون را واضِح واتِشه. پطرس، عیسی بَردِشه کناری را و دَمَندَه اَییرا زِرَه گِتِشه. 33 امّا عیسی آگَردَه، اِشتَن شاگِردون دَیشتَه و پطرسی را زِرَه گِتِشه و واتِشه: «بَه مِن کا دور آبو، اِی شیطان! چوم اِشتِه فیکرِن اِنسانی اینَه، نِه خِدایی یَه فیکر.» 34 اَ موقع جماعتی اِشتَن شاگِردون نَه دَخوندِشه اِشتَن وَر و اَوون نَه واتِشه: «اَگم کسی پیستِشَه چِمِن پیرو بِبو، بَسی اِشتَن کا دَس پِگِرِه و اِشتَن عذاب و مرگی صلیبی پِگِرِه چِمِن دومله با. 35 چوم هَر کسی که پیستِشَه اِشتَن جانی نجات بِدَه، اَیی اَز دَس بَدای؛ امّا هَر کسی چِمِن واسی و اِنجیلی واسی اِشتَن جانی اَز دَس بِدَه، اَیی نجات بَدای. 36 چوم اِنسانی را چِه فایده ای دارِه که گِرد دنیا بِدارِه، امّا اِشتَن جانی اَز دَس بِدَه؟ 37 آدَم اِشتَن جانی پَس ویگِته را چِه بَشای آدَه؟ 38 چوم هَر کسی اِم زناکار و گناه کارَه نسلی میانه کا، مِن کا و چِمِن گفون کا عار بِدارِه، اِنسانی زوعَه نی، اَ موقع که اِشتَن آسِمونی یَه دَده جلالی کا، مقدّس ملائیکه اون همراه بومَی، اَیی کا عار دارِه.» |
@ 2024 Korpu Company