مَرقُس 5 - کتاب مقدس به زبان تالشی شمالیعیسی ایلَه تور و دیوونه مِردی شفا بَدای 1 دومله اَوِن شینَه دریاچه اَ طرفی را، جِراسیونی منطقه را. 2 هِنتَه که عیسی لوتکا کا ویرمَه، ایلَه مِردی که پلیده روح گیرفتار بَه، قبرستونی کا بِرون اومَه و عیسی نَه دیمادیس بَه. 3 اَ مِرد قَبرِستونی کا زندگی بَکَردی و دِ کسی نیمشَای حتی زِنجیری نَه نی اَیی دَوِندی. 4 چوم چِندی کَرَه اَئی قول و زنجیری نَه دَوَستَشون بَه، امّا اَ، زِنجیرون پَلَه کَردَش بَه و اَ قولونی که چَیی پااون کا دَوَستَشون بَه، چاکندَه ش بَه. هیچ‌کسی زور آنِرَستی که اَیی رام آکَری. 5 شَو و روز گورون و کولون سَری کا خِلِع ژَنی و سِنگی نَه اِشتَن زخمی کَری. 6 وختی دوری نَه عیسی ویندِشه، ویریتِه ویریتِه اومَه و عیسی پیشی کا بَلَکه زمینی سَر، 7 و بِلنده سَسی نَه خِلِع کَردِشَه: «اِی عیسی، خِدای متعالی زوعَه، تِه مِنه چِه کارِر اِستَه؟ تِه قَسَّم بَدایم بِه خِدا که مِن عذاب مَدَی!» 8 چوم عیسی اَیی نَه بَواتی: «اِی پلیده روح، اِم مِردی کا بِرون بِری!» 9 عیسی اَیی کا دَفَرسِشه: «اِشتِه نوم چَه؟» جَواو دوشَه: «چِمِن نوم قُشون؛ چوم وِری مونَه.» 10 و وِر عیسی مِنَّت کَردِشه که اَوون اَ مَنطقه کا بِرون بَمَرکَرِه. 11 اَ دور و اَطرافی کولون کا، یالَ خوعه رَمَه ای کارا غذا بَردین. 12 پَلیده اَرواح عیسی مِنَّت کَردِشونَه، واتِشونَه: «اَمَه ویسا آکَه اَ خو اون دیلَه؛ بِدا بِشَم چَوون دیلَه.» 13 عیسی نی اَوون اِجازه دوشَه. پَلیده اَرواح نی اَ مِردی کا بِرون اومینَه و دَشینَه خو اون دِیله. رَمَه ای که چَیی تعداد تقریبا دِ هَزار گِله خو بَه، کولی سَرآجیری نَه هجوم بَردِشونَه دریاچه طَرف و آوی دیلَه کا غرق آبینَه. 14 خوعَه وونِن دَوَشتینَه و اِم اِتِفاقی شهری کا و دِه کا واتِشونَه. مردم نی اومینَه تا بِوینِن چِه اِتِفاقی دَلَکه. 15 اَوِن اومینَه عیسی وَر و وختی ویندِشونَه اَ تور و دیوونه مِرد که پیشتَری اَ قُشونی گیرفتار بَه، حِسَه خَلا دَکَردَشه و عاقل اوآ کا نِشتَه، وحشت کَردِشونَه. 16 کسونی که اِم ماجرا اِشتَن چِمی نَه ویندَه شون بَه، اَ چیی که اَ تور و دیوونه مِرد و اَ خو اون سَر اومَه بَه، مردمی را واتِشونَه. 17 اَ موقع مردم دَمَندینه عیسی مِنَّت کَردِشونَه که چَوون منطقه کا بِشو. 18 وختی عیسی لوتکا دَنِشی، اَ مِردی که پیشتَر تور و دیوونه بَه، عیسی مِنَّت کَردِشه که چَیی همراه بِشو. 19 امّا عیسی اِجازه نِدوشَه و واتِشه: «بِش کَ، اِشتِه دوست و آشنایون وَر و اَوون نَه بوآج که خِداوند بَه تِرا چِه کَردَشه و چِنتَه بَه تِن رَحم کَردِشه.» 20 بَس اَ مِرد شَه و دِکاپولیسی منطقه کا، اَ چیی که عیسی اَیی را کَردَش بَه، دَمَندَه اِعلام کَردِشه، و مردم گِرد حَیرون بینَه. عیسی، ایلَه ژِنی و یایروسی کِلَه شفا بَدای 21 عیسی هَنی لوتکا نَه شَه آوی اَ طرفی را. دریاچه کَناری کا، وِرَه جماعتی چَیی دوری کا جمع آبینَه. 22 دومله عبادتگاه ایلَه رئیسون کا نی که چَیی نوم یایروس بَه اومَه اوآ و عیسی ویندِه نَه چَیی دَس و پا دَلَکه 23 و وِر مِنَّت بَکَردی و بَواتی: «چِمِن روکه کِلَه کارا بَمَردی. بِری، اِشتِه دَسی چَیی سَری کا پِنَه تا وَج آبو و زِنده بومونِه.» 24 بَس عیسی اَیی نَه شَه. وِرَه جماعتی نی عیسی دومله راه دَلَکینه. اَوِن هر طرفی نَه عیسی فشار بواَردین. 25 اوآکا، ایلَه ژِنی بَه که دونزَه سال بَه خونریزی داری. 26 اَ ژِن وِرَه دکترون وَر شَه بَه و چَوون دَسی جیری کا وِر عذاب کَشَش بَه و اِشتَن اَموالی گِردی خرج کَرده ش بَه؛ امّا وَج آبییِه عوض، بَدتَر آبَه بَه. 27 اَ ژِن، عیسی درباره چییونی دَرَسَش بَه، بَس جماعتی دیلَه نَه عیسی پِشتی نَه اومَه و چَیی اَبا دَس آسوشَه. 28 چوم اَ ژِن اِشتَن نَه واتَش بَه: «اَگم حتی چَیی اَبا دَس آسام، شفا بَگتیم.» 29 هَ لحظه چَیی خونریزی بَند اومَه و اِشتَن جانی کا اِحساس کَردِشه که اِشتَن مریضی کا شَفا گِتَشَه. 30 عیسی هَ لحظه زونِستِشه که قوّتی اَیی کا بَرشه. بَس جَماعتی دیلَه کا اِشتَن دور و وَری دَیشتَه و دَفَرسِشه: «کی چِمِن اَبا دَس آسوشَه؟» 31 چَیی شاگِردِن جَواو دوشونَه: «بَویندیش که جماعت هَر طرفی نَه تِه فشار بواَردین؛ هَنی دَفَرسی، ”کی مِن دَس آسوشَه؟“» 32 عیسی اِشتَن دور و وَری دَیشتَه تا بِوینِه کی اِم کاری کَردَشه. 33 بَس اَ ژِن که بَزنی چِه اِتِفاقی اَییرا دَلَکه، تَرس لَرزی نَه اومَه و عیسی پا دَلَکه و گِردِ حقیقتی بَیی را واتِشه. 34 عیسی اَ ژِنی نَه واتِشه: «کِلَه، اِشتِه ایمان تِه شفا دوعَشَه. سَقی نَه بِش و اِم مریضی کا آزاد بِبو!» 35 عیسی حَلا کارا گَف ژَنی که عده‌ای عبادتگاه رئیسی کَ کا اومینَه و واتِشونَه: «اِشتِه کِلَه مَردَه! دِ چیرا اُستادی زحمت بَدایش؟» 36 امّا وختی عیسی چَوون گَفی دَرَسِشَه، عبادتگاه رَئیسی نَه واتِشه: «مَتَرس! فقط ایمان بِدا.» 37 و اِجازه نِدوشَه که پطرس و یعقوب و یعقوبی بِرا یوحنا غِیراز کسی چَیی دومله بِشو. 38 وختی اَوِن آرَستینَه عبادتگاه رَئیسی کَ، عیسی ویندِشه که چِه غوغایی یَه. مردم بِلَنده سَسی نَه داد و شیون بَکَردین. 39 بَس عیسی شَه دیلَه و اَوون نَه واتِشه: «اِم غوغا و شیون چیرایَه؟ خِردَن مَردَه نییَه، بَلکَم خِتَه.» 40 اَوِن عیسی را خورستینَه. ولی عیسی گِرد اَوون اوآکا بَرکَردِشه، خِردَنی دَده نَنه و شاگِردونی که چَیی همراه بینَه پگِتِشه و شَه جِگایی که خِردَن اوآکا بَه. 41 عیسی اَ کِلَه دَسی گِتِشه و اَیی نَه واتِشه: «تالیتا، کوم!» یعنی: «اِی روک کِلَه، بَه تِنَه بَواتیم پِرِز!» 42 اَ کِلَه اَلبَحَل پِرِشته و دَمَنده راه شییِه. اَ کِلَه دونزَه ساله بَه. اَوِن اِم اِتِفاقی کا وِر مات و مبهوت بینَه. 43 عیسی اَوون وِر سفارش کَردِشه که مَرزِن کسی اِم اِتِفاقی کا خَوَردار بِبو و واتِشه ایی چیی آدییَه اَ کِلَه تا بَرِه. |
@ 2024 Korpu Company