مَرقُس 14 - کتاب مقدس به زبان تالشی شمالیعیسی بِیت‌عَنْیا کا 1 دِ روز مَند بَه، پِسَخ عید و فَطیر عیدی. سَران کاهِنِن و توراتی معلِمِن ایلَه رایی دومله گردین که بی سَس سَلَم عیسی دَستگیر بِکَرِن و بِکِشِن، 2 چوم اَوِن بَواتین: «اِم كاری نَبی عیدی روزون کا اَنجام بِدَن، نَبادا مردم شورش بِکَرِن.» 3 وختی عیسی، بِیت‌عَنیا دِه کا شَمعون جُذامی کَ کا سِفره سَری کا نِشت بَه، ایلَه ژِنی، ایلَه مَرمَری یَه قَبی نَه که چَیی دیلَه کا عطری یَه روَعن بَه اومَه عیسی وَر. اَ عطری یَه روعَن سُنبل خالصی کا بَه و وِر گِرون بَه. اَ ژِن اَ، قَبی چاکِندِشه و عطری ویکَردِشَه عیسی سَری کا. 4 بعضی کَسونی که اوآکا مَند بینَه وِر عصبانی بینَه، یَندی نَه واتِشونَه: «چیرا بَسی اِم عطر اِنتَه حَدَر بِشو؟ 5 بَبی اِم عطری سیصد دیناری کا وِرتَر خِرَته و چَیی پولی آدییَم فُقرا.» اَوِن اَ ژِنی بَرک سَرزَنِش کَردِشونَه. 6 امّا عیسی اَوون نَه واتِشه: «اَ ژِنی نَه کاری مَدارَه. چیرا اَیی اَذیَت بَکَردیرون؟ اَ، قشنگه کاری بَه مِرا کَردِشه. 7 چوم فَقیرِن همیشه شِمَه دور و وَری کا اینَه و هَر وخت پیستِرونَه بَشایرون اَوون کمک بِکَرَه، امّا اَز همیشه شِمَه نَه نیمَه. 8 اِم ژِن هَر چیی که چَیی دَسی کا بَرای، اَنجام دوشَه. اَ اِشتَن اِم کاری نَه، چِمِن بَدَنی نارنارِه دَفن کَردِه را، عطر ژَندِشَه و آمادَه آکَردِشه. 9 حقیقتن شِمَه نَه بَواتیم، گِرد دنیا هر جِگا کا كه خِدا پاُتشایی شادَه خَوَر اِعلام بِبو، اِم ژِنی کار نی چَیی یاد بودی را واتَه بَبی.» یهودا بِه عیسی خیانت بَکَردی 10 اَ موقع یهودا اَسخَریوط که ایلَه اَ دونزَه گِله شاگِردون کا بَه، شَه سَران کاهِنون وَر تا عیسی آدَه چَوون دَس. 11 اَوِن وختی یهودا گفون دَرَسِشونَه، شاد بینَه و اَیی وعدۀ دوشونَه که اَیی پول آدَن. یهودا نی ایلَه فرصتی دومله بَه تا عیسی آدَه چَوون دَس. پِسخَ عیدی سور شاگِردون نه 12 فَطیره عیدی اوّلین روزی کا که پِسَخی وَرَه قِربونی بَکَرِدین، عیسی شاگِردِن اَیی کا دَفَرسِشونَه: «پیستِرَه بِشَم کیا کا بَه تِرا تَدارک بِوینَم تا پِسَخ عیدی سوری بَری؟» 13 عیسی، دِ نفر اِشتَن شاگِردون کا ویسا آکَردِشه و اَوون نَه واتِشه: «بِشَه شهری را؛ اوآ کا ایلَه مِردی ایلَه آوَه نِرَه ای نَه شِمَه نَه دیمادیس بَبی. چَیی دومله بِشَه. 14 هر جِگایی که اَ مِرد شَه دیلَه، اَ کَ صاحیبی نَه بوآجَه ”اُستاد بَواتی، چِمِن میهمون خونۀ کیاره تا پِسَخَ عیدی سوری چِمِن شاگِردون نَه بَرِم؟“ 15 اَ ایلَه یالَه بالا خونه ای فرش بییَه و آمادَه شِمَه نیشون بَدای. اوآکا اَمَه را تَدارک بِوینَه.» 16 اَ موقع شاگِردِن شینَه شهر، همه چی هَتَه که عیسی اَوون نَه واتَش بَه ویندِشونَه و پِسَخ عیدی سوری را تدارک ویندِشونَه. 17 وختی شَو آبَه، عیسی اِشتَن دونزَه گِله شاگِردون نَه شَه اوآ. 18 وختی که سفره سَری کا نِشت بینَه و غذا هَرین، عیسی واتِشه: «حقیقتن شِمَه نَه بَواتیم، ایی نفر شِمَه کا بَه مِن خیانت بَکَردی، اَیی که مِنَه غذا بَردی.» 19 شاگِردِن پَکَر آبینَه و ایلَه ایلَه عیسی کا دَفَرسِشونَه: «اَ شَخص اَزیمَه؟» 20 عیسی واتِشه: «ایی نفر شِمَه دونزَه نفری کایَه، هَ کسی که اِشتَن نونی مِنَه ژَنِه قَدَرَه دیلَه کا. 21 اِنسانی زوعَه را هَ چیی که مقدّس نیویشته اون کا نیویشته بییَه هَتَه اِتِفاق دَلَکِه، امّا وای بِه حال اَ کسی كه اِم اِتِفاق چَیی خیانتی نَه اِنسانی زوعَه سَر با. اَییرا چاکتَر بَه كه هَرگز دنیا مای.» 22 سوری هَردِه موقع، عیسی نون پِگِتِشه و شُکر کَردِه پَش اَیی پَله کَردِشه و آدوشَه شاگِردون و واتِشه: «بِگِرَه، اِم چِمِن بَدنَه.» 23 دومله قَدَرَه پِگِتِشه و شُکور کَردِه پَش، اَیی آدوشَه شاگِردون و گِرد، اَیی کا هِنتِشونَه. 24 و اَوون نَه واتِشه: «اِم چِمِن خونَه که اَیی نَه تازه عَهدی مهر بَکَردیم. چِمِن خون وِر کَسون را ویبو. 25 حقیقتن شِمَه نَه بَواتیم، که اَنگِرَه رَزی محصولی کا دِ نِنجِم تا روزی که خِدا پاُتشایی کا، چَیی تازه بِنجِم.» عیسی پیشگویی بَکَردی که پطرس اَیی هاشا بَکَردی 26 وختی که اَوِن ایلَه سرود ستایش خَندِشونَه، زیتونَ کوه طرفی را راه دَلَکینَه. 27 عیسی اِشتَن شاگِردون نَه واتِشه: «شِمَه گِرد مِن تَنخا نَیَه. چوم زکریای پیغمبری کیتابی کا نیویشته بییَه که: «”شوونَه، ژَنِم و گوسَندِن وِلا آبون.“ 28 امّا چِمِن زِنده آبییِه پَش، شِمَه کا نارتَر بَشیم جلیلی ولایتی را.» 29 پِطرس، عیسی نَه واتِشه: «حتی اَگم گِرد تِه تَنخا بَرزِن، اَز تِه تَنخا نییَرزِم.» 30 عیسی اَیی نَه واتِشه: «حقیقتن تِنَه بَواتیم که هِم شَنار، پیش از اِم که سوک دِ کَرَه بوخونِه، تِه سِه کَره مِن هاشا بَکَردیش!» 31 امّا پطرس وِرَه تأکیدی نَه واتِشه: «اَگم لازم بِبو تِنَه بِمِرِم نی، تِه هاشا نِکَرِم.» گِردِ شاگِردِن نی هِمی واتِشونَه. عیسی جِتْسیمانی باغی کا دعا بَکَردی 32 اَ موقع اَوِن شینَه جِگایی را که چَیی نوم جِتسیمانی بَه. عیسی اِشتَن شاگِردون نَه واتِشه: «وختی اَز دعا بِکَردیم، شِمَه اییا کا بِنِشه.» 33 عیسی، پِطرس و یعقوب و یوحنا اِشتَن نَه بَردِشه. عیسی وِر بی قرار و تشویش آبَه، 34 و اَوون نَه واتِشه: «چِمِن جان غُرصَه کا نِزدیکه بِمِرِه. شِمَه اییا کا بومونَه و آگا بِبییَه.» 35 عیسی روکَتِه شَه نار، اِشتَن دیمی زمینی سَری کا نوشه و دعا کَردِشه که اَگم مُمکن بِبو اَ عذابَ ساعت اَیی کا دَوییَره. 36 عیسی اِنتَه واتِشه: «اَبّا، دَده، هَمه چیی بَه تِرا مُمکنَه. اِم عَذابی قَدره بَه مِن کا دور آکَه، امّا حَلا نی اَ چیی که از پیستِمَه مَبو، بَلکَم اَ چیی بِبو که تِه پیستِرَه.» 37 وختی عیسی آگَردِستَه اَ شاگِردون وَر ویندِشه اَوِن خِتینَه. بَس پطرسی نَه واتِشه: «شَمعون، خِتیش؟ نیمَشای ایی ساعت آگا بومونی؟ 38 آگا بِبییَه و دعا بِکَرَه که آزمایش مَبییَه. حقیقتن که روح مشتاقَه، امّا جِسم ناتوان.» 39 عیسی هَنی شَه و هَ دعا کَردِشه. 40 و وختی آگَردِستَه، ویندِشه اَوِن هَتَه خِتینَه، چوم چَوون چِمِن وِر سَنگین آبَه بینَه. اَوِن نیمَزنین عیسی نَه چِه بوآجِن. 41 اَ موقع عیسی سوّمین کَرَه اومَه شاگِردون وَر و اَوون نَه واتِشه: «حَلا خِتیرونَه و اِستراحت بَکَردیرون؟ دِ وَسته! اَ ساعت مقرر آرَستَه. حِسَه اِنسانی زوعَه آدَن گناه کارون دَس. 42 پِرِزَه، بِشَم. دَیِسه، کسی که بَه مِن خیانت بَکَردی کارا بومَی.» عیسی دستگیر بییِه 43 عیسی حَلا کارا گَف ژَنی كه یهودا، که ایلَه اَ دونزَه گِله شاگِردون کا بَه، آرَستَه. چَیی هَمراه ایی دَستَه، چو و چوماقون و قَمَّه اون نَه اومَه بینَه. اَوِن سَران کاهِنِن و توراتی معلِمِن و شیخون طرفی نَه اومَه بینَه. 44 اَ خائنَ شاگِرد، اِشتَن هَمراه اون ایلَه علامتی آدوعَه ش بَه و واتَش بَه: «اَ کسی كه از، اَیی ماچ بَکَردیم هَ اِستَه؛ اَئی بِگِرَه و چَیی بَردِه موقع شِمَه حواس جمع بِبو.» 45 وختی یهودا آرَستَه اَ جِگا، اَلبَحَل شَه عیسی وَر و واتِشه: «اُستاد!» و عیسی ماچ کَردِشه. 46 اَ موقع اَ گروه ویخِتینَه عیسی سَر، و اَئی دَستگیر کَردِشونَه. 47 امّا ایی نفر اَ کسونی کا که اوآکا مَندَه بینَه اِشتَن قَمَّه بَروَردِشه و اَیی نَه کاهِن اَعظمی نوکَری ایلَه ضربه ژَندِشَه و چَیی گوشی دَوِردِشه. 48 اَ موقع عیسی اَوون نَه واتِشه: «بَگم اَز راهزَنیمَه که چو و چُماقون و قَمَّه اون نَه چِمِن گِتِه را اومَیرونَه؟ 49 اَز هر روز معبدی کا شِمَه نَه بیمَه و تعلیم بَدایم و شِمَه مِن دَستگیر نِکَردِرونَه. امّا بِدا که مقدّس نیویشته اِن اِتِفاق دَلَکِن.» 50 اِم وختی کا گِرد شاگِردِن عیسی تَنخا نوشونَه و دَوَشتینَه. 51 ایلَه جَوونی که فقط ایی تیکه کتانَ پارچَه اِشتَن جانی کا دَپیچِستَش بَه، عیسی دومله راه دَلَکه. اَوِن اَئی نی گِتِشونَه، 52 ولی اَ، اَ کتانَ پارچه ای که اِشتَن دوری کا دَپیچِستَش بَه، وِل آکَردِشه و لخت دَوَشتَه. عیسی، شورا پیشی کا 53 اَوِن عیسی بَردِشونَه کاهِن اَعظمی وَر. اوآکا گِرد سَران کاهِنِن و شیخِن و توراتی معلِمِن جمع آبَه بینَه. 54 پطرس نی دوری نَه عیسی دومله شَه تا آرَستَه کاهِن اَعظمی کَ سِرا دیلَه. بَس اوآ کا، آتشی وَری کا، نِگهبانون نَه نِشتَه و اِشتَن گرم آکَری. 55 سَران کاهِنِن و گِرد شورا اَعضا تَقَّلا بَکَردین که عیسی ضِد ایلَه شهادتی پیدا بِکَرِن که اَیی بِکِشِن، ولی هیچ چی پیدا نِکَردِشونَه. 56 چوم هَر چَن وِر کَسِن دروعه شهادتونی عیسی ضِد دوشونَه، امّا چَوون شهادَتِن یَندی نَه جور نِبینَه. 57 اَ موقع بَعضی اومینَه نار و عیسی ضِد دوروعَه شهادتی دوشونَه، واتِشونَه: 58 «اَمَه اِشتَن دَرَسِمونَه که اَ بَواتی، ”اِم معبدی که اِنسانی دَسی نَه وَج آبییَه خَراو آکَرِم و سِه روزی کا، ایلَه دییَر معبدی وَج آکَرِم که اِنسانی دَسی نَه وَج آبَه نییَه.» 59 ولی حتی چَوون شهادتِن نی یَندی نَه جور نِبینَه. 60 اَ موقع کاهِن اَعظم پِرِشتَه و گِردی پیشی کا عیسی کا دَفَرسِشه: «هیچ جَواوی نِدَی؟ اِم چَه که اِم مِردَکِن اِشتِه ضِد شهادتی بَداین؟» 61 امّا عیسی ساکیت مَندَه و جَواوی نِدوشَه. کاهِن اَعظم هَنی اَیی کا دَفَرسِشه: «تِه مسیح موعود، خِدای مُتَبارکی زوعَه ایش؟» 62 عیسی اَیی نَه واتِشه: «اِستیمَه، و اِنسانی زوعَه بَویندیرون که خِدای قادِری راست دَسی وَری کا نِشته و آسِمونی خِرون نَه بومَی.» 63 اَ موقع کاهِن اَعظم اِشتَن خَلا یَخه پِزارنیشه و واتِشه: «دِ شاهِدمون چیرایَه؟ 64 چَیی کُفر واتِه دَرَسِرونَه. شِمَه تصمیم چَه؟» اَوِن گِرد عیسی محکوم کَردِشونَه و واتِشونَه که چَیی جَزا مَرگَه. 65 اَ موقع بعضی دَمَندینَه عیسی سَر چاف ویکَردِشونَه؛ اَوِن عیسی چِمون دَوَستِشونَه و هَتَه که اَئی ژَنین، بَواتین: «غیبگویی بِکَه!» نگهبانِن نی عیسی گِتِشونَه و ژَندِشونَه. پطرس، عیسی هاشا بَکَردی 66 وختی که پطرس حَلا جیری کا، سِرا کا مَند بَه، کاهِن اَعظمی ایلَه خاتَکون کا اومَه اوآ 67 و پطرسی ویندِشه که آتشی وَری کا اِشتَن گرم آکَری. اَ خاتَک پطرسی دَیشتَه و واتِشه: «تِه نی عیسایِ ناصری همراه بیش.» 68 امّا پِطرس هاشا کَردِشه و واتِشه: «از نیمَزنِم و نِفهمِم تِه چِه بَواتیش!» اِمی واتِشه و شَه بَلته طرفی را. اِم موقع سوک خَندِشَه. 69 هَنی، اَ خاتک پطرسی ویندِشه و کسونی نَه که اوآ کا مَند بینَه، واتِشه: «اِم مِرد ایلَه اَوون کا یَه.» 70 امّا پطرس هَنی هاشا کَردِشه. تِلی پش، کسونی که اوآکا مَند بینَه، هَنی پطرسی نَه واتِشونَه: «حتمن که تِه نی ایلَه اَوون کا ایش، چوم جلیلی ایش.» 71 امّا پطرس دَمَنده اِشتَن لَعن کَردِشه و قَسَّم هَردِشه، واتِشه: «اِم مِردی که بَواتیرون، از اَیی آنِزونِم!» 72 هَ لحظه کا سوک دوّمین کَرَه را خَندِشه. اَ موقع پطرس ویر وَردِشه که چِنتَه عیسی اَیی نَه واتَش بَه: «پیش اَز اِم که سوک دِ کَرَه بوخونِه، تِه سِه کَرَه مِن هاشا بَکَردیش». بَس چَیی دیل پور آبَه و داد کَردِشه. |
@ 2024 Korpu Company