مَرقُس 13 - کتاب مقدس به زبان تالشی شمالی

عیسی معبدی ویبِه پیشگویی بَکَردی

¹ وختی که عیسی معبدی کا، کارا بَشی، چَیی ایلَه شاگِردون کا اَیی نَه واتِشه: «اُستاد، دَیِس! چِه خاصَه سِنگونی، چِه خاصَه ساختمونونی!»

² عیسی اَیی نَه واتِشه: «اِم یالَ ساختمونون بَویندیش؟ بِزون که دِ، سِنگی، سِنگی سَر باقی نِمونِه، بَلکَم گِرد ویبون.»

³ وختی عیسی زیتونَ کوه سَری کا، معبدی رو بَه رو کا نِشت بَه، پطرس و یعقوب و یوحنا و آندریاس خَلوتَکی اَیی کا دَفَرسِشونَه:

⁴ «بَمون نَه بوآج کَینی اِم چییِن اِتِفاق دَلَکِن و وختی نِزدیک بَبی که گِردِ اِم چیِن اِتِفاق دَلَکِن چَوون نیشونه چَه؟»

⁵ عیسی اَوون نَه واتِشه: «شِمَه حَواس جمع بِبو که کسی شِمَه گمراه مَکَرِه.

⁶ وِر کَسِن چِمِن نومی نَه بومَین، و بَواتین، ”اَز هَ مسیح موعود اِستیمَه“ و وِر کَسون گمراه بَکَردین.

⁷ وختی جَنگون خَوَری دَرَسَه و جَنگون شایعه شِمَه گوش آرَستِه، تَشویش مَبییَه، بَسی اِم چییِن اِتِفاقِن دَلَکِن، امّا حَلا دنیا آخِر نییَه.

⁸ چوم که میلَّتی دییَر میلَّتی نَه و مَملکتی دییَر مَملکتی نَه جنگ بَکَردین و جور بَه جوره جِگا اون کا زلزله بومَی و قحطی بَبی. امّا اِم چییِن فقط زَندِه داجی شروع بییِه اِستَه که داجون فاصله هِی کمتر و کمتر بَبی.

⁹ «امّا شِمَه اِشتَن ویرا بِبییَه، چوم اَوِن شِمَه مَحکمَه اون تحویل بَداین و عِبادتگاه اون کا شِمَه ژَنِن. شِمَه چِمِن واسی فرماندارون و پاُتشا اون حضوری کا بَمَندیرون تا چَوون پیشی کا شهادتی بِدییَه.

¹⁰ اوّل بَسی خِدا پاُتشایی شادَه خَوَر گِردِ میلتون را اِعلام بِبو.

¹¹ هَر وخت شِمَه بِگِرِن و بِبَرِن مَحکمَه، پیش، پیش نِگران مَبییَه که چِه بوآجَه، بَلکَم هَر چیی که اَ موقع شِمَه نَه واتَه بَبی، اَیی بوآجَه؛ چوم شِمَه نیرونَه که گف ژَنَه، بَلکَم روح ‌القدسَه که گف ژَنِه.

¹² بِرا، اِشتَن بِرا و دَده، اِشتَن خِردَنی مرگی تسلیم بَکَردی. خِردَنِن بَر ضِد اِشتَن دَده نَنه پِرِزِن و چَوون مرگی باعیث بَبین.

¹³ گِرد مردم چِمِن نومی واسی شِمَه کا بیزار بَبین، امّا هَر کسی که تا آخِر تاو بواَرِه، نِجات پِیدا بَکَردی.

¹⁴ «امّا وختی اَ ’خَراوهَ کَره زِشت و نِجِسی‘ بِوینَه اَ جِگایی کایَه که نَبی بِبو، اَ موقع کسونی که یهودیه ولایتی کا مَندینَه، دَوَزِن کوه اون را؛

¹⁵ و هَر کسی که اِشتَن کَ بومی سَری کا بِبو، چیی پِگِته را، ما جیر و مَشو کَ دیلَه؛

¹⁶ و هَر کسی که مزرعه کا مَندَه، اِشتَن اَبا پِگِته را آمَگردِه کَ.

¹⁷ وای بِه حال ژِنکونی که اَ روزون کا حامیله اینَه و ژِنکونی که خِردَن شِت بَداین!

¹⁸ دعا بِکَرَه که اِم چییِن زوموستونی کا اِتِفاق مَدَلَکِن.

¹⁹ چوم که اَ روزون کا اِنتَه رَه مصیبتی بَبی که، خِلقتی اوّلی نَه که خِدا دنیا خلق کَردِشه تا اوری نَه روز، چَیی شیوار بَه نییَه و هَرگز نی نییَب.

²⁰ و اَگم خِداوند اَ روزون کِتا مَکَری، هیچ اِنسانی سالمَ جان بِه دَر نِبَری، امّا اِنتخاب بییَه اون واسی، که اِشتَن اَوون اِنتخاب کَردَشه، خِداوند اَ روزون کِتا کَردِشه.

²¹ اَ موقع، اَگم کسی شِمَه نَه بوآجِه: ”دَیِس، مسیح موعود اییاکا یَه“، یا ”دَیِس، اَ، اوآکا یَه!“ باوَر مَکَرَه.

²² چوم دروعَه مسیح اِن و دروعَه پیغمبرِن بومَین، و اِنتَه رَه نیشونه اونی بواَردین و معجزه اونی بَکَردین که اَگم بِشان، اِنتخاب بییَه اون گمراه بِکَرِن.

²³ بَس هوشیار بِبییَه، چوم نارنارِه، گِرد اِمون شِمَه نَه واتَمه.

²⁴ «امّا اَ روزون کا، اَ مصیبتَ پَش، «‌”آفتاو تاریک آبو و مانگ دِ نور نِدَه.

²⁵ ستاره اِن آسِمونی کا وِیبون و اَ قدرتِنی که آسِمونی محکم غَم بَردین، لَرزِن.“

²⁶ اِم موقع مردم اِنسانی زوعَه، بَویندین که بَرکَ قدرت و جلالی نَه، خِرون دیلَه نَه بومَی.

²⁷ دومله اَ، ملائیکه اون ویسا آکَرِه و دنیا چار گوشه نَه، زمینی اِنسَری نَه تا آسِمونی اَ سَر، اِشتَن اِنتخاب بییَه اون جمع آکَرِه.

²⁸ «اَنجیل داری کا اِم دَرسی باموجَه: هِنتَه که چَیی لاخه اِن جَوونه ژَنِن و لیو بواَردین، شِمَه بَزنیرون كه تاووستون نِزدیکه.

²⁹ هِنته نی وختی بَویندیرون که اِم چییِن اِتِفاق دَلَکِن، بِزونَه كه اِنسانی زوعَه اومِه نِزدیکَه، حتّی بَری پِشتی کا مَندَه.

³⁰ حقیقتن شِمَه نَه بَواتیم، تا گِرد اِم چییِن اِتِفاق مَدَلَکِن، اِم نَسل اَز بیِن نِشون.

³¹ آسِمون و زمین اَز بین بَشین، امّا چِمِن گفِن هَرگز اَز بین نِشون.

اَ روز و اَ ساعتی هیچکس نیمَزنِه

³² «آسِمونی یَه دَده غیراز، هیچکس اَ روز و اَ ساعتی نیمَزنِه؛ حتّی آسِمونی ملائیکه اِن و زوعَه نی اَیی کا خَوَر نیشونَه.

³³ بَس ویرا و آگا بِبییَه، چوم شِمَه نیمَزنَه که اَ زمان کَینی آرَستِه.

³⁴ اَ روزی اومِه، ایلَه مِردی شیوارَه که کارا بَشی سفر. اَ موقع که کَ نَه بَشی، اِشتَن کَ اِختیاری آدَه اِشتَن نوکَرون دَس و هَر کمیله ایلَه وظیفه‌ آدَه و بَره پا نی دستور بَدای که آگا بومونِه.

³⁵ بَس شِمَه نی آگا بِبییَه، چوم نیمَزنَه کَ صاحیب کَینی بومَی، شَو یا نِصبِ شَو، سوکی خَندِه موقع یا صِبی زو.

³⁶ نَبادا که اَ ایی دفعه با و بِوینِه شِمَه خِتیرونَه.

³⁷ اَ چیی که شِمَه نَه بَواتیم، گِردی نَه بَواتیم: آگا بِبییَه!»