مَرقُس 12 - کتاب مقدس به زبان تالشی شمالیشَرورَه باغَوونون مَثَّل 1 دومله عیسی دَمَنده مَثَّلون نَه اَوون نَه گَف ژندِشه و واتِشه: «ایلَه مِردی بَه که ایلَه اَنگِرَه باغی وَج آکَردِشه و چَیی دوری حَصار دَچیندِشه. اَ، باغی دیلَه کا ایلَه چاچَه وَج آکَردِشه اَنگِری لِه آکَردِه را و ایلَه برجی وَج آکَردِشه نگهبانی دوعِه را. دومله باغی اِجاره دوشَه چَن گِلَه باغَوونون و اِشتَن شَه ایلَه دییَر مملکتی را. 2 اَنگِرَه چینی وختی کا، ایلَه نوکَری ویسا آکَردِشه باغَوونون وَر تا تِلی باغی محصولی اَوون کا ویگِرِه. 3 امّا باغَوونِن اَ نوکَری گِتِشونَه، ژَندِشونَه و تِیه دَس آگاردِنیشونَه. 4 دومله باغَ صاحیب ایلَه دییَر نوکَری ویسا آکَردِشه چَوون وَر، ولی باغَوونِن چَیی سَری چاکِندِشونَه و اَیی نَه بَدرفتاری کَردِشونَه. 5 باغَ صاحیب هَنی ایلَه دییَر نوکَری ویسا آکَردِشه، امّا باغَوونِن اَئی کِشتِشونَه. و وِر کَسون دییَری نَه نی اِنتَه کَردِشونَه؛ بعضیون ژَندِشونَه و بعضیون کِشتِشونَه. 6 باغَ صاحیب فقط ایی نفر دییَرِش اِستبَه که ویسا آکَرِه و اَ، چَیی عزیزگِرامی یَه زوعَه بَه. آخِرسَر اَیی ویسا آکَردِشه باغَوونون وَر و اِشتَن نَه واتِشه : ”اَوِن چِمِن زوعَه حُرمَتی غَم بَردین.“ 7 امّا باغَوونِن یَندی نَه واتِشونَه: ”وارث اِمَه. بایَه اَیی بِكِشَم تا اِم اِرث اَمَه آرَستِه.“ 8 بَس اَوِن، زوعَه گِتِشونَه، کِشتِشونَه و اَنگِرَه باغی کا فِرآدوشونه بِرون. 9 حِسَه، باغی صاحیب چِه بَکَردی؟ اَ بومَی و اَ باغَوونون هلاک بَکَردی و اَنگِرَه باغی دَسپارِه خَلکی دَس. 10 مَگم داوودی مزموری کا خَندَرون نییَه که: «”اَ سِنگی كه بَنّا اِن اَیی رَدکَردِشونَه، حِسَه بینا اَصلی یَه سِنگ بییَه. 11 خِداوند اِم کاری کَردَشه؛ و چَمَه نظری کا عجیبَه“؟ 12 سَران کاهِنِن و توراتی معلِمِن و شیخِن، پیستِشونَه که عیسی دستگیر بِکَرِن، چوم زونِستِشونَه که اِم مَثَّلی چَوون درباره واتَشه امّا مردمی کا تَرسین؛ بَس اَوِن عیسی وِل آکَردِشونَه و شینَه. سوال خَراج آدوعِه درباره 13 دومله اَوِن چَن نفر فریسی فِرقه کا و چَن نفر هیرودیسی طرفدارون کا، ویسا آکَردِشونَه عیسی وَر تا اَئی چَیی اِشتَن گفی نَه تَله کا دَرَفَنِن. 14 اَوِن اومینَه عیسی وَر و واتِشونَه: «اُستاد، اَمَه بَزنیمون كه تِه مِرد راستگویی اِستیش و تِرا مهم نییِه که خَلک چِه فیکری بَکَردین، چوم که ظاهِری گولی نییَری، بَلکَم خِدا راه، درستی نَه تعلیم بَدایش. رومی اِمپِراطوری مالیات آدوعِه جایزَه یا نِه؟ بَسی اَیی مالیات آدییَم یا نِه؟» 15 امّا عیسی که چَوون دِ دیمی بَزنی اَوون نَه واتِشه: «چیرا مِن اِمتحان بَکَردیرون؟ ایی دینار بَه مِرا بواَره تا دَیِسِم.» 16 اَوِن ایلَه سکه ای وَردِشونَه. عیسی اَوون کا دَفَرسِشه: «چیکی دیم و چیکی نوم سکه سَری کایَه؟» اَوِن جَواو دوشونَه: «رومی اِمپِراطوری شِن.» 17 عیسی اَوون نَه واتِشه: «بَس اَ چیی که اِمپراطوری شِنَه آدییَه اِمپراطوری و اَ چیی که خِدا شِنَه آدییَه خِدا.» اَوِن چَیی گفون کا حَیرون مَندینَه. سوال کَردِه قیامتی درباره 18 دومله صَدوقیون فِرقه عُلما اومینَه عیسی وَر. صَدوقییِن قبول نِدارین که مَرده اِن زِندَه آبون. اَوِن عیسی کا ایلَه سوالی دَفَرسِشونَه و واتِشونَه: 19 «اُستاد، موسی پیغمبر اَمَه را نیویشتِشه که اَگم ایلَه مِردی بِرا بِمِرِه و چَیی ژِن خِردَن مَدارِه، اَ مِرد بَسی اَ ویوَه ژِنی نَه عروسی بِکَرِه تا اِشتَن بِرا را نَسلی بِنه. 20 حِسَه هفت گِله بِرا بینَه؛ اوّلین بِرا ایلَه ژِنی بَردِشه، و بیدون اِم که خِردَنی بِدارِه مَردَه. 21 دوّمین بِرا اَ ویوه ژِنی بَردِشَه، امّا اَ نی بیدون خِردَن مَردَه. سوّمین بِرا نی هِنتَه بَه. 22 هِنتَه نی، هیچ کمیله اَ هفت گِلَه بِرا، خِردَن دار نِبینَه. آخِرسَر، اَ ژِن نی مَردَه. 23 حِسَه، قیامتَ روزی کا، وختی که اَوِن هَنی زِندَه آبون، اَ ژِن کَملیه بِرا ژِن بَبی؟ چوم هَر هفت گِله بِرا اَیی نَه عروسی کَردَشونَه؟» 24 عیسی اَوون نَه واتِشه: «مَگم شِمَه اِم سوال نیشون نِدَه که چَدَه اِشتباه فیکر بَکَردیرون، چوم که نِه مقدّسَ نیویشته اون کا چیی بَزنیرون و نِه خِدا قدرتی کا؟ 25 چوم وختی که مَردَه اِن زِنده آبون، نِه ژِن بَبَردین و نِه شو بَکَردین؛ بَلکَم آسِمونی ملائیکه اون شیوار بَبین. 26 امّا مَردَه اون زِندَه آبییِه درباره، مَگم موسی کیتابی کا خَنده رون نییَه که، بوته ماجرا کا چِنته خِدا اَیی نَه واتِشه: ”از، اِبراهیمی خِدا، اِسحاقی خِدا و یعقوبی خِدا اِستیمه“؟ 27 خِدا، مَردَه اون خِدا نییَه، بَلکَم زِنده اون خِدایَه. شِمَه وِر اِشتباه فیکر بَکَردیرون!» یالتَرین حُکم 28 ایلَه توراتی معلمون کا نِزدیک اومَه و چَوون بحثی دَرَسِشَه. وختی ویندِشه که عیسی چاکَه جَواوی اَوون دوشَه، عیسی کا دَفَرسِشه: «کَمیله حُکم، گِردی کا مهمتَرَه؟» 29 عیسی اَیی نَه واتِشه: «مهمترین حکم اِمَه: ”دَرَس، اِی اِسرائیل: خِداوند چَمَه خِدا، خِداوند، یکتا اِستَه. 30 خِداوند اِشتِه خِدا نَه، تَمون اِشتِه دیل و تَمون اِشتِه جان و تَمون اِشتِه فیکر و تمون اِشتِه قدرتی نَه خِش بِبَش.“ 31 دوّمین حکم اِمَه: ”اِشتِه خَمسوعه نَه اِشتِه جانی شیوار خِش بِبَش.“ اِم دِ گِله حکمی کا یالتَر حُکمی نییَه.» 32 اَ توراتی معلم عیسی نَه واتِشه: «اُستاد چاکَه گفی ژَندِرَه! درست واتَرَه که خِدا ایلَه یَه و چَیی غِیراز خِدایی نییَه، 33 و اَیی نَه، تمون دیل و تمون فَهم و تمون قوّتی نَه خِش بییِه و اِشتِه خَمسوعه نَه اِشتِه جانی شیوار خِش بِییِه، گِرد تمام سوزَه قربونیون و هدیه اون کا مهمتَرَه.» 34 وختی عیسی ویندِشه که اَ مِرد چَدَه عاقلانه جَواو دوشَه، اَیی نَه واتِشه: «تِه خِدا پاُتشایی کا دور نیشَه.» چَیی پَش، دِ هیچکس جِکَه نِکَری عیسی کا چیی دَفَرسی. مسیح موعود چیکی زوعَه یَه؟ 35 وختی که عیسی معبدی کا تعلیم بَدای، دَفَرسِشه: «چِنتَه یَه که توراتی معلِمِن بَواتین مسیح موعود، داوود پاُتشا زوعَه یَه؟ 36 داوود اِشتَن، روح القدسی اِلهامی نَه اِعلام کَردِشه که: ”خِداوند چِمِن خِداوندی نَه واتِشه: «چِمِن راستَ دَسی کا بِنِش تا وختی که اِشتِه دِشمَنون اِشتِه پا جیری کا دَرَفَنِم.“ 37 اَگم داوود اِشتَن، اَیی نَه خِداوند بَواتی، بَس چِنتَه مسیح موعود بَشای داوودی زوعَه بِبو؟» جماعت گِرد شادی نَه عیسی گفون گوش بَداین. توراتی معلِمون کا دوری بِکَرَه 38 بَس عیسی اِشتَن تعلیمی کا واتِشه: «توراتی معلمون کا دوری بِکَرَه که اَوِن خِشی نَه بِلندَه اَبا اون نَه راه بِشون و خِشی نَه مردم، کوچه بازارون کا اَوون را سلام بِکَرن، 39 و عبادتگاه اون کا چاکتَرین جِگا اون بِدارِن و مهمونیون کا مِجلِسی کَفای نَه سَری کا بِنِشن. 40 اَوِن اِم وَری نَه ویوه ژِنکون کَ اون غارت بَکَردین و اَ وَری نَه، اِشتَن چاک نیشون دوعِه واسی، طولانی دعا بَکَردین. چَوون مکافات بَرک چَتین تَر بَبی.» ویوه ژِنی هدیه 41 عیسی اَ جِگایی رو به رو کا نِشت بَه که معبدی صُندوق اوآکا بَه و مردمی دَیِسی که صُندوقی کا پول دَرَفَنین. وِر کَسون ثِروتمندون کا وِرَه پولی دَرَفَنین. 42 دومله ایلَه فقیرَه ویوه ژِنی اومَه و دِ قِران دَرَفَندِشه صُندوقی کا. 43 اَ موقع عیسی اِشتَن شاگِردون دَخوندِشه و اَوون نَه واتِشه: «حقیقتن شِمَه نَه بَواتیم، اِم فقیرَه ویوه ژِن گِرد کَسونی کا که صُندوقی کا پول دَرَفَندَشونَه، وِرتَر آدوعَشه. 44 چوم اَوِن گِرد، اِشتَن دارایی اِضافی کا آدوشونَه، امّا اِم ژِن اِشتَن فقیری نَه، هَر چیی شی که اِستبَه آدوعَشه، یعنی گِردِ چیی که داریستِه.» |
@ 2024 Korpu Company