مَرقُس 11 - کتاب مقدس به زبان تالشی شمالیعیسی ایلَه شاهی شیوار دَشو اورشلیمی دیلَه 1 وختی آرَستینَه بِیت‌فاجی و بِیت‌عَنْیا دِه اون که اورشلیمی نِزدیکی کا و زیتون کوه کا بینَه، عیسی دِ گِله اِشتَن شاگِردون ویسا آکَردِشه 2 و اَوون نَه واتِشه: «بِشَه اَ دِیی را که شِمَه رو بَه رو کایَه. هِنتَه که دَشیرونَه دِه دیلَه، ایلَه اُلاغ کُره ای دَوستَه بَویندیرون که تا حِسَه کسی اَیی دَنِشته نییَه. اَیی آکَرَه و بواَرَه. 3 اَگم کسی شِمَه کا دَفَرسِه: ”چیرا اِنتَه بَکَردیرون؟“ بوآجَه: ”خِداوند اَیی لازِم دارِه و اَلبَحَل اَیی آگاردِنِه اییا.“» 4 اَ دِ نفر شینَه و بِرونی کا، ایلَه کوچه‌ای کا ایلَه اُلاغ کُره ای ویندِشونَه که بَری وَری کا دَوستَه بَه. بَس اَیی آکَردِشونَه. 5 بعضی کسونی که اوآکا مَندَه بینَه اَوون کا دَفَرسِشونَه: «چیرا اُلاغ کُره آکَرَه؟» 6 اَ دِ نفر هَتَه که عیسی اَوون نَه واتَش بَه، جَواو دوشونَه؛ بَس اَوِن اِجازه دوشونَه که بِشون. 7 شاگِردِن اُلاغ کُره وَردِشونَه عیسی وَر، اِشتَن اَبا اون پِرَندِشونَه اُلاغ کُره سَر و عیسی اَیی دَنِشته. 8 وِر کَسِن مردمی کا نی اِشتَن خَلا اون راه سَری کا جیکَردِشونَه و بعضی نی لیو دارَه لاخه اونی که مزرعه اون کا دَوِردَشون بَه، راه سَری کا جیکَرین. 9 کسونی که عیسی نارنارِه بَشین و مردمی که چَیی دومله بومَین، خِلِع بَکَردین و بَواتین: «نجات بِدَه!» «مُتِوارَکَه اَ کسی که خِداوندی نومی نَه بومَی!» 10 «مُتِوارَکَه چَمَه جَدّ داوودی پاُتشایی اومِه!» «نجات عَرش بَرینی کا!» 11 عیسی اومَه اورشلیم و شَه معبدی را. اوآ کا اِشتَن دور و بَری گِرد چیون دَیشتَه، امّا چوم عَری بَه اَ دونزَه گِله شاگِردی همراه شَه بِیت‌عَنْیا دِه را. عیسی اَنجیلَ داری لعنت بَکَردی 12 صَبایی نَه روز، وختی اَوِن بِیت‌عَنْیا کا بِرون اومینَه، عیسی وِشیش بَه. 13 عیسی دوری نَه ایلَه اَنجیل داری ویندِشه که لیوِش اِستبَه؛ بَس شَه تا بِوینه بَشای داری کا اَنجیل بِتلفه یا نِه. وختی داری نِزدیک آبَه، لیوی غِیراز داری کا چیی نِویندِشه، چوم حَلا اَنجیلی فصل نِبَه. 14 عیسی اَ داری نَه واتِشه: «دِ هرگز کسی تِه کا میوه ای مَرِه!» چَیی شاگِردِن اِمی دَرَسِشونَه. عیسی معبدی دیلَه کا 15 وختی آرَستینَه اورشلیم، عیسی شَه معبدی دیلَه و دَمَندَه کسونی که معبدی کا بازار مِجی بَکَردین بَرکَردِشه. عیسی، صرافون میزون ویگاردِنیشه و کَفتر خِرَشون بَساطی بِه هم ژَندِشَه 16 و اِجازه نِدوشَه کسی بار جابجا کَردِه را معبدی صَحنی کا رَد آبو. 17 دومله اَوون تعلیم دوشَه و واتِشه: «مَگم مقدّس نیویشته اون کا نیویشته بییَه نییَه که، «”چِمِن کَ نَه، دعا کَ بَواتین گِرد میلّتون را؟“ ولی شِمَه اَیی”دِزدون لونه“ وَج آکَردَرونه.» 18 سَران کاهنِن و توراتی معلِمِن اِمی دَرَسِشونَه و ایلَه رایی دومله گَردین که عیسی از بِین بِبَرِن، چوم اَیی کا تَرسین، چوم که گِردِ جماعت چَیی تعلیمون کا مات بینَه. 19 وختی مَغریب دَم بَه، عیسی و شاگِردِن شهری کا شینَه بِرون. ایلَه درس اَنجیل داری کا 20 صِبی زو، راه کا، اَ، اَنجیل داری ویندِشونَه که بِنَه کا خِشک آبَه بَه. 21 پطرس ماجرا ویر وَردِشَه و عیسی نَه واتِشه: «اُستاد، دَیِس! اَ، اَنجیل داری که نیفرین کَردِرَه، خِشک آبَه.» 22 عیسی جَواو دوشَه: «بِه خِدا ایمان بِدارَه. 23 حقیقتن شِمَه نَه بَواتیم، هَر کسی اِم کوه نَه بوآجِه، ”جِگا کا کَندَه بِبو، دریا کا دَلَک،“ و اِشتَن دیلی کا شَک مَکَرِه بَلکَم ایمان بِدارِه اَ چیی که بَواتی اِتِفاق دَلَکِه، اَیی را اَنجام بَبی. 24 بَس شِمَه نَه بَواتیم، هَر چیی که دعا کا پیستِرونَه، ایمان بِدارَه که اَیی ویگِتَرونَه، و شِمَه شِن بَبی. 25 «هر وخت دعا بَکَردیرون، اَگم شِمَه دیلی کا، کسی کا چیی هِستِرونَه، اَئی بِبَخشَه تا شِمَه دَده که آسِمونی کا یَه، شِمَه خطا اون بِبَخشِه. 26 امّا اَگم شِمَه مَبَخشَه، شِمَه دَده که آسِمونی کا یَه نی، شِمَه خطا اون نِبَخشِه.» عیسی حق و اِختیار 27 اَوِن هَنی اومینَه اورشلیم. وختی که عیسی معبدی کا راه بَشی، سَران کاهِنِن و توراتی معلِمِن و شیخِن اومینَه عیسی وَر 28 و واتِشونَه: «چِه حق و اِختیاری نَه اِم کارون بَکَردیش؟ کی اِم کارون اَنجام دوعِه حقی بَه تِن آدوعَشه؟» 29 عیسی چَوون جَواوی کا واتِشه: «اَز نی شِمَه کا سوالی هِستِمَه. بَه مِن جَواو بِدییَه تا اَز نی شِمَه نَه بوآجِم چِه حق و اِختیاری نَه اِم کارون بَکَردیم. 30 غسل تعمیدی که یحیی بَدای خِدا طرفی کا بَه یا اِنسانی طرفی کا؟ جَواو بِدییَه.» 31 اَوِن یَندی نَه بَحث کَردِشونَه، واتِشونَه: «اَگم بوآجَم، ”خِدا طرفی کا بَه “ ، عیسی بَواتی، ”بَس چیرا اَیی ایمان نِوَردِرونَه؟“ 32 امّا اَگم بوآجَم، ”اِنسانی طرفی کا بَه“…» - اَوِن مردمی کا تَرسین، چوم اَوِن گِرد یحیی ایلَه واقعی یَه پیغمبر بَزنین. 33 بَس عیسی جَواوی کا واتِشونَه: «اَمَه نیمَزنَم.» عیسی نی اَوون نَه واتِشه: «اَز نی شِمَه نَه نِواجِم چِه حق و اِختیاری نَه اِم کارون بَکَردیم.» |
@ 2024 Korpu Company