مَرقُس 10 - کتاب مقدس به زبان تالشی شمالی1 عیسی کَفَرناحومی نَه شَه بِرون و شَه یهودیه نواحی و اُردن رِواری اَ طرفی را. جماعت هَنی چَیی دور جمع آبینَه، و عیسی اِشتَن همیشگی یَه عادتی شیوار، اَوون تعلیم بَدای. تعلیم دوعِه طلاقی درباره 2 فریسی فِرقه عُلما اومینَه عیسی وَر و چَیی اِمتحان کَردِه را اَیی کا دَفَرسِشونَه: «جایِزَه که مِرد اِشتَن ژِنی طلاق بِدَه؟» 3 عیسی چَوون جَواوی کا واتِشَه: «موسی پیغمبر چِه حکمی شِمَه آدوعَشه؟» 4 اَوِن واتِشونَه: «موسی اِجازه دوعَشَه که مِرد ایلَه طلاقنامه بینویسه و اِشتَن ژِنی وِل آکَرِه.» 5 عیسی اَوون نَه واتِشه: «موسی شِمَه دیل سِنگ بییِه واسی اِم حُکمی شِمَه را نیویشتَشه. 6 امّا هَ اوّلی نَه که دنیا بِه وجود اومَه،”خِدا اَوون مِرد و ژِن خَلق کَردِشه.“ 7 و ”اِمی واسی مِرد اِشتَن دَده نَنه کا جِدا آبو، اِشتَن ژنی دَچیکه، 8 و اَ دِ نفر ایلَه بَدن آبون.“ بَس اَوِن دِ، دِ گِله بَدَن نینَه بَلكَم ایلَه بَدَنی نَه، 9 بَس اَ چی که خِدا پیوند دوعَشَه، اِنسان جِدا آمَکَرِه.» 10 وختی کَ دیلَه کا بینَه، شاگِردِن هَنی اِم موضوع درباره عیسی کا سوال دَفَرسِشونَه. 11 عیسی واتِشه: «هَر کسی اِشتَن ژِنی طلاق بِدَه و ایلَه دییَر ژِنی بِبَره، اِشتَن ژِنی حقی کا زِنا کَردَشه. 12 و اَگم ژِن اِشتَن شو کا طلاق ویگِرِه و ایلَه دییَر شویی بِکَره، زِنا کَردَشه.» بِدارَه روکَ خِردَنِن بان چِمِن وَر 13 مردم خِردَنون بواَردین عیسی وَر که چَوون سَر دَس پِنه. امّا شاگِردِن مردمی را زِرَه گِتِشونَه. 14 وختی عیسی اِمی ویندِشه، عصبانی آبَه و اِشتَن شاگِردون نَه واتِشه: «بِدارَه روکَ خِردَنِن بان چِمِن وَر؛ چَوون ناری مَگِرَه، چوم خِدا پاُتشایی اِنتَه رَه کَسونی شِن اِستَه. 15 «حقیقتن شِمَه نَه بَواتیم، هر کسی که خِدا پاُتشایی ایلَه خِردَنی شیوار قبول مَکَرِه، چَیی دیلَه نِدَشو.» 16 عیسی خِردَنون کَشَه آگِتِشه، چَوون سَر دَس پِنوشَه و اَوون برکت دوشَه. ثِروتمَندَه جَوون 17 وختی عیسی راه دَلَکه بَه، ایلَه مِردی ویریتِه ویریتِه اومَه، چَیی پیشی کا زِنگ ژَندِشَه و اَیی کا دَفَرسِشه: «چاکَ اُستاد، چِه بَسی بِکَرِم تا اَبَدی یَه زندگی وارث بِبوم؟» 18 عیسی جَواو دوشَه: «چیرا مِن چاک دَخونی؟ هیچ‌کس چاک نییَه خِدا غِیراز. 19 اَحکامی بَزنیش: ”قتل مَکه، زِنا مَکه، دِزدی مَکه، دروعَه شهادتی مَدَه، حُقَه بازی مَکه، اِشتِه دَده نَنه حُرمت بِکَه.“» 20 اَ مِرد جَواو دوشَه: «اُستاد، اَز گِرد اِم کارون چِمِن جَوونی کا اَنجام بَدایم.» 21 عیسی محبتی نَه اَ مِردی دَیشتَه و اَیی نَه واتِشه: «اِشتِه کارون کا فقط ایی چی کم داری؛ بِش و هَر چیی که هِستِرَه بِخرَش و چَیی پولی آدَه فُقَرا تا آسِمونی کا گنج بِداری. دومله بِری و بَه مِن کا پِیرَوی بِکَه.» 22 اَ مِرد اِم گَفی کا دیلسَرد آبَه و غمگین اوآنَه شَه، چوم وِر ثروتِش اِستبَه. 23 عیسی دور و بَری دَیشتَه، اِشتَن شاگِردون نَه واتِشه: «چِه چَتینَه ثروتمَندِن دَشون خِدا پاُتشایی دیلَه!» 24 شاگِردِن عیسی گفون کا تعجب کَردِشونَه. امّا عیسی هَنی اَوون نَه واتِشه: «اِی خِردَنِن، خِدا پاُتشایی دیلَه دَشییِه چِه چَتینَه! 25 دَوَه دَوییَردِه دَرزِنی خِلَه کا راحتتَره تا اِم که ایلَه ثیروتمندَه آدَم دَشو خِدا پاُتشایی دیلَه.» 26 شاگِردِن که وِر مات آبَه بینَه، عیسی نَه واتِشونَه: «بَس کی بَشای نجات پیدا بِکَرِه؟» 27 عیسی اَوون دَیشتَه و واتِشه: «اِم کار اِنسانی را غیر ممکنَه، امّا خِدا را اِنتَه نییَه؛ چوم خِدا را همه چی مُمکِنه.» 28 اَ موقع پطرس دَمَندَه گف ژَندِه و عیسی نَه واتِشه: «دَیِس، اَمَه همه چی وِل آکَردَمونَه اومَیمونَه اِشتِه دومله.» 29 عیسی واتِشه: «حقیقتن شِمَه نَه بَواتیم، کسی نییَه که چِمِن واسی و اِنجیلی واسی، اِشتَن کَ یا بِرا اون یا خالا اون یا نَنه یا دَده یا خِردَنِن یا اِشتَن مِلک اَملاکی وِل آکَردَش بِبو، 30 و اِم دنیا کا صد برابر وِرتَر، کَ اون، بِرا اون، خالا اون، نَنه اون، خِردَنون، مِلک و اَملاک و چَیی همراه، اَذیت آزارون- بِه دَس مَوَرِه، و اَ دنیا کا نی اَبَدی یَه زِندگی چَیی نصیب مَبو. 31 امّا وِر کَسِن که اوّلین اِستینه آخِرین بَبین، و آخِرینِن اوّلین بَبین!» عیسی سومّین پیشگویی اِشتَنِش مرگ و زِندَه آبییِه درباره 32 اَوِن اورشلیمی راه کا بینَه و عیسی چَوون نارنارِه راه بَشی. شاگِردِن تعجبی کا بینَه و کَسونی که چَوون دومله بَشین، هَراسون بینَه. عیسی هَنی اَ دونزَه گِله شاگِردی بَردِشه کِناری را و اَ چیی که بَسی چَیی سَر با، دَمَندَه شاگِردون را واتِشه. 33 عیسی واتِشه: «دَیِسَه، بَشَیمون اورشلیمی را. اِنسانی زوعَه، سَران کاهِنون و توراتی معلمون تسلیم بَکَردین. و اَوِن اَیی مَحکوم بِه مَرگ بَکَردین. اَوِن اِنسانی زوعَه آدَن غیر یهودیون دَس. 34 اَوِن اَیی مسخره بَکَردین، چَیی دیمی کا چاف ویکَرِن و اَیی شلاق ژَنِن، کِشِن و سِه روز پَش اَ زِنده آبو.» یعقوب و یوحنا درخواست 35 زبدی زوعَه اِن یعقوب و یوحنا اومینَه عیسی وَر و واتِشونَه: «اُستاد، خواهیشت بَکَردیمون اَ چی که تِه کا پیستِمونَه، اَمَه را اَنجام بِدَی!» 36 عیسی اَوون نَه واتِشه: «چِه پیستِرونَه شِمَه را اَنجام بِدَم؟» 37 اَوِن واتِشونَه: «اِجازه بِده که اِشتِه جلالی کا، ایلَه اِشتِه راست طرفی کا و اَ ایلَه اِشتِه چپَ طرفی کا بِنِشَم.» 38 عیسی اَوون نَه واتِشه: «شِمَه نیمَزنَه چِه چی پیستِرونَه. مَگم بَشایرون اَ عذابَ قَدَره ای کا كه اَز هِنجِم، بِنجَه و اَ غسل تعمیدی که از بَگتیم، شِمَه بِگِرَه؟» 39 اَوِن واتِشونَه: «ها، بَشایمون.» عیسی واتِشه: «هَ قَدَره کا که از هِنجِم، شِمَه نی هِنجَه و هَ غسل تعمیدی که اَز بَگتیم، شِمَه نی بَگتیرون. 40 امّا چِمِن دَس نییَه که بوآجِم چِمِن راست دَسی کا و چپ دَسی کا کی بِنِشه. اِم جِگا اِن کسونی شِنَه که اَوون را آمادَه آبییَه.» 41 وختی اَ دَه گِله شاگِرد اِم ماجرا دَرَسِشونَه، یعقوب و یوحنا را بَرک عصبانی آبینَه. 42 عیسی اَوون دَخوندِشه اِشتَن وَر و واتِشه: «شِمَه بَزنیرون کسونی که دییَر قومون حاکِمِن بِه حساب بومَین، اَوون را حکمرانی بَکَردین و چَوون رَئیسِن اِشتَن دَسَ جیرون دَستور بَداین. 43 امّا شِمَه دیلَه کا اِنتَه مَبو. بَلکَم هَر کسی که پیستِشَه شِمَه دیلَه کا یال بِبو، بَسی شِمَه نوکَر بِبو. 44 و هَر کسی پیستِشَه شِمَه دیلَه کا اوّل بِبو، بَسی گِردی غلام بِبو. 45 چوم حتی اِنسانی زوعَه نی اومَه نییَه تا اَیی خدمت بِکَرِن، بَلكَم اومَه تا خدمت بِکَرِه و اِشتَن جانی وِر کَسون آزادی را فیدا بِکَرِه.» عیسی، کورَه بارتیمائوسی شفا بَدای 46 اَوِن اومینَه اَریحا شهری را. هَتَه که عیسی اِشتَن شاگِردون نَه و وِرَه جماعتی نَه اَریحا شهری نَه کارا بَشی بِرون، ایلَه کورَه گدایی راه کَناری کا نِشت بَه. اَ کورَه گدا نوم بارتیمائوس بَه که تیمائوسی زوعَه بَه. 47 وختی بارتیمائوس دَرَسِشَه عیسای ناصری یَه که کارا دَوییَرِه، دَمَندَه خِلِع ژَندِشَه که: «اِی عیسی، داوود پاُتشا زوعَه، بَه مِن رَحم بِکَه!» 48 وِر کَسِن اَیی را زِرَه گِتِشونَه و بَواتین که ساکیت آبو، امّا اَ وِرتر خِلِع بَکَردی، بَواتی: «اِی داوود پاُتشا زوعَه، بَه مِن رَحم بِکَه!» 49 عیسی مَنده و واتِشه: «اَئی دَخونَه.» اَوِن، اَ کوره مِردی دَخوندِشونَه، اَیی نَه واتِشونَه: «اِشتِه دیل قُرص بِبو! پِرِز، تِه دَخونِه.» 50 بارتیمائوس اِشتَن اَبا فِر آدوشَه کَناری را، اِشتَن جِگا کا وَشتَه و اومَه عیسی وَر. 51 عیسی اَیی کا دَفَرسِشَه: «چِه پیستِرَه بَه تِرا اَنجام بِدَم؟» اَ کورَه مِرد جَواو دوشَه: «اُستاد، پیستِمَه چِمِن، چِمِن هَنی بِوینِن.» 52 عیسی اَیی نَه واتِشه: «بِش که اِشتِه ایمان تِه شفا دوعَشَه.» اَلبَحَل اَ مِردی چِمِن هَنی سو اومینَه و عیسی دومله راه دَلَکه. |
@ 2024 Korpu Company