مَتّی 9 - کتاب مقدس به زبان تالشی شمالیاِفلیجه مِردی شَفا 1 عیسی لوتکا دَنِشته و شَه دریاچه اَ طرف، اِشتَن شهری را. 2 چَن نفر ایلَه اِفلیجه مِردی که اِشتَن دوشَکی سَری کا خِتبَه، وَردِشونَه عیسی وَر. عیسی وختی چَوون ایمانی ویندِشَه، اَ اِفلیجه مِردی نَه واتِشه: «چِمِن زوعَه، اِشتِه دیل قُرص بِبو، اِشتِه گناه اِن بَخشِسته بینَه!» 3 اِم موقع بعضی توراتی معلمن اِشتَن نَه واتِشونَه: «اِم مِرد کُفر بَواتی.» 4 ولی عیسی که چَوون فیکری بَزنی، واتِشه: «چیرا شِمَه دیلی کا اِم بَدَه فیکرون بَکَردیرون؟ 5 کَمیله گَفی واتِه راحتتَرَه: ”اِشتِه گناه اِن بَخشِستَه بینَه،“ یا اِم که”پِرِز و راه بِش“؟ 6 امّا اِمی واسی که بِزونَه اِنسانی زوعَه، زمینی کا اِختیارِش اِستَه گناه اون بِبَخشه.» - اَ اِفلیجی نَه واتِشه: -«پِرِز، اِشتِه دوشَکی پِگِه و بِش کَ!» 7 اَ مِرد پِرِشتَه و شَه کَ. 8 وختی مردم اِم اِتِفاقی ویندِشونَه تَرسینَه و خِدا سِتایش کَردِشونَه که اِنتَه رَه اِختیاری آدوعَشه اِنسانون. عیسی، مَتّی دعوت بَکَردی 9 وختی عیسی اوآ نَه کارا دَوییَری، ایلَه مِردی ویندِشه كه چَیی نوم مَتّی بَه و باج ویگِتَه دَکَه کا نِشت بَه. عیسی، مَتّی نَه واتِشه: «چِمِن دومله بِری!» مَتّی پِرِشتَه و عیسی دومله شَه. 10 موقعی که عیسی، مَتّی کَ کا، سِفره سَری کا نِشت بَه، وِرَه باجگیرِن و گناه کارِن اومینَه و عیسی و چَیی شاگِردون نَه همسِفره بینَه. 11 وختی فریسیون فِرقه عُلما اِمی ویندِشونَه عیسی شاگِردون نَه واتِشونَه: «چیرا شِمَه اُستاد باجگیرون و گناه کارون نَه غذا بَردی؟» 12 ولی وختی عیسی اِم گفی دَرَسِشَه، واتِشه: «مریضِن طَبیب پیستِشونَه، نِه سالِمِن. 13 بِشَه و اِم نیویشتَه مَعنی درک بِکَرَه که: ”چِمِن دیلی پیستَه رَحمتَه، نِه قِربونی.“ چوم اَز اومَیمَه گناه کارون دعوت بِکَرِم توبَه بِکَرِن نِه کسونی که صالِحی نَه.» سوال روزه گِتِه درباره 14 اَ موقع یحیی شاگِردِن اومینَه عیسی وَر و دَفَرسِشونَه: «چیرا اَمَه و فریسییِن روزه گِرَم امّا اِشتِه شاگِردِن روزه نِگِرِن؟» 15 عیسی جَواو دوشَه: «مَگم بَبی که عروسی میهمونِن تا وختی که زِما اَوون نَه یَه، عَزاداری بِکَرِن؟ امّا روزونی بومَی که زِما اَوون کا ویگِرِن، اَ موقع اَوِن نی روزه گِرِن. 16 هیچ کس تازه پارچه ای که آو دَشَه نییَه، ایلَه کَنَه خَلا نَه پینَه نِژَنِه، چوم پینَه، خَلا کا کَندَه بَبی و خَلا بَدتر پِزِریستَه بَبی. 17 هِنتَه نی تازه شَراوی کَنَه مَشکون کا نِدَکَرِن، اَگم اِم کاری بِکَرِن چوم تازه شَراو حَلا گازِش اِستَه، مَشکِن پِزِرِن، شَراو ویبو و مَشکِن اَز بِین بَشین. بَلکَم تازه شَراوی تازه مَشکون کا دَکَرِن که هَم شَراو و هَم مَشک سالِم بومونِن.» ایلَه کِلَه زِندَه آبییِه و ایلَه ژِنی شفا دوعِه 18 هَتَه که عیسی حَلا اِم گفون اَوون نَه بَواتی عبادتگاه ایلَه رَئیسون کا اومَه چَیی وَر و زِنگ ژَندِشَه و واتِشه: «چِمِن کِلَه حِسَه مَردَه. با اِم حال تِه بِری و اِشتِه دَسی اَیی کا پِنَه که اَ زِندَه آبو.» 19 عیسی پِرِشتَه و اِشتَن شاگِردون هَمراه، اَیی نَه شَه. 20 هِم موقع، ایلَه ژِنی كه دونزَه سال خونریزیش اِستبَه عیسی پِشتی نَه اومَه و چَیی اَبا پَره دَس آسوشَه، 21 چوم که اَ ژِن اِشتَن نَه بَواتی: «اَگم فقط چَیی اَبا دَس آسام، شفا بَگتیم.» 22 عیسی آگَردِستَه و اَیی ویندِشَه و واتِشه: «اِی کِلَه، اِشتِه دیل قُرص بِبو. اِشتِه ایمان، تِه شفا دوعَشَه.» هَ لحظه اَ ژِن شفا گِتِشه. 23 وختی که عیسی دَشَه اَ رئیسی کَ دیلَه و نوحه خونون و مردمی ویندِشَه که شیون بَکَردین، 24 واتِشه: «بِشَه بِرون. چوم اِم کِلَه مَردَه نییَه بَلكَم خِتَه.» امّا اَوِن عیسی را خورستینَه. 25 وختی عیسی جماعتی بَرکَردِشه، شَه دیلَه، کِلَه دَسی گِتِشَه و کِلَه پِرِشتَه. 26 اِم اِتِفاقی خَوَر گِردِه اَ منطقه کا دَپیچِستَه. دِ گِلَه کور و ایلَه لالی شَفا 27 وختی که عیسی اوآنَه دَوییَری، دِ گِلَه کورَه مِرد چَیی دومله شینَه و خِلِع بَکَردین: «اِی داوود پاُتشا زوعَه، بَمون رَحم بِکَه!» 28 وختی عیسی دَشَه کَ دیلَه، اَ دِ گِله مِرد اومینَه چَیی وَر. عیسی اَوون کا دَفَرسِشه: «ایمان هِستِرونَه که اَز بَشایم اِم کاری اَنجام بِدَم؟» اَوِن واتِشونَه: «ها، اِی آقا!» 29 دومله عیسی چَوون چِمون دَس آسوشَه واتِشه: «مطابق شِمَه ایمان شِمَه را اَنجام بِبو.» 30 هَ موقع چَوون چِمِن آبینَه. عیسی اَوون قَدَغَن کَردِشَه و واتِشه: «ویرا بِبییَه کسی اِم موضوع کا خَوَر دار مَبو.» 31 امّا اَوِن بَرشینَه، و گِرد اَ منطقه کا اِم ماجرا واتِشونَه. عیسی ایلَه لال مِردی شفا بَدای 32 وختی که اَوِن کارا بَشین بِرون، ایلَه دیو گِتَه مِردی که لال بَه، وَردِشونَه عیسی وَر. 33 وختی عیسی دیوی اَیی کا بَرکَردِشه، اَ لالَ مِردی زَوون آبَه. مردم تعجب کَردِشونَه و واتِشونَه: «اِنتَه رَه چیی هَرگز اِسرائیلیون دیلَه کا ویندَه مون نییَه.» 34 امّا فریسییِن واتِشونَه: «عیسی، دیوون رَئیسی کمَکی نَه، دیوون بَرکَرِه.» 35 عیسی گِرد شهرون و دِه اون کا بَگردِستی، چَوون عِبادتگاه اون کا تعلیم بَدای و خِدا پاُتشایی شاد خَوَری اِعلام بَکَردی و هَر درد و مرضی شفا بَدای. 36 وختی عیسی، اَ جَماعتی ویندِشَه، دیلِش اَوون را سیستَه چوم اَوِن گوسَندونی شیوار که شوونَه نیشونَه، پریشون و درمانده بینَه. 37 بَس اِشتَن شاگِردون نَه واتِشه: «مَحصول وِرَه، امّا کاریگَر کَمَه. 38 بَس، مَحصولی صاحیبی کا بِپییَه اِشتَن مَحصولی جمع آکَردِه را کاریگرون ویسا آکَرِه.» |
@ 2024 Korpu Company