مَتّی 28 - کتاب مقدس به زبان تالشی شمالیعیسی زِندَه آبییِه 1 ایی روز یهودیون مقدّس شنبه پَش، که هفته اوّلین روز بَه، صِبی سَر، مریم مَجدَلیّه و اَ ایلَه مریم شینَه که مَقبره بِوینِن. 2 ایی دفعه بَرکَ زلزِلَه ای اومَه، چوم خِداوندی ایلَه ملائیکه آسِمونی کا نازل بَه، شَه مَقبره طرف و اَ سِنگی که مَقبره دَهَنه پوشوندَش بَه ژَندِشَه کَنار و هَ سِنگی سَری کا نِشتَه. 3 اَ ملائیکه دیم آسِمونی برقی شیوار شَفق ژَنی و چَیی خَلا، وَری شیوار اِسبی بَه. 4 وختی نگهبانِن اَیی ویندِشونَه، تَرسی کا لَرزی نَه و مَرده اون شیوار بینَه. 5 امّا اَ مَلائیکه ژِنَکون نَه واتِشه: «مَتَرسه! چوم بَزنیم كه شِمَه عیسایی دومله گَردَه که صلیبی سَری کا کِشتَه بییَه. 6 اَ اییا کا نییَه، چوم هَتَه که واتَش بَه، زِنده آبییَه! بایَه و جِگایی كه عیسی جنازه نوعَشون بَه دَیِسَه، 7 دومله اَلبَحَل بِشَه و چَیی شاگِردون نَه بوآجَه كه عیسی مَرده اون دیلَه کا زِنده آبییَه. اَ شِمَه کا پیشتَر بَشی جلیلی ولایت و شِمَه اَئی اوآکا بَویندیرون. دَیِسَه شِمَه نَه واتِمَه!» 8 بَس ژِنَکِن ترس و بَرکَ شادی نَه اَلبَحَل مَقبره کا بَرشینَه و ویریتینَه شینَه اِم خَوَری شاگِردون نَه بوآجِن. 9 ایی دفعه عیسی اَوون نَه دیمادیس بَه و واتِشه: «سلام بَر شِمَه!» ژِنَکِن نار اومینَه و چَیی پا دَلَکَینه، اَیی پرستش کَردِشونَه. 10 اَ موقع عیسی اَوون نَه واتِشه: «مَتَرسَه! بِشَه و چِمِن بِرا اون نَه بوآجَه که بِشون جلیلی ولایتی را. اوآ کا مِن بَویندین.» نگهبانون گزارش 11 وختی که ژِنَکِن راه کا بینَه، چَن گِله اَ نگهبانِن شینَه شهر و گِرد اِم اِتِفاقون، سَران کاهِنون را واتِشونَه. 12 سَران کاهِنِن بعد از اِم که شیخون نَه جمع آبینَه و مَشورت کَردِشونَه، وِرَه پولی آدوشونَه سَربازون، 13 و واتِشونَه: «مردمی نَه بوآجَه که، ”چَیی شاگِردِن شَوونَه اومینَه و وختی اَمَه خِت بیمونَه، چَیی جَنازه دِزدیشونَه.“ 14 اَگم اِم خَوَر فرمانداری گوش آرَستِه، اَمَه اِشتَن اَیی راضی آکَرَم و نییَرزَم شِمَه را دردسری بِبو.» 15 بَس نگهبانِن پولی ویگِتِشونَه و هَ کاری که اَوون نَه واتَه بییَه بَه اَنجام دوشونَه. تا اوری نَه روز نی یَهودییِن اِم ماجرا بَواتین. یالَ مأموریت 16 عیسی یازده گِله شاگِردِن شینَه جلیلی ولایتی را، هَ كوهی سَر که عیسی اَوون نَه واتَش بَه. 17 وختی اَوِن عیسی ویندِشونَه، اَئی پرستش کَردِشونَه. ولی بعضی اِن شَک کَردِشونَه. 18 اَ موقع عیسی نار اومَه اَوون نَه واتِشه: «گِردِ قدرت، آسِمون و زمینی کا بَه مِن آدوعَه بییَه. 19 بَس بِشَه و گِردِ میلَّتون چِمِن شاگِرد بِکَرَه و اَوون دَده نومی نَه، زوعَه نومی نَه و رو‌ح القدسی نومی نَه غُسل تعمید بِدییَه، 20 و اَوون تعلیم بِدییَه که هَر چیی که شِمَه فرمان دوعَمَه، اَنجام بِدَن. دَیِسَه، اَز تا آخِر زمان، هَمش شِمَه هَمراه ایمَه!» |
@ 2024 Korpu Company