انجیل لوقا 9 - کتاب مقدس به زبان تالشی شمالیدونزَه گِله حَواری مأموریت 1 عیسی اِشتَن دونزَه گِله شاگِردی دَخوندِشه اِشتَن وَر و اَوون قدرت و اِختیار آدوشَه که گِردِ دیوون مردمی کا بَرکَرِن و درد و مَرضون شفا بِدَن؛ 2 و اَوون ویسا آکَردِشه تا خِدا پاُتشایی اِعلام بِکَرن و مریضون شَفا بِدَن. 3 اَوون نَه واتِشه: «سَفری را هیچ چیی مَپِگِره، نِه دَسه چو، نِه کوله بار، نِه نون، نِه پول و نِه اِضافه شِیی. 4 هَر کَ ایی دیلَه دَشیرونَه، تا وختی اَ مَله کا ایرونَه، اَ کَ کا بومونَه. 5 هَر جِگایی که مردم شِمَه قبول نِکَردِشونَه، وختی چَوون شهری کا بَشیرون، اوآ خاکی شِمَه پا کا تَکان بِدییَه تا چَوون ضِد ایلَه شهادتی بِبو.» 6 بَس اَوِن راه دَلَکینه، دِه به دِه گردین و گِرد جِگاکا، خِدا پاُتشایی خوشَ خَوَری اِعلام بَکَردین و مریضون شَفا بَداین. 7 گِرد اِم اِتِفاقون خَوَر هیرودیسِ حاکمی گوش آرَستَه. هیرودیس حَیرون و سَرگردون بَه، چوم بعضی بَواتین عیسی هَ یحیی یَه که مَردَه پَش زِنده آبَه. 8 بعضی بَواتین که ایلیای پیغمبر ظهور کَردَشه، و بعضی نی بَواتین ایلَه قَدیمی یَه پیغمبرون کا زِنده آبَه. 9 هیرودیسِ حاکِم واتِشه: «اَز اِشتَن دَستور دوعَمه یحیی سَر آبِرِن؛ بَس اِم کییَه که چَیی درباره اِم چییون دَرَسِم؟» و تَقَّلا بَکَردی که عیسی بِوینی. پینج هَزار نفری غَذا دوعِه 10 وختی حَواریون آگَردِستینَه، هَر کاری که کَردَشون بَه، عیسی را واتِشونَه. عیسی اَوون اِشتَن نَه بَردِشه ایلَه شهری را که چَیی نوم بِیت‌صِیدا بَه تا اوآکا تنخا بِبون. 11 وختی مردم خَوَر دار بینَه، چَوون دومله راه دَلَکینَه. عیسی نی اَوون قبول کَردِشه و چَوون را خِدا پاُتشایی درباره گَف ژَندِشَه و کسونی که شَفا نیاز دارین، شَفا دوشَه. 12 مَغریب دَم، اَ دونزَه گِله شاگِرد اومینَه عیسی وَر و واتِشونَه: «اِم جماعتی ویسا آکَه که دور و اَطرافی دِه و مزرعه اون را بِشون و اِشتَه را سَرپناه و غذا بِتلَفِن، چوم که اییا دور افتاده جِگایی یَه.» 13 امّا عیسی اَوون نَه واتِشه: «شِمَه اِشتَن اَوون غَذا آدییَه که بَرِن.» شاگِردِن واتِشونَه: «اَمَه پینج گِله نون و دِ گِله مایی غِیراز چیی نیمونه، مَگم اِم کِه بِشَم و اِم جَماعتی گِردی را غذا ویگِرَم.» 14 اوآکا تقریبا پینج هَزار گِله مِرد مَند بینَه. عیسی، اِشتَن شاگِردون نَه واتِشه: «مردمی پینجا نفری یَه دَسته اون کا بِنِشونَه.» 15 شاگِردِن اِم کاری کَردِشونَه و گِردی نِشوندِشونَه. 16 عیسی پینج گِله نون و دِ گِله مایی پِگِتِشه، آسِمونی دَیشتَه، خِدا شُكر کَردِشه. دومله نونون پَله كَردِشه و آدوشَه شاگِردون که جماعتی ناری کا بِنَن. 17 بَس گِرد هَردِشونَه و سیر آبینَه و اَ نون و مایی تیکه خورده اون کا که مَندَه بَه، دونزَه گِله سَبد جمع آکَردِشونَه. پطرسی شهادتی عیسی درباره 18 ایی روز عیسی تنخا دعا بَکَردی و فقط شاگِردِن چَیی همراه بینَه. عیسی اَوون کا دَفَرسِشه: «مردم بَواتین اَز کیی ایمَه؟» 19 شاگِردِن جَواو دوشونَه: «بعضی بَواتین تِه یحیی تعمید دَهَنده ایش، بعضی نی بَواتین تِه ایلیای پیغمبریش و بعضی نی بَواتین که ایلَه قَدیمی یَه پیغمبرون کا ایش که زِنده آبَه.» 20 عیسی اَوون کا دَفَرسِشه: «ولی شِمَه چِه بَواتیرون اَز کیی ایمَه؟» پطرس جَواو دوشَه: «تِه خِدا وعدَه دوعَه مسیح ایشه.» 21 دومله عیسی اَوون قَدغَن کَردِشه و دَستور دوشَه که اِمی کَسی را مَواجِن، 22 و واتِشه: «لازِمه که اِنسانی زوعَه بَرکَ رَنج و عذابی بِکَشه و شیخِن، سَران کاهنِن و توراتی معلِمِن اَیی رَد آکَرِن و اَ کِشته بِبو و سوّمین روزی کا زِنده آبو.» 23 عیسی گِردی نَه واتِشه: «اَگم کسی پیستِشَه چِمِن پیرو بِبو، بَسی اِشتَن کا دَس پِگِرِه و هَر روز اِشتَن عذاب و مرگی صلیبی پِگِره و چِمِن دومله با. 24 چوم هَر کسی پیستِشَه اِشتَن جانی نجات بِدَه، اَیی اَز دَس بَدای؛ امّا هَر کسی چِمِن واسی اِشتَن جانی از دَس بِدَه اَیی نجات بَدای. 25 آدَمی را چِه فایده هِستِشه که گِرد دنیا بِدارِه، امّا اِشتَن جانی اَز دَس بِدَه یا اَیی آسیب بِژنَه؟ 26 چوم هَر کسی که مِن کا و چِمِن گفون کا عار بِدارِه، اِنسانی زوعَه نی وختی اِشتَن جلال و آسِمونی یَه دَده جلال و مقدّس مَلائیکه اون نَه با، اَیی کا عار دارِه. 27 ولی حقیقتن شِمَه نَه بَواتیم، بعضی اِن اییا کا مَندینَه که تا خِدا پاُتشایی مَوینِن، نِمِرِن.» شاگِردن عیسی جلالی بَویندین 28 تقریبا هشت روز اِم گَفون پَش، عیسی، پطرس، یوحنا و یعقوبی پِگِتشه و دعا کَردِه را شَه ایلَه کوهی کفا. 29 هَتَه که دعا بَکَردی، چَیی دیمی نومود تغییر کَردِشه و چَیی خَلا جوری ایسبی آبَه که شَفق ژَندِشَه. 30 دِ گِله مِرد عیسی نَه کارا گف ژَنین. اَ دِ نفر موسی پیغمبر و ایلیای پیغمبر بینَه. 31 اَوِن شکوه و جلالی نَه ظاهر آبینَه و عیسی مَردِه درباره کارا گف ژَنین، یعنی اَ چیی که بَسی اورشلیمی شهری کا هِم زودیون اِتِفاق دَلَکه. 32 پطرس و چَیی هَمراه اِن وِر خاو آلو بینَه، امّا وختی که خاو چَوون سَری کا پَریستَه، عیسی جلالی و اَ دِ گِله مِردی که چَیی وَری کا مَند بینَه، ویندِشونَه. 33 وختی که اَ دِ نفر عیسی وَری نَه بَشین، پطرس بی اِم که بِزونِه چِه بَواتی عیسی نَه واتِشه: «اُستاد، چِه چاکَ اَمَه اییاکا ایمونَه! بِدا سِه گِله سایَه وون وَج آکَرَم، ایلَه تِرا، ایلَه موسی را، ایلَه نی ایلیا را.» 34 پِطرسی گَف حَلا تمون آبَه نِبَه که ایلَه خِر اومَه و چَوون سَری کا سا دَرَفَندِشه. وختی اَوِن دَشین خِری دیلَه، شاگِردن تَرسی نَه. 35 اَ موقع خِری کا سَسی اومَه که بَواتی: «اِم چِمِن زوعَه یَه که از اَیی اِنتخاب کَردَمَه؛ چَیی گفون گوش بِدییَه.» 36 وختی اَ سَس قطع آبَه، اَوِن عیسی تَنخا ویندِشونَه. شاگِردِن اِم ماجرا اِشتَن دیلی کا غم هَردِشونَه، و اَ روزون کا کسی نَه نِواتِشونَه که چِه ویندَشونَه. تور و دیوونه زوعَه شَفا 37 صَبایی نَه روز، وختی کوه کا بومَین جیر، وِرَه جماعتی اومینَه عیسی پیشواز. 38 ایی دفعه ایلَه مِردی جماعتی دیلَه کا خِلِع ژَندِشَه، واتِشه: «اُستاد، تِه مِنَّت بَکَردیم چِمِن زوعَه که چِمِن تَنخا خِردَنَه نظر دَرَفَنی. 39 ایلَه روح اَیی گِرِه و اَ ایی دفعه نارَه کَشِه، اِنتَه تَشنج دَلَکه که، چَیی گَ کَف بَکَردی. روح اَیی مجروح بَکَردی و بَرک سَختی نَه اَیی وِل آکَرِه. 40 اِشتِه شاگِردون مِنَّت کَردِمَه که اَ روح چِمِن زوعَه کا بَرکَرِن، امّا نِشاستِشونَه.» 41 عیسی جَواو دوشَه: «اِی بی ایمان و منحرف نسل، تا کَینی بَسی شِمَه نَه بِبوم و شِمَه تاو بواَرم؟ اِشتِه زوعَه بوعَه اییا.» 42 هَتَه که اَ زوعَه بومَی، دیو اَیی زَمین ژَندِشَه و تَشنج دَرفَندِشه. امّا عیسی اَ پَلیده روح را زِرَه گِتِشه و اَ زوعَه شَفا دوشَه و اَیی آگاردِنیشه چَیی دَده. 43 مردم گِرد خِدا یال بییِه کا مات بینَه. هِنتَه که گِردِ مردم عیسی کارون کا حَیرون مَند بینَه، عیسی اِشتَن شاگِردون نَه واتِشه: 44 «چِمِن اِم گَفون دقّتی نَه گوش آکَرَه: اِنسانی زوعَه، مردمی دَسی نَه تسلیم بَبی.» 45 امّا اَوِن عیسی منظوری نِزونیشونَه؛ بَلکَم اَوون کا نِین مَندَه تا دَرک مَکَرِن؛ و تَرسین اِم گفی درباره، عیسی کا سوالی دَفَرسِن. کی گِردی کا یالتَره؟ 46 شاگِردون دیلَه کا بحث دَلَکَه که چَوون دیلَه کا کَمیله گِردی کا یالتَرَه. 47 امّا عیسی که چَوون فیکری بَزنی، ایلَه خِردَنی پِگِتشه و اِشتَن کناری کا نوشه، 48 و اَوون نَه واتِشه: «هَر کسی اِم خِردَنی چِمِن نومی نَه قَبول بِکَرِه، مِن قَبول کَردَشه؛ و هَر کسی مِن قَبول بِکَرِه؛ اَ کسی قَبول بَکَردی که مِن ویسا آکَردَشَه. چوم شِمَه دیلَه کا اَ کسی یالتَرَه که گِردی کا روکتَر بِبو.» 49 یوحنا واتِشه: «اُستاد، اَمَه شخصی ویندِمونَه که اِشتِه نومی وَردِه نَه دیوون، آدَمون کا بَرکَری، تَقَّلا کَردِمونَه چَیی پیشی بِگِرَم چوم که اَ اَمَه کا نِبَه.» 50 ولی عیسی واتِشه: «چَیی پیشی مَگِرَه، چوم هَر کسی شِمَه ضِد مَبو شِمَه نَه یَه.» سامِره دِه اَهالی نامیهرَوونی 51 وختی اَ موقعی نِزدیک آبَه که عیسی بَردَه بِبو آسِمونی را، عیسی راه دَلَکه اورشَلیمی طَرفی را. 52 عیسی اِشتَن نارنارِه قاصِدونی ویسا آکَردِشه. اَ قاصِدِن راه دَلَکینَه شینَه سامِره ایلَه دِه اون را تا عیسی را تَدارک بِوینن. 53 امّا اَ دِه مردم اَیی قبول نِکَردِشونَه، چوم عیسی کارا بَشی اورشلیم. 54 وختی چَیی شاگِردِن، یعقوب و یوحنا، اِم ماجرا ویندِشونَه، واتِشونَه: «آقا، پیستِرَه بوآجَم آسِمونی نَه آتش بِوارِه و اَوون گِردی نابود بِکَرِه، هَتَه که ایلیا کَردِشه؟» 55 امّا عیسی آگَردِستَه و اَوون را زِرَه گِتِشه و واتِشه:« شِمَه نیمَزنَه کَمیله روح کا ایرونَه! 56 چوم اِنسانی زوعَه اومَه نییَه تا مردمی جانی هلاک بِکَرِه بَلکَم اومَه تا نجات بِدَه.» دومله اَوِن شینَه ایلَه دییَر دِهی را. عیسی کا پیروی کَردِه بَها 57 هَتَه که کارا بشین راه دیله کا ایی نفر عیسی نَه واتِشه: «هَر جِگا بِشی اَز اِشتِه دومله بومَیم.» 58 عیسی جَواو دوشَه: «رِباطِن لونَه هِستِشونَه و پَرَنده اِن خومَه هِستِشونَه، امّا اِنسانی زوعَه سَر پنوعِه را جِگایی نیشَه.» 59 عیسی ایی نفر دییَری نَه واتِشه: «چِمِن دومله بِری.» امّا اَ شخص جَواو دوشَه: «آقا، اوّل بِدا اَز بِشوم تا موقعی که چِمِن دَده مَردَه، اَیی دَفن بِکَرِم، دومله بومَیم.» 60 عیسی جَواو دوشَه: «بِدا مَرده اِن، اِشتَن مَرده اون دَفن بِکَرِن؛ تِه بِش و خِدا پاُتشایی اِعلام بِکَه.» 61 ایی نفر دییَر واتِشه: «آقا، از اِشتِه دومله بومَیم، امّا اِجازه بِدَه اوّل چِمِن خانواده نَه وِداع بِکَرِم.» 62 عیسی اَیی نَه واتِشه: «کَسی که شوم ژَندِه شروع بَکَرِه و آگَردِه اِشتَن پِشتی دَیِسه، خِدا پاُتشایی لایِق نییَه.» |
@ 2024 Korpu Company