انجیل لوقا 8 - کتاب مقدس به زبان تالشی شمالی

کَشاوَرزی مَثَّل

¹ دومله، عیسی شَهر بِه شَهر و دِه بِه دِه گَردی و خِدا پاُتشایی خوشَ خَوَری اِعلام بَکَردی. اَ دونزَه گِله شاگِرد نی اَیی نَه بینَه،

² چِن گِله ژِن که پَلیده روح اون و مریضییون کا شَفا گِتَشون بَه نی عیسی همراه بینَه. مریم که اَیی نَه مَجدَلیه بَواتین و بَیی کا هف گِله دیو بِرون اومَه بَه،

³ خوزا ژِن یوآنّا، خوزا هیرودیسِ حاکِمی مِتِر بَه، سوسن و وِر ژِنکون دییَر. اِم ژِنَکِن اِشتَن مال و اَموالی کا عیسی و چَیی شاگِردون را تدارک بَویندین.

⁴ وختی وِرَه جماعتی جمع آبَه بینَه و مردم وِرَه شهرون کا عیسی ویندِه را اومینَه، عیسی اِم مَثَّلی ژَندِشَه واتِشه:

⁵ «ایی روز ایلَه کَشاوَرز دونه پِشَنده را شَه مزرعه. وختی دونه پِشونی، بعضی گِله دونه اِن راه کا ویبینَه و پا جیرون کا مَندینَه و پرنده اِن اَوون هَردِشونَه.

⁶ بعضی گِله دونه اِن سِنگی یَه زمینی کا ویبینَه، وختی پِرَسی نَه خِشک آبینَه، چوم زمین رطوبَتِش نِبَه.

⁷ بعضی گِله دونه اِن نی بِرّون دیلَه کا ویبینَه و بِرِّن نی اَوون نَه پِرَسینه و تومون خَفه کَردِشونَه.

⁸ امّا بعضی دونه اِن چاکَ خاکی کا ویبینَه و پِرَسینه و صَد برابر بار وَردِشونَه.» وختی عیسی اِم گفون واتِشه، بِلَنده سَسی نه واتِشه: «هَر کسی دَرَسَه گوش هِستِشه، دَرَسِه!»

⁹ وختی عیسی شاگِردن اِم مَثَّلی معنی اَیی کا دَفَرسِشونَه،

¹⁰ عیسی واتِشه: «خِدا پاُتشایی سِرّون دَرک کَردِه شِمَه آدوعَه بییَه، امّا خَلکی نَه مَثَّلون نَه گَف ژَنِم، تا: «”دَیسِن امّا چیی مَوینِن؛ دَرَسِن امّا چیی مَفَهمِن.“

¹¹ «اِم مَثَّلی مَعنی اِمَه: دونه، خِدا کلامَه.

¹² دونه اِنی که راه کا ویبینَه، کَسونی اِستینَه که خِدا کلامی دَرَسِن، امّا اِبلیس بومَی و کلامی چَوون دیلی کا دِزدِه، تا مَشان ایمان بواَرِن و نجات پیدا بِکَرِن.

¹³ دونه اِنی که سِنگی یَه زمینی کا ویبون کَسونی اِستینَه که وختی خِدا کلامی دَرَسِن، اَیی شادی نَه قبول بَکَردین، امّا اَوِن بِنَه نِژَنِن. اِمِن تِلی ایمان دارِن، امّا آزمایشون موقع، اِشتَن ایمانی اَز دَس بَداین.

¹⁴ دونه اِنی که بِرّون دیلَه کا ویبینَه، کَسونی اِستینَه که خِدا کلامی دَرَسِن، امّا هِنتَه که پیش بَشین، نِگرانی اِن، مال دنیا و زِندگی لَذّتِن کلامی چَوون دیلی کا خَفه بَکَردی و ثمر نِوَرِن.

¹⁵ امّا دونه اِنی که چاکَ خاکی کا ویبینَه کَسونی اِستینَه که خِدا کلامی دَرَسِن و صاف وصادقَه دیلی نَه محکم اَیی دَچیکِن و صَبری نَه ثمر بواَردین.

چِرا مَثَّل

¹⁶ «هیچکس چِرا روشون آنِکَرِه که چَیی سَری کا سَرپوش پِنَه یا اَیی بِنَه تَختی جیری کا! بَلکَم چِرا بَنای چِرا پوعَه سَری کا تا هر کسی که دَشو دیلَه، چَیی روشونی بِوینِه.

¹⁷ چوم هیچ سَرپوش پِنوعَه چیی نی که آشکار آمَبو و هیچ نِینَکی یَه چیی نی که معلوم و عَلَنی مَبو.

¹⁸ بَس ویرا بِبییَه که چِنتَه دَرَسَه؛ چوم کسی که هِستِشه بَیی وِرتَر آدوعَه بَبی، و اَ کسی که نیشَه حَتی اَ چیی نی که خَیال بَکَردی هِستِشه، اَیی کا ویگِتَه بَبی.»

عیسی نَنه و بِرا اِن

¹⁹ دومله عیسی نَنه و بِرا اِن اومینَه چَیی وَر، امّا جَماعت اِنتَه وِر بَه که نِشاستشونَه اَیی نِزدیک آبون.

²⁰ بَس عیسی را خَوَر وَردِشونَه که: «اِشتِه نَنه و بِرا اِن بِرونی کا مَندینَه و پیستِشونَه تِه بِوینن.»

²¹ ولی عیسی جَواو دوشَه: «چِمِن نَنه و بِرا اِن کسوِنی اِستینَه که خِدا کلامی دَرَسِن و اَیی اَنجام بَداین.»

عیسی دریا کِلاکی آروم آکَرِه

²² ایی روز، عیسی اِشتَن شاگِردون نَه ایلَه لوتکا دَنِشته و اَوون نَه واتِشه: «بِشَم دریاچه اَ طرفی را.» بَس اَوِن راه دَلَکینَه.

²³ هَتَه که کارا بَشین، عیسی خاو آشَه. ایی دفعه تِندَه وایی دریاچه کا وَزَه، اِنتَه که لوتکا آوی نَه پور آبَه و چَوون جان بَرکَ خطری کا دَلَکه.

²⁴ شاگِردن شینَه عیسی وَر و اَیی خاوی کا پِکَردِشونَه و واتِشونَه: «اُستاد، اُستاد، اَمَه کارا هلاک آبییَم!» عیسی پِرِشته و وا و کِلاکی نَه موجون را زِرَه گِتِشه. کِلاک آنِشته و گِرد جِگا آروم آبَه.

²⁵ عیسی اَوون نَه واتِشه: «شِمَه ایمان کییارَه؟» شاگِردِن تَرسَه بینَه و حَیرون بینَه و یَندی کا دَفَرسین: «اِم مِرد کییَه که حتی وا و آوی فَرمان بَدای و اَوِن اَیی کا اِطاعت بَکَردین؟»

ایلَه تور و دیوونه ای شفا

²⁶ دومله آرَستینَه جِراسیونی مَنطقه را که دریاچه اَ طرفی کا، جَلیلی ولایتی رو بَه رو کا بَه.

²⁷ هِنتَه که عیسی اِشتَن پا نوشه ساحِلی کا، ایلَه تور و دیوونه مِردی نَه دیمادیس بَه که اَ شهری شِن بَه. وِر وخت بَه که اَ مِرد نِه خَلا دَکَردَش بَه و نِه کَیی کا زندگی کَردَش بَه، بَلکَم قَبرستونی کا بَمَندی.

²⁸ هِنتَه که اَ مِرد، عیسی ویندِشه، خِلِع ژَندِشَه و چَیی پا دَلَکه بِلَنده سَسی نَه واتِشه: «اِی عیسی، خِدای مُتعالی زوعَه، تِه بَه مِنه چِه كارِر اِستَه؟ تِه مِنَّت بَکَردیم مِن عَذاب مَدَی!»

²⁹ چوم عیسی، اَ پَلیده روح فَرمان دوعَش بَه که اَ مِردی کا بِرون بَرا. اَ روح چِندی کَرَه اَیی ویخِتَش بَه، با اِم که چَیی دَس و پا زِنجیری نَه دَوَسین و اَیی کا نگهبونی بَداین، امّا هَر دفعه زِنجیرون پَله بَکَردی و اَ دیو اَیی وییاوونی را بَبَردی.

³⁰ عیسی اَیی کا دَفَرسِشه: «اِشتِه نوم چَه؟» جَواو دوشَه: «قُشون،» چوم که ایی کافله دیو دَشَه بینَه چَیی جانی دیلَه کا.

³¹ دیوِن عیسی مِنَت کَردِشونَه که اَوون دستور مَدَه بِشون جَهندَمی دیلَه.

³² اوآکا، ایلَه یالَه خوعَه رَمَه ای بَه که کوه کا، کارا غذا بَردین. دیوِن عیسی مِنَّت کَردِشونَه که اِجازه بِده دَشون خو اون دیلَه. بَس عیسی اَوون اِجازه دوشَه.

³³ دومله دیوِن اَ مِردی کا بِرون اومینَه و خو اون دیلَه دَشینَه، و اَ خوعَه رَمَه کوه سراجیری نَه هجوم بَردِشونَه دریاچه طَرف و آوی دیلَه کا غرق آبینَه.

³⁴ وختی خوعَه وونِن ویندِشونَه چِه اِتِفاقی دَلَکه، دَوشتینَه و شهر و دِه کا اِم ماجرا واتِشونَه.

³⁵ بَس مردم اومینَه بِرون که بِوینن چِه اِتِفاقی دَلَکه. وختی آرَستینَه عیسی وَر، اَ مِردی که دیوِن اَیی کا بَرشه بیینَه، ویندِشونَه که خَلا دَکَردَشه و عاقل نِشته عیسی پا وَری کا، اَوِن تَرسی نَه.

³⁶ کسونی که اِم ماجرا اِشتَن چِمی نَه ویندَشون بَه، اَوون را واتِشونَه که اَ تور و دیوونه مِرد چِنتَه شَفا گِتَشه.

³⁷ دومله جِراسیونی منطقه مردم گِرد، عیسی کا پیستِشونَه که چَوون وَری نَه بِشو، چوم بَرک تَرسَه بینَه. عیسی نی لوتکا دَنِشته و آگَردِستَه.

³⁸ مِردی که دیوِن اَیی کا بَرشه بینَه، عیسی مِنَّت کَردِشه که بِدارِه چَیی همراه بِبو، امّا عیسی اَیی رایی کَردِشه و واتِشه:

³⁹ «آگَرد اِشتِه کَ و اَ چیی که خِدا بَه تِرا کَردَشَه، بوآج.» اَ مِرد شَه و شهری اِم سَر تا اَ سری کا اِعلام کَردِشه که عیسی اَیی را چِه کَردَشه.

ایلَه ژِنی شَفا و یایِروسی کِلَه زِندَه آکَردِه

⁴⁰ وختی عیسی آگَردِستَه، جماعت اَیی کا اِستِقبال کَردِشونَه، چوم گِرد اَیی را چِم بِه راه بینَه.

⁴¹ اِم موقع، ایلَه مِردی که چَیی نوم یایروس بَه و یهودیون عبادتگاه رئیس بَه، اومَه. اَ، عیسی دَس و پا دَلَکه، مِنَّت كَردِشه بِشو چَیی کَ،

⁴² چوم چَیی ایلَه کِلَه که تَقریبا دونزَه ساله بَه، کارا مِریستِه. وختی که عیسی راه کا بَه، مردم هَر طَرفی نَه اَیی فِشار بواَردین.

⁴³ مردمی دیلَه کا، ایلَه ژِنی بَه که دونزَه سال بَه خونریزی داری. با اِم که اَ ژِن اِشتَن دارایی گِردی آدوعَش بَه طَبیبون، ولی هیچکس نشاستِشه اَیی علاج بِکَرِه.

⁴⁴ اِم ژِن عیسی پِشتی نَه اومَه و چَیی اَبا پَره دَس آسوشَه. اَلبَحَل چَیی خونریزی بَند اومَه.

⁴⁵ عیسی دَفَرسِشه: «کی مِن دَس ژَندِشَه؟» وختی گِرد هاشا کَردِشونَه، پطرس واتِشه: «اُستاد، مردم تِه دور آکَردَشونَه و تِه فِشار بواَردین!»

⁴⁶ امّا عیسی واتِشه: «ایی نفر مِن دَس ژَندِشَه! چوم زونِستِمَه قوّتی بَه مِن کا بَرشَه!»

⁴⁷ اَ ژِن وختی ویندِشه نیمَشا نِین بومونِه، تَرس و لَرزی نَه اومَه نار و عیسی پا دَلَکه و گِردِ مردمی پیشی کا اِعلام کَردِشه که چیرا اَیی دَس آسوعَشه و چِنتَه اَلبَحَل شَفا گِتَشه.

⁴⁸ عیسی اَیی نَه واتِشه: «کِلَه، اِشتِه ایمان، تِه شفا دوعَشَه؛ سلامتی نَه بِش.»

⁴⁹ عیسی حلا کارا گف ژَنی که عبادتگاه رئیسی کَ کا، ایی نفر اومَه و واتِشه: «اِشتِه کِلَه مَردَه، دِ اُستادی زحمت مَدَه.»

⁵⁰ امّا وختی عیسی اِمی دَرَسِشَه، یایروسی نَه واتِشه: «مَتَرس! فقط ایمان بِدا! اِشتِه کِلَه شفا بَگتی.»

⁵¹ وختی عیسی آرَستَه یایروسی کَ، اِجازه نِدوشَه که پطرس و یوحنا و یعقوب و اَ خِردَنی دَده نَنه غِیراز، کسی اَیی نَه دَشون دیلَه.

⁵² گِرد اَ کِلَه را داد و شیون بَکَردین. ولی عیسی واتِشه: «داد مَکَرَه، چوم کِلَه مَرده نییَه بَلکَم خِتَه.»

⁵³ اَوِن عیسی ریشخند کَردِشونَه، چوم که بَزنین اَ کِلَه مَردَه.

⁵⁴ امّا عیسی اَ کِلَه دَسی گِتِشه و واتِشه: «خِردَن، پِرِز!»

⁵⁵ اَ کِلَه روح آگَردِستَه و کِلَه اَلبَحَل اِشتَن جِگا کا پِرِشتَه. عیسی واتِشه که غذا آدَن اَ کِلَه تا بَرِه.

⁵⁶ اَ کِلَه، دَده نَنه مات و مبهوت بینَه، امّا عیسی اَوون قَدغَن کَردِشه که اِم اِتِفاقی کسی را مَواجِن.