انجیل لوقا 7 - کتاب مقدس به زبان تالشی شمالیرومی یَه نظامی ایمان 1 وختی که عیسی گِردِ اِشتَن گفون مردمی نَه واتِشه، شَه کَفَرناحومی شهری را. 2 اوآکا ایلَه رومی یَه اَفسری بَه که ایلَه نوکَری داری و اَییرا وِر عزیز بَه. اَ نوکَر مریض بَه و نِزدیک بَه بِمِری. 3 وختی اَ نظامی عیسی درباره دَرَسِشَه، یهودی شِیخون کا چَن نفر ویسا آکَردِشه عیسی وَر که بَیی کا خواهیشت بِکَرِن تا با و چَیی نوکَری شَفا بِدَه. 4 اَوِن اومینَه عیسی وَر و وِرَه مِنَّتی نَه اَیی نَه واتِشونَه: «اِم مِرد لایِقَه بَیی را اِم لُطفی بِکَری، 5 چوم چَمَه میلّتی نَه خِشَه و اِم مِرد هَ کسی یَه که اَمَه را عبادتگاه وَج آکَردَشَه.» 6 بَس عیسی اَوون نَه شَه. وختی کَ نِزدیکی آرَستَه، اَ نظامی چَن گِله اِشتَن رَفِقون کا، اِم پَیغومی نَه ویسا آکَردِشه عیسی وَر که: «آقا، اِشتَن زحمت مَدَه، چوم اَز لایِق نیمَه که تِه بای چِمِن کَ سَقفی جیر. 7 اِمی واسی، حتی اِشتَن لایق نِزونیمَه که بام اِشتِه وَر. ولی تِه فقط ایی کلمه بوآج، که چِمِن نوکَر شَفا بَگتی. 8 چوم اَز نی چِمِن کَفاتَر فرماندَه هِستِمَه و چِمِن زیر دَسی کا نی سَربازونی هِستِمَه و ایلَه نَه بَواتیم، ”بِش“، بَشی؛ و اَ ایلَه نَه بَواتیم، ”بِه“، بومَی و چِمِن نوکَری نَه بَواتیم، ”فِلون کاری بِکَه“، بَکَردی.» 9 وختی عیسی اِمی دَرَسِشَه، اَیی کا حیرون بَه و آگَردِستَه اَ جَماعتی طرفی را که چَیی دومله کارا بومَین و واتِشه: «شِمَه نَه بَواتیم، اَز حتی اِسرائیلی دیلَه کا نی اِنتَه رَه ایمانی ویندَه نیمَه.» 10 وختی قاصِدن آگَردِستینَه کَ، اَ نوکَری سَق و سلامت ویندِشونَه. ایلَه ویوه ژِنی زوعَه زِنده آکَردِه 11 تِلی پَش، عیسی، اِشتَن شاگِردون و وِرَه جماعتی همراه، شَه ایلَه شَهری را که چَیی نوم نائین بَه. 12 هِنتَه که شَهری دروازه نِزدیکی آرَستَه، ویندِشه ایلَه مِییِتی کارا بَبَردین که ایلَه ویوه ژِنی تنخا زوعَه بَه. وِرَه جماعتی شَهری مردمی کا اَ ژِنی همراه بینَه. 13 وختی عیسایِ خِداوند اَ ژِنی ویندِشه، دیلِش اَیی را سیستَه و واتِشه: «داد مَکَه!» 14 دومله عیسی شَه نار و تابوتی دَس آسوشَه. کسونی که کارا تابوتی بَبَردین، مَندینَه. عیسی واتِشه: «اِی جَوون، بَه تِنَه بَواتیم، پِرِز!» 15 اَ مَردَه، راست نِشته و دَمَندَه گف ژَنده! عیسی، اَیی دَسپَردِشه چَیی نَنه. 16 گِردی جانی کا تَرس دَلَکَه و هَتَه که خِدا ستایش بَکَردین، بَواتین: «یالَه پیغمبری چَمَه دیلَه کا ظهور کَردَشه.» و «خِدا اِشتَن قومی کمکی را اومَه.» 17 عیسی اِم کاری خَور گِرد یهودیه ولایتی کا و تَمون اَ دور و اَطرافی نواحی کا دَپیچِستَه. یحیی، عیسی درباره شَک بَکَردی 18 یحیی شاگِردِن گِردِ اِم چییون یحیی را خَوَر دوشونَه. بَس یحیی، 19 دِ نفر اِشتَن شاگِردون کا سَس كَردِشه و اَوون اِم پیغومی نَه ویسا آکَردِشه عیسایِ خِداوندی وَر که: «تِه هَ کسی اِستیش که بَسی با، یا ایی نفر دییَری منتظر بِبییَم؟» 20 وختی اَ دِ نفر اومینَه عیسی وَر واتِشونَه: «یحیی تعمید دهنده اَمَه ویسا آکَردَشَه اِشتِه وَر تا تِه کا دَفَرسَم تِه هَ کسی اِستیش که بَسی با، یا ایی نفر دییَری منتظر بِبییَم؟» 21 هَ ساعتی کا عیسی وِر کَسون، مریضیون کا، دردون کا و پَلیده روحون کا شَفا دوشَه و وِرَه کورَه آدَمون چِمون سو دَرَفَندِشه. 22 دومله عیسی اَ قاصِدون جَواوی کا واتِشه: «بِشَه و هَر چیی که ویندَه و دَرَسرونَه یحیی را بوآجَه، که چِنتَه کورِن بَویندین، شَلِن مِجِن، جُذامی اِن شفا بَگتین، کَرِن دَرَسِن، مَردَه اِن زِنده آبون و فَقیرون را خوشَ خَوَر اِعلام بَبی. 23 خَسَه بِبو اَ کسی که بَه مِن شَک مَکَرِه.» 24 وختی یحیی قاصِدِن شینَه، عیسی دَمندَه یحیی درباره مردمی نَه گَف ژَندِه و واتِشه: «چیکی ویندِه را شَه ایرونَه وییاوونی را؟ مِردی ویندِه را که لَلَه ایی شیوارَه، که وختی وا وَزِه هَر وَری را تَکان بَردی؟ 25 بَس چِه چی ویندِه را شَه ایرونَه بِرون؟ مِردی ویندِه را كه گِرون و نرم خَلا دَکَردَشه؟ کَسونی که گِرون و نرم خَلا دَکَرِن و تَجَملاتی یَه زِندگی هِستِشونَه پاُتشا اون قَصرون دیلَه کا زندگی بَکَردین. 26 بَس چِه چی ویندِه را شَه ایرونَه بِرون؟ ایلَه پیغمبری ویندِه را؟ ها، شِمَه نَه بَواتیم که یحیی ایلَه پیغمبری کا نی کَفاتَره. 27 یحیی هَ کسی یَه که چَیی درباره، مَلاکی پیغمبری کیتابی کا نیویشته بییَه که: «”حِسَه چِمِن قاصِدی اِشتِه نارناره ویسا آکَرِم، تا اِشتِه راه اِشتِه پیشی کا حاضیر آکَرِه.“ 28 شِمَه نَه بَواتیم، که کسی یحیی کا یالتَر دنیا اومَه نییَه؛ با اِم حال روکتَرین شَخصی که خِدا پاُتشایی کایَه، یحیی کا یالتَرَه.» 29 مردم گِرد و حَتی باجگیرِن نی وختی عیسی گَفون دَرَسِشونَه، اِعلام کَردِشونَه که خِدا عادلَه، چوم یحیی کا غسل تعمید گِتَشون بَه. 30 امّا فریسیون فِرقه عُلما و شریعتی قاضی یِن که یحیی کا غسل تعمید گِتَشون نِبَه، هدفی که خِدا اَوون را داری، رَد آکَردِشونَه. 31 عیسی واتِشه: «بَس، اِم نَسلی مردمی چِه چی بَشایم تشبیه بِکَرِم؟ اَوِن چِه چی مونِن؟ 32 اَوِن خِردَنونی شیواری نَه كه کوچه بازارون کا نِشِن و یَندی دَخونِن و بَواتین: «”شِمَه را لَلَه ژَندِمونَه، دوش نِکَردِرونَه؛ نوحه خَندِمونَه، داد نِکَردِرونَه.“ 33 چوم یحیی تعمید دهنده اومَه که نِه نون هَریسته و نِه شَراو هِنجی؛ شِمَه واتِرونه، ”دیوِش اِستَه.“ 34 اِنسانی زوعَه اومَه که هَم هَرِه و هَم هِنجِه؛ شِمَه بَواتیرون، ”دَیِسه، ایلَه وِرَه هَر و عرق هَرَه آدَمَه، باجگیرون و گناه کارون رَفِقه.“ 35 شِمَه اَعمال ثابت بَکَردی که عقل و حکمت نیرونَه.» شمعون فریسی کَ کا 36 ایی روز ایلَه فریسیون فِرقه عُلما کا عیسی غَذا هَردِه را دَعوت كَردِشه. عیسی شَه اَ فریسی کَ و سِفره سَری کا نِشته. 37 اَ شهری کا، ایله گناه کارَه ژِنی زندگی بَکَردی که وختی دَرَسِشَه عیسی اَ فریسی کَ کا سِفرَه سَری کا نِشته، ایلَه مَرمَری یَه قَبی، عطری نَه پور، اِشتَن نَه وَردِشه 38 و عیسی پِشتی کا، چَیی پا اون وَری کا مَنده و داد بَکَردی. اَ موقع اِسرگَ چِلَه اون نَه دَمَندَه عیسی پا اون شوشته و اِشتَن گیسه اون نَه اَوون خِشک آکَردِشه. دومله عیسی پا اون ماچ کَردِشه و عطر ژَندِشه. 39 وختی اَ فریسی که عیسی دعوت کَردَش بَه اِمی ویندِشه، اِشتَن دیلی کا واتِشه: «اَگَم اِم مِرد واقعا پیغمبر بِبی، بَزنی اِم ژِنی که اَیی دَس آسا کییَه و چِنتَه رَه ژِنی یَه؛ چوم که اَ ایلَه گناه کارَه ژِنی یَه.» 40 عیسی بَیی نَه واتِشه: «شمعون، پیستِمَه چیی بَه تِنَه بوآجِم.» شمعون واتِشه: «بفرما، اُستاد!» 41 عیسی واتِشه: «شخصی، دِ نَفری کا طلب داری، ایی نفری کا پونصد دینار و اَ ایلَه کا پینجاه دینار. 42 وختی که اَ دِ نفر نیمَشاین چَیی قرضی آدَین، طَلبکار هَر دِ نفری قرضی بَخشِستِشه. حِسَه اِشتِه نظر کَمیله اَ دِ نفری کا اَیی نَه وِرتَر خِش بَبی؟» 43 شمعون جَواو دوشَه: «گمون بِکَرِم اَ کسی که وِرتَر قرضدار بَه و بَخَشِستَه بَه.» عیسی واتِشه: «درست حُکم کَردِرَه.» 44 و دومله آگَردِستَه اَ ژِنی طرفی را و شمعونی نَه واتِشه: «اِم ژِنی بَویندیش؟ اَز اومیمَه اِشتِه کَ، تِه چِمِن پایون شوشتِه را آو نِوَردِره، امّا اِم ژِن چِمِن پااون اِشتَن چِمی اِسِرگی نَه شوشتِشه و اِشتَن گیسه اون نَه خِشک آكَردِشه! 45 تِه مِن ماچ نِکَردِره، امّا اَ وختی نَه که اومَیمَه اِم ژِن چِمِن پا اون ماچ کَردِه کا دَس پِگِتَه نیشه. 46 تِه چِمِن سَری روعَن نِژَندِره، امّا اِم ژِن چِمِن پا اون عطر ژَندِشَه. 47 اِمی واسی که اَ ژِن وِر محبت کَردِشه بَه تِنَه بَواتیم چَیی گناه اِن که وِر نی اِستینَه، بَخشِسته بیینَه. امّا کسی که کم بَخشِستَه بِبو، کم نی محبت بَکَردی.» 48 عیسی اَ ژِنی نَه واتِشه: «اِشتِه گناه اِن بَخشِستَه بینَه.» 49 کسونی که عیسی نَه سفره سَری کا نِشت بینَه یَندی نَه بَواتین : «اِم کییَه که حَتی گناه اون نی بَبَخشِستی؟» 50 عیسی اَ ژِنی نَه واتِشه: «اِشتِه ایمان، تِه نجات دوعَشَه، سَلامتی نَه بِش!» |
@ 2024 Korpu Company