انجیل لوقا 4 - کتاب مقدس به زبان تالشی شمالیعیسی آزمایشون کا 1 عیسی که روح القدسی کا پور بَه، اُردن رِواری نَه آگَردَه و خِدا روح، اَیی بَردِشَه ویاوونی را. 2 اوآکا چِل روز اِبلیس اَیی وَسوسه کَردِشه. عیسی اَ روزون کا چیی نییَردِشه، و اَ روزون آخِری کا، وِشیش بَه. 3 اِبلیس عیسی نَه واتِشه: «اَگم تِه خِدا زوعَه ایش، اِم سِنگی دستور بِده که نون آبو.» 4 عیسی جَواو دوشَه: «توراتی کا نیویشته بییَه که ”اِنسان فقط نونی نَه زِندَه نییَه.“» 5 دومله اِبلیس، عیسی بَردِشه بِلَندَه جِگایی و ایی لَحظه کا گِرد دنیا پاُتشایی اون اَیی نیشون دوشَه 6 و واتِشه: «از گِردِ اِم قدرتی و تمون چَیی شکوه و جلالی آدَم بَه تِن، چوم بَه مِن دَسپَرده بییَه و اَز اَیی آدَم هَر کسی که پیستِمَه. 7 بَس اَگم مِن پرستش بِکَری، اِمِن گِرد اِشتِه شِن بَبین.» 8 عیسی جَواو دوشَه: «توراتی کا نیویشته بییَه که، «”خِداوند، اِشتِه خِدا پرستش بِکَه و فقط اَیی عبادت بِکَه.“» 9 دومله اِبلیس، عیسی بَردِشه اورشلیمی شهری را و اَیی معبدی بومی تِکی سَری کا نوشه و واتِشه: «اَگم تِه خِدا زوعَه ایش، اِشتَن اییا کا فِرآدَه جیری را، 10 چوم داوودی مَزمورَه کیتابی کا نیویشته بییَه که: «”اَ، اِشتَن ملائیکه اون دستور بَدای تا تِه کا محافظت بِکَرِن.“ 11 و ”اَوِن تِه اِشتَن دَسون سَری کا بَبَردین، تا نبادا تِه اِشتِه پا سِنگی کا بِژَنی.“» 12 عیسی بَیی جَواو دوشَه: «توراتی کا نیویشته بییَه که، ”خِداوند، اِشتِه خِدا اِمتحان مَکَه.“» 13 وختی اِبلیس گِردِ اِم وسوسه اون تَمون آکَردِشه، تا ایلَه دییَر فرصتی را عیسی وِل آکَردِشه. عیسی خدمتی شروع بییِه جَلیلی کا 14 عیسی روح القدسی قدرتی نَه آگَردِستَه جلیلی ولایتی را و چَیی خَوَر گِردِ اَ نواحی کا دَپیچیستَه. 15 عیسی یهودییون عبادتگاه اون کا دَرس بَدای، و گِرد مردم اَیی کا تعریف بَکَردین. 16 عیسی شَه ناصره را، هَ شهری که اوآ کا یال آبَه بَه. اَ همیشه شیوار، یهودیون مقدّس شنبه روزی کا شَه عبادتگاه و پِرِشتَه تا خِدا کلامی بوخونِه. 17 اِشعَیای پیغمبری طوماری آدوشونَه بَیی. عیسی، طوماری آکَردِشه و هَ جِگایی پیدا کَردِشه که نیویشته بییَه: 18 «خِداوندی روح چِمِن سَری کایَه، چوم که اَ، مِن اِنتخاب کَردَشه تا فقیرون را خوشَ خَوَری اِعلام بِکَرِم، و مِن ویسا آکَردَشَه که اَسیرون را، آزادی اِعلام بِکَرِم، و کورون را، بینایی اِعلام بِکَرِم، و ستمدیده اون، آزاد آکَرِم، 19 و خِداوندی لُطفی سالی اِعلام بِکَرِم.» 20 دومله عیسی، طوماری دَپیچیستِشه و آدوشَه عبادتگاه خادمی و نِشتَه. عبادتگاه کا گِردِ مردم زول ژَندَشون بَه، بِه عیسی. 21 عیسی دَمندَه گف ژَندِه و واتِشه: «اوری وختی اِم نیویشته دَرَسیرون، بِه اَنجام آرَستَه.» 22 گِرد عیسی چاکی بَواتین و چَیی پور لُطفه گَفونی کا که چَیی گَ کا بِرون بومَی حَیرون بینَه و بَواتین: «بَگم اِم یوسفی زوعَه نییَه؟» 23 عیسی اَوون نَه واتِشه: «بیدون شَک چِمِن درباره اِم مَثَّلی بَواتیرون که ”اِی طَبیب اِشتَن شَفا بِده! اَ چییونی که دَرَسَمونَه تِه کَفَرناحومی شهری کا اَنجام دوعَرَه، اییا اِشتِه شهری کا نی اَنجام بِده.“» 24 دومله عیسی واتِشه: «حقیقتن شِمَه نَه بَواتیم که هیچ پیغمبری، چَیی اِشتَن شهری کا قَبول نِکَرِن. 25 یقین بِزونَه که ایلیای پیغمبری دورانی کا، وختی که آسِمونِن سِه سال و نیم دَوَسته بینَه و بَرکَ قَحطیی اَ سرزَمینی سرتاسری گِتِشه، وِرَه ویوه ژِنکونی اِسرائیلی کا بینَه. 26 امّا ایلیا چَوون هیچ گِله وَر ویسا آنِبَه، مَگم اَ ویوه ژِنی وَر که صَرفَه شهری کا، صَیدونی منطقه کا بَه. 27 اِلیشَع پیغمبری دورانی کا نی، وِرَه جُذامیونی اِسرائیلی کا بینَه، ولی اَوِن هیچ گِله شَفا نِگِتشونَه، سوریه ای یَه نَعَمانی غِیراز.» 28 گِرد کسونی که عبادتگاه کا بینَه، اِم گفون دَرَسِه نَه بَرک عصبانی بینَه 29 و پِرِشتینَه، عیسی بَردِشونَه شهری کا بِرون و بَردِشونَه هَ کوهی تِکی سَر که شهر چَیی سَری کا بینا بییَه بَه، تا اوآنَه اَیی فِرآدَن جیر. 30 امّا عیسی چَوون دیلَه کا دَوییَرده و شَه. تور و دیوونه مِردی شفا 31 دومله عیسی اومَه کَفَرناحومی را که جَلیلی ولایتی ایلَه شَهرون کا بَه. و مقدّس شنبه روزی کا مردمی تعلیم دوشَه. 32 مردم چَیی تعلیمون کا مات آبَه بینَه، چوم اِقتداری نَه گَف ژَنی. 33 عبادتگاه کا ایلَه تور و دیوونه مِردی بَه که پلیدَه روح داری. اَ مِرد بِلَنده سَسی نَه خِلِع ژَندِشَه که: 34 «اِی عیسایِ ناصری، اَمَه نَه چِه کارِر اِستَه؟ اومَیش اَمَه نابود بِکَری؟ بَزنیم تِه کییش؛ تِه هَ قدوسِ، خِدا ایش!» 35 ولی عیسی اَیی را زِرَه گِتِشه و واتِشه: «ساکیت بِبَش و بَیی کا بِرون بَرا!» اَ موقع دیو، گِردی پیشی کا اَ مِردی زمین ژَندِشَه و بیدون اِم کِه بَیی آسیبی بِژَنه، اَیی کا بَرشَه. 36 مردم گِرد حَیرون بینَه و یَندی نَه بَواتین: «اِم چِنتَه رَه گفی یَه؟ اَ، اِقتدار و قدرتی نَه پلیده روح اون دستور بَدای و اَوِن آدَمون کا بَرشون!» 37 اِنتَه عیسی کارون خَوَر گِرد اَ نواحی کا دَپیچیسِته. پطرسی ژِن نَنه شفا و وِر کسون دییَری شفا 38 عیسی پِرِشتَه عبادتگاه نَه اومَه بِرون و شَه شمعونی کَ. شمعونی ژِن نَنه بَرکَ تَوی داریسته. اَوِن عیسی مِنَّت کَردِشونَه که اَ ژِنی کمک بِکَرِه. 39 عیسی اَ ژِنی کَفایی نَه سَری کا مَندَه و تَوی را زِرَه گِتِشه، چَیی تَو قطع آبَه. اَ ژِن اَلبَحَل پِرِشته و دَمَندَه اَوون کا پذیرایی کَردِه. 40 مَغریب دَم، گِرد کسونی که، مریضونی دارین که جور بَه جوره درد و مرضِشون اِستبَه، وَردِشونَه عیسی وَر و عیسی اِشتَن دَسی گِلَه گِلَه چَوون سَری کا پِنوشه و اَوون شَفا دوشَه. 41 دیوِن نی وِر کَسون کا بِرون اومینَه و خِلِع ژَنین بَواتین: «تِه خِدا زوعَه ایش!» امّا عیسی اَوون را زِرَه گِری و اِجازه نیمَدای گَف بِژنین، چوم اَوِن بَزنین که عیسی هَ مَسیح موعودَه. عیسی عبادتگاه کا تعلیم بَدای 42 صَبایی نَه روز صِبی زو، عیسی شَه دور اُفتاده جِگایی را. مردم عیسی دومله گَردین و وختی آرَستینَه جِگایی که اوآکا بَه، تَقَّلا کَردِشونَه که مَرزِن بِشو. 43 امّا عیسی واتِشه: «اَز بَسی خِدا پاُتشایی خوشَ خَوَری دییَر شهرون را نی اِعلام بِکَرِم، چوم که ویسا آبَییمَه هِم کاری بِکَرِم.» 44 و عیسی یهودیه ولایتی عبادتگاه اون کا تعلیم بَدای. |
@ 2024 Korpu Company