انجیل لوقا 2 - کتاب مقدس به زبان تالشی شمالیعیسی دنیا اومِه 1 اَ روزون کا، آگوستوس که رومی اِمپِراطور بَه، فرمان دوشَه که رومی اِمپِراطوری گِردی کا سَر شماری بِکَرن. 2 اِم اوّلین سَر شماری بَه و اَ زَمانی که کورینیوس سوریه فَرماندار بَه اَنجام بَبی. 3 بَس، هَر کسی شَه اِشتَن شهری را تا نوم نویسی بِکَرِه. 4 یوسف نی ناصره شهری نَه که جلیلی ولایتی کا بَه اومَه یهودیه ولایت، بِیت لِحِمی شهری را که داوود پاُتشا زادگاه بَه. چوم یوسف، داوودی نسل و خاندانی کا بَه. 5 یوسف شَه اوآ تا اِشتَن پِیوَندی نَه، مریمی نَه که حامیله بَه، نوم نویسی بِکَرِن. 6 وختی که اوآکا بینَه، مریمی زایمانی وخت آرَستَه 7 و مریم اِشتَن اوّلین خِردَنی که زوعَه بَه دنیا وَردِشه. اَیی قِنداقی کا دَپیچیستِشه و آخوری کا خِساووندِشه، چوم مِهمونخونَه کا اَوون را جِگا نِبه. شوونَه اِن و مَلائیکه اِن 8 اَ منطقه کا، شوونَه اِنی مَند بینَه که صحرا کا بَمَندین و شَوی را اِشتَن رَمَه کا مواظبت بَکَردین. 9 ایی دفعه خِداوندی ایلَه مَلائیکه اَوون را ظاهر آبَه، و خِداوندی شکوه و جلالی نور چَوون اَطرافی کا دَتاویسته. شوونَه اِن بَرک تَرسی نَه. 10 مَلائیکه اَوون نَه واتِشه: «مَتَرسه، چوم که اَز شِمَه را خوشَ خَوَری هِستِمَه، بَرکَ خوشَ خَوَری که اِم قومی گِردِ مردمی را یَه: 11 چوم اوری داوود پاُتشا شهری کا ایلَه نجات دَهنده ای شِمَه را دنیا اومَه که مسیح و خِداوندَه. 12 چَیی نیشونه شِمَه را اِمَه که ایلَه خِردَنی قِنداقی کا دَپیچیستَه و آخوری دیلَه کا خِتَه بَویندیرون.» 13 ایی دَفَعه ایی لشکر آسِمونی یَه مَلائیکه، اَ مَلائیکه نَه ظاهر آبینَه که خِدا ستایش بَکَردین و بَواتین: 14 «عَرش بَرینی کا خِدا را جلال بِبو، و زمینی کا مردمی را که خِدا اَوون کا راضی یَه صُلح و سلامتی بِبو.» 15 وختی مَلائیکه اِن چَوون وَری نَه شینَه آسِمونی را، شوونَه اِن یَندی نَه واتِشونَه: «بایَه بِشَم بِیت لِحِمی شهری را و اِم اِتِفاقی که دَلَکَه و خِداوند، اَمَه اَیی کا خَوَردار کَردَشه، بِوینَم.» 16 بَس تاویستِنَه شینَه و مریم و یوسف و اَ خِردَنی که آخوری کا خِته بَه تِلَفتِشونَه. 17 وختی خِردَنی ویندِشونَه، گفی که اَ خِردَنی درباره اَوون نَه واتَه بییَه بَه، پخش آکَردِشونَه. 18 هر کسی که دَرَسی، شوونَه اون گفی کا تعجب بَکَردی. 19 ولی مریم گِردِ اِم چییون اِشتَن خاطری کا غَم هَریستِه و چَوون درباره اِشتَن دیلی کا فیکر بَکَردی. 20 شوونَه اِن آگَردِستینَه و گِردِ چییونی واسی که دَرَسَه و ویندَشون بَه خِدا شُکر و ستایش بَکَردین، چوم گِردِ چییونی که اَوون نَه واتَه بییَه بَه اِتِفاق دَلَکَه بَه. عیسی نوم پِنوعِه 21 هشتمین روزی کا، وختی خِردَنی خَتنَه وخت آرَستَه، چَیی نومی عیسی، پِنوشونَه. عیسی هَ نومی بَه که مریمی حامیله بییَه پیش، مَلائیکه مریمی نَه واتَش بَه. 22 وختی اَ موقع آرَستَه که مطابق موسی شریعت، تطهیر بییِه مراسمی اَنجام بِدَن، یوسف و مریم، عیسی وَردِشونَه اورشلیم، تا خِداوندی تقدیم بِکَرن. 23 هَتَه که خِداوندی شریعتی کا نیویشته بییَه: «هَر اوّلین زوعَه ایی که دنیا با خِداوندی را وقف بَبی.» 24 و هَتَه که خِداوندی شریعتی کا واتَه بییَه قِربونی بِکَرِن یعنی: «ایی جِفت قُمری یا دِ گِله کَفترَه کیجَه.» 25 اَ زمانی کا، اورشلیمی شهری کا ایلَه مِردی زندگی بَکَردی که چَیی نوم شمعون بَه. اَ صالِح و خِدا ترس بَه و اَ کسی مُنتظر بَه که قوم اِسرائیلی آزاد آکَرِه. شمعون روح القدسی کا پور بَه. 26 روح القدس بَیی آشکار آکَردَش بَه که تا خِداوندی مسیح مَوینه، نِمِرِه. 27 بَس شمعون روح القدسی هدایتی نَه اومَه یهودیون مَعبدی دیلَه و وختی عیسی دَده نَنه خِردَنی وَردِشونَه تا شریعتی دَبی اَیی را اَنجام بِدَن، 28 شمعون خِردَنی کَشَه آگِتِشه و خِدا ستایش کَردِشه و واتِشه: 29 «حِسَه اِی خِداوند، هَتَه که وَعده دوعَرَه، اِشتِه نوکری آرامشی نَه اِم دنیا کا بِبَه. 30 چوم چِمِن، چِمِن اِشتِه نجاتی ویندَشونَه، 31 هَ نجاتی که گِرد آدَمون چِمی پیشی کا آمادَه آکَردَرَه، 32 هَ نوری که حقیقتی، دییَر قومون را آشکار آکَرِه و اِشتِه قوم، اِسرائیلی عِزّت اِحترامی باعیث بَبی.» 33 عیسی دَده نَنه، گفونی کا که چَیی درباره واتَه بَه، حیرون بینَه. 34 دومله شمعون اَوون را خیرَه دعا كَردِشه و عیسی نَنه، مریمی نَه واتِشه: «دَیِس، اِم خِردَن اِنتخاب بییَه تا قوم اِسرائیلی دیلَه کا وِر کَسون بَرگِنِستِه و پِرِشتِه باعیث بِبو. اِم خِردَن ایلَه نیشونه ایی بَبی که، اَیی نَه ضِدّییَت بَکَردین. 35 تا اِنتَه وِر کَسون دیلی فیکرِن آشکار آبون. اِشتِه دیلی کا نی ایلَه قَمَّه ای ویشو.» 36 اوآکا، ایلَه ژِنی زندگی بَکَردی که پیغمبر بَه و چَیی نوم حَنّا بَه. حَنّا فَنوئیلی کِلَه اَشیری قبیله کا بَه که وِر پیر بَه. حَنّا اِزدواج کَردِه پَش هفت سال اِشتَن شو نَه زندگی کَردِشه و دومله چَیی شو مَردَه، 37 و تا هَشتاد و چار سالگی ویوه مَند بَه. اَ هَرگز معبدی کا بِرون نِشی، بَلکَم شَو اَنده روز دعا و روزه نَه خِدا پرستش بَکَردی. 38 حَنّا نی هَ موقع اومَه نار و خِدا شُکر کَردِشه، گِرد کَسونی را که اورشلیمی آزادی چِم بِه راه بینَه، عیسی درباره گف ژَندِشَه. 39 وختی که یوسف و مریم مطابق خِداوندی شریعت گِردِ کارون اَنجام دوشونَه، آگَردِستینَه اِشتَن شهر، ناصره را، که جَلیلی وِلایَتی کا بَه. 40 اَ خِردَن یال آبی و قوی بَبی. اَ حِکمَتی نَه پور بَه و خِدا را عزیز بَه. نو پِرَسته عیسی معبدی کا 41 عیسی دَده نَنه هَر سال پِسَخ عیدی را بَشین اورشلیمی شهری را. 42 وختی عیسی دونزَه ساله بَه، اَوِن همیشه دَبی شیوار عیدی را شینَه اورشیلم. 43 وختی عیدی روزِن تَمون آبینَه، اَوِن راه دَلَکینه که آگردِن اِشتَن شهر ولی نوپِرَسته عیسی اورشلیمی کا مَندَه. عیسی دَده نَنه اِمی نیمَزنین، 44 بَلکَم چوم فیکر بَکَردین عیسی کارَوونی دیلَه کا یَه، ایی روز کامل اِشتَن سَفری اِدامه دوشونَه. آخِرسَر، دَمَندینَه اِشتَن خویشون و آشنایون دیلَه کا عیسی دومله گردی نَه. 45 وختی نِشاستِشونَه عیسی بِتلَفِن، آگَردِستینَه اورشلیم تا چَیی دومله بِگردِن. 46 سه روزَه پَش، عیسی معبدی کا تِلَفتِشونَه. اَ معلمون دیلَه کا نِشت بَه و چَوون گَفون گوش بَدای و اَوون کا سوالونی دَفَرسی. 47 هر کسی چَیی گفون دَرَسی، چَیی فهمی کا و چَیی جَواوونی کا که بَدای، تعجب بَکَردی. 48 وختی عیسی دَده نَنه اَیی اوآکا ویندِشونَه، مات آبینَه. عیسی نَنه اَیی نَه واتِشه: «زوعَه، چیرا اَمَه نَه اِنتَه بَکَردیش؟ دَیِس اِشتِه دَده و از وِرَه تَشویشی نَه اِشتِه دومله گَردیمون.» 49 عیسی واتِشه: «چیرا چِمِن دومله گَردَه؟ مَگم نیمَزنیرون که اَز بَسی چِمِن دَده کَ کا بِبوم؟» 50 امّا اَوِن چَیی اِم گفی مَعنی نِزونیشونَه. 51 عیسی اَوون نَه راه دَلَکه و شَه ناصره شهری را و چَوون مطیع بَه. چَیی نَنه گِردِ اِم چییون اِشتَن دیلی کا غَم هَری. 52 عیسی حِکمت و قامتی کا، کارا یال آبی و هَم خِدا وَری کا عزیز بَه، هَم مردمی وَری کا. |
@ 2024 Korpu Company