انجیل لوقا 13 - کتاب مقدس به زبان تالشی شمالیدعوت کَردِه توبه را 1 هَ وختی کا، چَن نفر اوآکا بینَه و عیسی نَه، جَلیلیونی درباره گف ژَندِشونَه که قِربونی کَردِه وختی کا، پیلاتُس اِنتَه اَوون کِشتِشه که چَوون خون چَوون قِربونیون خونی نَه قاطی بَه. 2 عیسی جَواو دوشَه: «خَیال بَکَردیرون اِم جَلیلیونی که اِنتَه عذاب کَشِشونَه بَقیه ی جَلیلیون کا گناه کارتَر بینَه؟ 3 شِمَه نَه بَواتیم که اِنتَه نییَه! امّا اَگم توبه مَکَرَه، شِمَه نی گِرد چَوون شیوار نابود بَبیرون. 4 و یا اَ هیجده نَفری که سیلوآمی بُرج ویبَه و اَوون کِشتِشَه، خَیال بَکَردیرون بقیه آدَمونی کا که اورشلیمی کا زِندگی بَکَردین گناه کارتَر بینَه؟ 5 شِمَه نَه بَواتیم که اِنتَه نییَه! امّا اَگم توبه مَکَرَه، شِمَه نی گِرد چَوون شیوار نابود بَبیرون.» 6 دومله عیسی اِم مَثَّلی واتِشه: «ایلَه مِردی اِشتَن اَنگِرَه باغی کا ایلَه اَنجیل داری کاشتِشَه. وختی پیستِشَه چَیی میوه بِچینه، اَ داری کا چیی نِویندِشه. 7 بَس باغَوونی نَه واتِشه: ”دَیِس حِسَه سِه سالَه که اَز بومَیم اِم اَنجیل داری کا میوه بِچینیم ولی چیی نِوینِم. اَیی دَوِر. چیرا بیخودی زَمینی هَدر بِدَه.“ 8 اَ باغَوون جَواو دوشه: ”آقا، بِدا اِم دار ایی سال نی بومونِه. تا اَز چَیی دوری بِکَنِم و کود ویکَرِم. 9 اَگم سال دیگه میوه وَردِشه که چِه چاکتَر؛ اَگم نِوَردِشه اَ موقع اَیی دَوِر.“» ایلَه علیلَه ژِنی شفا 10 یَهودییون ایلَه مقدّس شَنبه روزی کا، عیسی ایلَه عِبادتگایی کا تعلیم بَدای. 11 اوآکا ایلَه ژِنی بَه که ایلَه روحی هیجده سال اَیی عَلیل کَردَش بَه. چَیی پِشت قات بَه و اَصلا نیمَشای صاف بومونی. 12 وختی عیسی اَیی ویندِشه، اَیی دَخوندشه اِشتَن وَر و واتِشه: «اِی ژِن، اِشتِه عَلیل بییِه کا خلاص بیشَه!» 13 و اَ ژِنی سَر دَس پِنوشه و اَ ژِن اَلبَحَل صاف مَندَه و خِدا ستایش کَردِشه. 14 امّا عبادتگاه رئیس اِمی واسی که عیسی شَنبه روزی کا شَفا دوعَش بَه وِر عصبانی آبَه و مردمی نَه واتِشه: «شیش روز کار کَرده را تَعیین بییَه. اَ روزون کا بایَه و شَفا بِگِرَه، نِه مقدّس شَنبه روزی کا.» 15 عیسایِ خِداوند چَیی جَواوی کا واتِشه: «اِی دِ دیمِن! بَگم کسی شِمَه دیلَه کا مَندَه که شَنبه روزی کا اِشتَن گا یا اُلاغی طَوله کا آمَکَرِه و آو دوعِه را مَبَرِه بِرون؟ 16 بَس مَگم نَبی اِم ژِن نی که اِبراهیم پیغمبری نَسلی کایَه و هجده سال شیطان اَیی اَسیر کَردَش بَه، شَنبه روزی کا اِم اِسارتی کا آزاد آبو؟» 17 وختی عیسی اِمی واتِشه، چَیی مخالِفِن گِرد خجالت بینَه، امّا مردم گِرد، گِردِ عجیب کارونی کا که عیسی بَکَردی شاد بینَه. خَردَل دونه و خَمیرَه مایَه مَثَّل 18 اَ موقع عیسی واتِشه: «خِدا پاُتشایی چِه چی شیوارَه؟ اَیی بِه چِه چی تَشبیه بِکَرِم؟ 19 اَ، ایلَه خَردَل دونه ای شیوارَه که ایلَه مِردی اَیی پِگِتِشه و اِشتَن باغی کا کاشتِشه. اَ دونه پِرَسَه و داری آبَه، اِنتَه که پرنده اِن چَیی لاخه اون میانَه کا خومَه وَج آکَردِشونَه.» 20 هَنی عیسی واتِشه: «خِدا پاُتشایی بِه چِه چی تَشبیه بِکَرِم؟ 21 اَ، خَمیره مایَه ای شیوارَه كه ایلَه ژِنی اَیی پِگِتِشه و سه کیسه آردی نَه قاطی کَردِشه تا خَمیر گِرد آرَستِه.» تنگَه بَر 22 عیسی اورشلیمی راه کا، شَهرون و دِه اون را بَشی و تعلیم بَدای. 23 ایی نفر عیسی کا دَفَرسِشه: «اِی آقا، فقط کَمَه آدَمونی نِجات پیدا بَکَردین؟» عیسی اَوون نَه واتِشه: 24 «بَرک تَقَّلا بِکَرَه تا تَنگه بَری نَه بایَه دیلَه، چوم شِمَه نَه بَواتیم، وِر کَسِن تَقَّلا بَکَردین تا دیلَه دَشون، امّا نیمَشان. 25 وختی کَ صاحیب پِرزِه و بَری دَوَسِه، شِمَه بِرونی کا بَمَندیرون، بَری کویَه و بَواتیرون: ”آقا، بَری اَمَه را آکَه!“ امّا اَ جَواو بَدای: ”اَز شِمَه آنِزونِم؛ نیمَزنِم کییا کا اومَیرونَه.“ 26 اَ موقع شِمَه بَواتیرون: ”اَمَه تِنَه هَردَمونَه و هِنتَمونَه و تِه چَمَه کوچه اون کا تعلیم بَدایش.“ 27 امّا اَ شِمَه نَه بَواتی: ”از شِمَه آنِزونِم؛ نیمَزنِم کییا کا اومَیرونَه. چِمِن چِمی پیشی کا دور آبییَه، اِی بَدکارِن!“ 28 وختی که اِبراهیم و اِسحاق و یعقوب و پیغمبرون گِردی خِدا پاُتشایی کا بَویندیرون، ولی بِوینَه شِمَه بِرونی کا مَنده ایرونَه، اَ موقع اوآکا داد بَکَردیرون و دَندون، دَندونی سَری کا فِشار بَدایرون. 29 مردم مشرق و مغریب و شمال و جنوبی کا بومَین و خِدا پاُتشایی سِفره سَری کا نِشِن. 30 ها، بَعضی اِن که آخِرین اِستینَه، اَوّلین بَبین و بَعضی اِن که اوّلین اِستینَه، آخِرین بَبین.» عیسی غم اورشلیمی را 31 اَ موقع چَن نفر فریسیون فِرقه عُلما کا اومینَه عیسی وَر و واتِشونَه: «اییا نَه دَوَز، چوم هیرودیسِ حاکِم پیستِشَه تِه بِکِشِه.» 32 عیسی جَواو دوشَه: «بِشَه و اَ رِباطی نَه بوآجه: ”اوری و صبا از دیوون مردمی کا بَرکَرِم و مردمی شَفا بَدایم، و سِومّین روزی کا چِمِن کاری کامِل بَکَردیم. 33 امّا اوری و صبا و پَشرا بَسی چِمِن راه اِدامه بِدَم، چوم ممکن نییَه ایلَه پیغمبر اورشلیمی غِیراز دییَر جِگایی کا کِشتَه بِبو.“ 34 اِی اورشلیم، اِی اورشلیم، اِی شهری که پیغمبرون کِشی و رسولونی که اِشتِه وَر ویسا آبون سِنگسار بَکَردیش! چَن کَرَه پیستِمَه ایلَه کُلشکُنی شیوار که اِشتَن کیجه اون اِشتَن پَر و بالون جیری کا جمع آکَرِه، اِشتِه خِردَنون ایی جِگاکا جَمع آکَرِم، امّا تِه نِپیستِرَه! 35 حِسَه شِمَه کَ بَر، تِیی و متروکه مَندَه. شِمَه نَه بَواتیم که دِ مِن نِوینَه تا اَ زمانی که بوآجَه: ”مُتِوارکَه اَ کسی که خِداوندی نومی نَه بومَی.“» |
@ 2024 Korpu Company