انجیل لوقا 12 - کتاب مقدس به زبان تالشی شمالیدِ دیمی کا پَریز کَردِه 1 اِم موقع، هَزارون نفر جمع آبینَه، اِنتَه که یَندی سَری کا پا پِنَین. عیسی، اوّل اِشتَن شاگِردون نَه دَمَنده گَف ژَندِه و واتِشه: «فریسیون فرقه عُلما خَمیره مایَه کا، که دِ دیمی یَه، دوری بِکَرَه. 2 هیچ سَرپوش پِنوعَه چیی نی که آشکار آمَبو و هیچ نِینَکی یَه چیی نی که عَلَنی مَبو. 3 بَس گَفونی که تاریکی کا واتَرونَه، روشونی کا دَرَسه بَبی و اَ چیی که دَوَسته بَرون پِشتی کا، گوشون کا یَواشی نَه واتَرونَه کومون سَری کا اِعلام بَبی. 4 «چِمِن رَفِقِن، شِمَه نَه بَواتیم کسونی کا مَترسَه که جِسمی کِشِن و چَیی پَش اِمی کا وِرتَر کاری چوون دَسی کا نِبَرا. 5 امّا شِمَه نَه بَواتیم که کی کا بَسی بِتَرسَه: اَ کسی کا بِتَرسَه که کِشتِه پَش، قدرت و اِختیار هِستِشه شِمَه جَهَندمی کا دَرَفَنه. ها، شِمَه نَه بَواتیم اَیی کا بِتَرسَه. 6 مَگم پینج گِله کیجَه قِیمت دِ قِران نییَه؟ با اِم حال، خِدا چَوون ایلَه نی ویر بَنِرکَرِه. 7 حتّی شِمَه سَری مویِن گِرد ایشمَرده بَیی نَه بَس مَتَرسَه؛ چوم شِمَه اِرزِش هَزارون گِله کیجه اون کا وِرتَرَه. 8 شِمَه نَه بَواتیم، هَر کسی مردمی وَری کا اِشتَن زوونی نَه بوآجِه که چِمِن شِنَه، اِنسانی زوعَه نی خِدا مَلائیکه اون وَری کا اِشتَن زوونی نَه بَواتی که، اَ آدَم چَیی شِنَه. 9 امّا کسی که مردمی پیشی کا مِن هاشا بِکَرِه، خِدا مَلائیکه اون پیشی کا هاشا بَبی. 10 هَر کسی اِنسانی زوعَه ضِد گَفی بِژنِه، بَخشِستَه بَبی، امّا کسی که روح القدسی نَه کُفر بوآجه بَخشِستَه نییَب. 11 وختی مُحاکمَه کَردِه را شِمَه بَبَردین عبادتگاه اون را و بَبَردین حاکِمون و فَرماندارون وَر، نگران مَبییَه که چِنتَه اِشتَن کا دِفاع بِکَرَه یا چِه بوآجَه، 12 چوم هَ ساعتی کا، روح القدس شِمَه آموجِه که بَسی چِه بوآجَه.» نادونَ اَربابی مَثَّل 13 ایی دفعه ایی نفر جماعتی دیلَه کا عیسی نَه واتِشه: «اُستاد، چِمِن بِرا نَه بوآج که چَمَه دَده اِرثی مِنَه تَقسیم بِکَرِه.» 14 امّا عیسی جَواو دوشَه: «اِی مِرد، کی مِن شِمَه میانَه کا قاضی و اِرث تقیسمَه کَر، کَردَشه؟» 15 دومله مردمی نَه واتِشه: «شِمَه هَواسی جمع آکَرَه. هَر جورَه حرص و عازی کا دوری بِکَرَه، چوم اِنسانی زِندگی، چَیی وِرَه ثیروَتی را نییَه.» 16 دومله عیسی اَوون را اِم مَثَّلی وَردِشه و واتِشه: «ایلَه ثیروتمندَه مِردی اِشتَن زمینی کا وِر مَحصول بِه دَس وَردِشه. 17 اَ مِرد اِشتَن نَه فیکر کَردِشه که ”چِه بِکَرِم؟ چوم جِگام نییَه که چِمِن مَحصولی اَنبار بِکَرِم.“ 18 دومله واتِشه: ”ها، زونِستِمَه چِه بِکَرِم! چِمِن اَنبارون خراو آکَرِم و یالتَرَه اَنبارونی وَج آکَرِم. چِمِن گِرد گندِمی و چِمِن گِرد اَموالی اوآکا ذخیره بَکَردیم. 19 چَیی پَش اِشتَن نَه بَواتیم: ”اِی چِمِن جان، تِه چِندی سالون را وِرَه اَموالی جمع آکَردَرَه؛ حِسَه آسوده زندگی بِکَه؛ بَه و بِنج و کیف بِکَه.“ 20 امّا خِدا اَیی نَه واتِشه: ”اِی نادون! هِم شَنار اِشتِه جانی ویگِرِم. بَس اَ چیونی که جَمع آکَردَرَه چی کی شِن بَبی؟“ 21 اِم، اَ کسی آخِرعاقِبتَه که اِشتَه را ثروت جَمع آکَرِه، ولی خِدا وَری کا تِییَه دَسَه.» نگران مَبییَه 22 عیسی اِشتَن شاگِردون نَه واتِشه: «بَس شِمَه نَه بَواتیم، شِمَه زندگی را نگران مَبییَه که چِه بَرَه و نِه شِمَه بَدَنی را نگران بِبییَه که چِه دَکَرَه. 23 چوم زندگی غذا کا مهمتَر و بَدَن خَلا کا مهمتَرَه. 24 کَلاچون دَیِسه: نِه کارِن و نِه دِرو بَکَردین، نِه کاهدون هِستِشونَه و نِه اَنبار؛ ولی خِدا چوون روزی آدَه. شِمَه، پرنده اون کا چِندی با اِرزِشتَری رونَه! 25 کَمیله شِمَه کا نگران بییِه نَه بَشای ایی ساعت اِشتَن عمری اِضافه آکَرِه؟ 26 بَس اَگم نیمَشایَه اِنتَه رَه روکَه کاری اَنجام بِدییَه، چیرا بقیه چییون را نِگرانیرونَه؟ 27 میشینَه گُلون دَیِسه که چِنتَه پِرَسِن؛ اَوِن نِه زحمت بَکَشدین و نِه ریس وَجِن. ولی شِمَه نَه بَواتیم، که حَتی سُلیمان پاُتشا نی اِشتَن گِردِ شکوه و جلالی نَه چَوون ایلَه شیوار بَزَک نِبه. 28 بَس اَگم خِدا، صحرا واشی که اوری اِستَه و صَبا دَرَفَنِن تَنوری کا، اِنتَه بَزَک بَکَردی، چِندی وِرتَر اِی کم ایمانِن شِمَه بَزَک بَکَردی! 29 چِمی دومله مَبییَه که بَسی چِه بَرَه یا چِه بِنجَه؛ چِمون نگران مَبییَه. 30 چوم اِم دنیا دییَر قومِن، اِم چییون دومله گَردِن، امّا شِمَه آسِمونی یَه دَده بَزنی که شِمَه اِم چییون اِحتیاج دارَه. 31 بَلکَم شِمَه خِدا پاُتشایی دومله بِبییَه؛ که اِم چیی اِن نی شِمَه آدوعَه بَبی. 32 «اِی روکَ رَمَه، مَتَرسَه، چوم شِمَه آسِمونی یَه دَده شادی اِمَه که اَ پاُتشایی آدَه شِمَه. 33 اَ چیی که هِستِرونَه بِخرَشه و آدییَه فَقیرون؛ شِمَه را کیسه اونی وَج آکَرَه که پوستَه نییَب، و آسِمونی کا گنجی ذخیره بِکَرَه که تمون آنییَب، جِگایی که نِه دِزد بومَی و نِه پِت ژَنه. 34 چوم شِمَه گنج هَر جِگا کا بِبو، شِمَه دیل نی اوآکا بَبی. حاضیرَه خادِمِن 35 «شِمَه کَمَرون دَوِندَه و خِدمتی را حاضیر بِبییَه و شِمَه چرااون روشون غَم بَرَه. 36 کسونی شیوار بِبییَه که منتظری نَه چَوون اَرباب عروسی نَه آگَردِه کَ، تا وختی راه نَه آرَستِه و بَر بِژنِه، اَلبَحَل بَری اَیی را آکَرِن. 37 خَسَه بِبو نوکَرونی که وختی چَوون اَرباب بومَی، اَوون آگا بِوینِه. حقیقتَن شِمَه نَه بَواتیم، چَوون خِدمت کَردِه را کَمَر دَوَسِه؛ اَوون سِفره سَری کا نِشونِه و بومَی و اَوون کا پذیرایی بَکَردی. 38 خَسَه بِبو اَ نوکَرونی که وختی چَوون اَرباب بومَی بِوینِه که اَوِن آگایی نَه، چِه نیمَه شَو بِبو و چِه صِبی سَر. 39 «امّا بِزونَه اَگم کَ صاحیب بَزنی که دِزد چِه ساعتی کا بومَی، نییَرزی دِزد چَیی کَ کا دِزدی بِکَرِه. 40 شِمَه نی بَسی حاضیر بِبییَه، چوم اِنسانی زوعَه، اَ ساعتی بومَی که شِمَه اِنتظار نِدارَه.» 41 پطرس واتِشه: «آقا، اِم مَثَّلی اَمَه را بَواتیش یا گِردی را؟» 42 عیسایِ خِداوند واتِشه: «بس اَ وَفادار و عقلمندَه مِتِر کییَه که چَیی اَرباب اَیی اِشتَن کَ نوکَرون سَرپرست بِکَرِه تا چَوون غذا سهمی موقع نَه اَوون آدَه؟ 43 خَسَه بِبو اَ نوکَری که وختی چَیی اَرباب بومَی، هَتَه که اَرباب واتَشه اَیی مشغول بِه کار بِوینِه. 44 حقیقتَن شِمَه نَه بَواتیم که چَیی اَرباب، اِشتَن دارایی گِردی آدَه چَیی دَس. 45 امّا اَگم اَ نوکَر اِشتَن نَه بوآجِه: ”چِمِن اَرباب عَری آکَردَشَه،“ و نوکَرون و خاتَکون بِژَنه، و بَرِه و بِنجِه و مستی بِکَرِه، 46 ایی روز که چَیی اِنتظاری نیشَه و اَ ساعتی که نیمَزنِه، اَ نوکری اَرباب بومَی و اَئی تیکه تیکه بَکَردی، و اَیی خیانت کارون نَه دَرَفَنه ایی جِگا دیلَه. 47 «نوکَری که اِشتَن اَربابی پیستَه بَزنی ولی اِشتَن آمادَه آنِکَرِه یا اِشتَن اَربابی پیستَه اَنجام نِده، بَرکَ لِسی بَردی. 48 امّا کسی که اِشتَن اَربابی پیستَه کا بیخَوَرَه و کاری بَکَردی که تَنبِه لایقَه، کَمتر لِس بَردی. هَر کسی که وِرتَر آدوعَه بِبو، بَیی کا وِرتَر طَلب بَبی؛ و هَر کسی وِرتَر دَسپاردَه بِبو، اَیی کا وِرتَر طلب بَبی. 49 «اَز اومَیمَه زَمینی کا آتشی روشون آکَرِم، و کَشکی تا حِسَه روشون آبی! 50 اَز ایلَه تعمیدی هِستِمَه که بَسی اَیی بِگِرِم و تا چَیی اَنجام دوعِه موقع وِر پَریشونیمَه! 51 بَگم خَیال بَکَردیرون اَز اومَیمه زَمینی کا صُلح و سلامتی بواَرِم؟ نِه، بَلکَم شِمَه نَه بَواتیم اومَیمَه تا جِدایی دَرَفَنم. 52 چوم چِمی پَش، پینج نفر ایلَه کَ آدَمون دیلَه کا تفرقه دَلَکِه؛ سِه نفر دِ نفری ضِد و دِ نفر سِه نفری ضِد بَبین. 53 چَوون دیلَه کا تفرقه دَلَکِه. دَده، زوعَه ضِد و زوعَه، دَده ضِد، نَنه، کِلَه ضِد و کِلَه، نَنه ضِد، خِسِرگ وَیو ضِد و ویو خِسِرگی ضِد.» زمانون تعبیر 54 هِنتَه نی عیسی مَردمی نَه واتِشه: «شِمَه وختی بَویندیرون که مَغریبی طرفی نَه خِری بومَی، اَلبَحَل بَواتیرون: ”وارِش بَوارستی،“ و وارِش نی بَوارستی. 55 و وختی بَویندیرون جنوبی طرفی نَه وا وَزِه، بَواتیرون: ”بَرکَ گَرمِشی بَبی،“ و هِنتَه نی بَبی. 56 اِی دِ دیمِن! شِمَه چاک بَزنیرون چِنتَه زَمین و آسِمونی وضعیتی تعبیر بِکَرَه، امّا چیرا نیمَزنَه چِنتَه اِم زمانی تعبیر بِکَرَه؟ 57 «چیرا اَ چیی که دُرستَه شِمَه را تَشخیص نِدییَه؟ 58 وختی که اِشتِه شاکی نَه بَشیش حاکِمی وَر، تَقَّلا بِکَه راه کا اَیی نَه آشتی بِکَری، نَبادا اِشتِه شاکی تِه بِبَره قاضی وَر و قاضی تِه آدَه ماموری دَس، و مامور تِه دَرَفَنِه زندانی کا. 59 حقیقتَن تِه نَه بَواتیم، تا آخِرین قِرونی آمَدَی، زِندانی کا بِرون نای.» |
@ 2024 Korpu Company