انجیل لوقا 1 - کتاب مقدس به زبان تالشی شمالیمقدمه 1 تِئوفیلوس خان، دا حِسَه وِر اَوَنِویسِن چییونی که چَمَه دیلَه کا اِتِفاق دَلَکه 2 درست هَتَه که کسونی که اَوّلی نَه اِشتَن چِمی نَه ویندَشونَه و خِدا کلامی خادِمون واسطه نَه بَمون دَسپَردِشونَه، نیویشتَشونَه. 3 اَز نی که گِردِ چییون اوّلی کا دقّتی نَه بَررسی کَردَمَه، اِنتَه صَلاح ویندِمَه اَوون منظم، تِئوفیلوس خان، بَه تِرا بینیویسِم. 4 تا مطمئن بِبییَه اَ چییونی که آموتَه رونَه درستَه. یحیی تعمید دَهنده دنیا اومِه پیشگویی 5 هیرودیسِ پاُتشا دورانی کا که یهودیه پاُتشا بَه، ایلَه کاهِنی زِندگی بَکَردی که چَیی نوم زکریا بَه. زکریا، اَبیّا گروه شِن بَه که یهودیون معبدی خادِم بینَه. زکریا ژِن نی هارونِ کاهِنی نَسلی کا بَه و چَیی نوم الیزابت بَه. 6 اَوِن هَر دِ نفر خِدا نَظری کا صالِح بینَه و خِداوندی گِرد اَحکام و دَستورون، بیدون کم و کَسری اَنجام بَداین. 7 امّا اَوِن خِردَنِشون نِبَه، چوم اِلیزابت نازا بَه و هَر دِ پیر بینَه. 8 ایی روز که زکریا گروه خدمتی نوبه بَه، و اَ، خِدا حضوری کا بِه عنوان کاهِن خِدمت بَکَردی، 9 طبق کاهِنون دَب قُرعه دَرَفَندِشونه و قُرعه زکریا نوم بَر اومَه که بِشو خِداوندی معبدی مقدّس جِگا دیلَه و بُخور بُوسونه. 10 بُخوری سوتِه وختی کا، جماعت گِرد بِرونی کا دعا بَکَردین 11 که ایی دفعه خِداوندی ایلَه مَلائیکه زکریا را آشکار آبَه و بُخوری سوتَه جِگا راستَه طرفی کا مَندَه. 12 زكریا، مَلائیکه ویندِه کا تَشویش آبَه و تَرس چَیی وجودی گِتِشه. 13 امّا مَلائیکه اَیی نَه واتِشه: «زكریا، مَتَرس! چوم که اِشتِه دعا مستجاب بییَه. اِشتِه ژِن اِلیزابت بَه تِرا ایلَه زوعَه ایی دنیا بواَردی و تِه چَیی نومی یَحیی پِنی. 14 تِه شادی و خوشحالی کا پور بَبیش و وِر کَسِن نی چَیی دنیا اومِه کا شاد بَبین، 15 چوم اَ، خِداوندی نظَری کا یال بَبی. یحیی نَبی هَرگز شَراو یا عرقی لِو بِژَنه. حتی اَ موقع نَه که اِشتَن نَنه اِشکمی کایَه، روح القدسی کا پور بَبی، 16 و وِر کَسون قوم اِسرائیلی کا خِداوند، چَوون خِدا طَرفی را آگاردِنِه. 17 یحیی اِشتَن خدمتی هَ روح و قدرتی نَه اَنجام بَدای که ایلیای پیغمبر اَنجام بَدای. اَ خِداوندی نارنارِه بومَی تا دَده اون دیلی بِه خِردَنون نِزدیک آکَرِه و یاغیون باموجِه که اِشتَن دَده اون شیوار خِداوندی نَه خِش بِبون، تا حاضیره قومی خِداوندی را آمادَه آکَرِه.» 18 زكریا، مَلائیکه کا دَفَرسِشه: «اِمی کیاکا بِزونِم؟ چوم که اَز پیرَه مِردیمَه، چِمِن ژِن نی پیرَه.» 19 مَلائیکه جَواو دوشَه: «اَز جِبرَ ائیلیمَه که خِدا حضوری کا بَمَندیم. حِسَه ویسا آبَییمَه تا بَه تِنَه گف بِژَنم و اِم خوشَ خَوَری بَه تِه آرِساوونِم. 20 دَیِس، تا روزی که اِم اِتِفاقِن دَلَکِن تِه لال بَبیش و نیمَشای گف بِژَنی، چوم چِمِن گفون که اِشتَن موقع کا اِتِفاق دَلَکِن، باوَر نِکَردِرَه.» 21 اِم میانَه کا، مردم زکریا منتظر بینَه و تَعَجبِشون کَردَه بَه که اَ، هِندی مَعبدی مقدّس جِگا دیلَه کا مَندَه. 22 وختی زکریا اومَه بِرون، نیمَشای اَوون نَه گَف بِژنی. بَس اَوِن زونِستِشونَه که معبدی مقدّس جِگا دیلَه کا رویایی ویندَشه، چوم فقط ایما اِشاره بَکَردی و نیمَشای گف بِژَنی. 23 زكریا اِشتَن خدمتی نوبتی تَمون آکَردِه پَش آگَردِستَه اِشتَن کَ. 24 اَ روزون پَش، زکریا ژِن، اِلیزابِت حامیله آبَه و پینج مانگ اِشتَن، مَردمی کا نِین آکَردِشه. 25 اِلیزابِت بَواتی: «خِداوند بَه مِرا اِم کاری کَردَشه. اِم روزون کا خِداوند بَه مِن لطف کَردَشه، و اَ چیی که مَردمی دیلَه کا چِمِن نَنگ بَه، پِگِتِشه.» عیسی دنیا اومِه پیشگویی 26 اِلیزابِتی حامیلگی شیشمین مانگی کا، جِبرئیلِ مَلائیکه خِدا طَرفی نَه ویسا آبَه ناصره شهری را جَلیلی ولایتی کا، 27 تا بِشو ایلَه باکِرَه کِلَه ای وَر که چَیی نوم مریم بَه. مریم یوسفی پیوندی بَه. یوسف داوود پُاتشاه نَسلی کا بَه. 28 مَلائیکه شَه مَریمی وَر و واتِشه: «سلام بَر تِه. اِی تِه که خِدا را عزیزیش، خِداوند بَه تِنَرَه!» 29 ولی مریم، مَلائیکه گفون دَرَسِه نَه وِر تَشویش آبَه و اِشتَن نَه فیکر کَردِشه که اِم چِنتَه رَه سلامی یَه. 30 مَلائیکه بَیی نَه واتِشه: «مریم، مَتَرس! چوم که تِه خِدا را عزیز بَییش. 31 دَیِس، تِه حامیله بَبیش، ایلَه زوعَه ایی دنیا بواَردیش و چَیی نومی عیسی پِنَی. 32 اَ یالَه مِردی بَبی و بَیی نَه خِدای متعالی زوعَه بَواتین. خِداوندخِدا چَیی جَدّ، داوودی پاُتشایی یَه تَختی بَیی آدَه. 33 اَ تا اَبَد یَعقوبی نَسلی سَر، سلطنت بَکَردی و چَیی پاُتشایی هَرگز تمون آنییَب.» 34 مریم مَلائیکه کا دَفَرسِشه: «اِم چِنتَه مُمکینَه؟ چوم که از باکِرَه ایمَه.» 35 مَلائیکه جَواو دوشَه: «روح القدس بَه تِن نازِل بَبی و خِدای متعالی قدرت بَه تِن سا دَرَفنِه. اِمی واسِی اَ خِردَنی نَه، مقدّس و خِدا زوعَه بَواتین. 36 دَیِس، اِشتِه خویش اِلیزابِت نی اِشتَن پیری کا حامیله یَه و زوعَه ایی اِشتَن اِشکَمی کا هِستِشه. ها، اَ کسی که اِشتَن نازا بییِه واسی مردمی زوونون سَر دَلَکه بَه، حِسَه شیش مانگه حامیله یَه. 37 چوم خِدا را هیچ کاری محال نییَه!» 38 مریم واتِشه: «اَز خِداوندی خاتَکیمَه. هَر چیی چِمِن درباره واتَرَه، هَتَه بِبو.» اَ موقع مَلائیکه چَیی وَری نَه شَه. مریمی دیدار الیزابتی کا 39 اَ روزن کا، مریم پِرشتَه و تاویستِه نَه شَه شَهری را که یهودیه کوعاتی کا بَه. 40 مریم شَه زكریا کَ دیلَه و اِلیزابِتی را سلام كَردِشه. 41 وختی اِلیزابِت، مریمی سلامی دَرَسِشَه، خِردَن چَیی اِشکَمی کا تَکان هَردِشه و اِلیزابِت روح القدسی کا پور آبَه، 42 و بِلَنده سَسی نَه واتِشه: «تِه ژِنَکون دیلَه کا مُتوارکیش و اَ خِردَنی که اِشتِه اِشکَمی کایَه نی مُتوارکَه! 43 اَز کی ایمَه که چِمِن سَروَری نَنه با چِمِن وَر؟ 44 چوم وختی که اِشتِه سَلامی سَس چِمِن گوش آرَستَه، خِردَن شادی کا چِمِن اِشکَمی کا تَکان هَردِشَه. 45 خَسَه بِبو اَ ژِنی که باوَر کَردِشه اَ چیی که خِداوندی طرفی نَه بَیی نَه واتَه بییَه، اَنجام بَبی.» مریم خِداوندی ستایش بَکَردی 46 مریم واتِشه: «چِمِن جان، خِداوندی سِتایش بَکَردی 47 و چِمِن روح چِمِن نِجات دَهنده کا که خِدا یَه، شادی بَکَردی، 48 چوم که اَ، اِشتَن خاتَکی، ناچیز بییِه نظر دَرَفَندَشه. چِمی پَش، گِردِ نَسلِن مِنه خَسَه بَخت بَواتین، 49 چوم اَ که قادرَه، بَه مِرا یالَه کارونی کَردَشه، چَیی نوم قدوسَه. 50 چَیی رحَمت، پِشت دَر پِشت، کَسونی را بَبی که بَیی حُرمت بَکَردین. 51 خِداوند اِشتَن بازو نَه، قدرتمندَه کارون کَردَشه و کسونی که اِشتَن دیلی فیکرون کا مُتِکَبِری نَه، وِلا آکَردَشَه؛ 52 قُدرتمَندون چَوون پاُتشایی یَه تختی کا جیر وَردَشه و فروتَنون سَر بِلَند آکَردَشَه؛ 53 وِشیون چاکَه چییون نَه سیر آکَردَشَه ولی ثیروتمندون تِیه دَس ویسا آکَردَشَه. 54 اَ اِشتَن، رَحمتی ویر وَردَشه، و اِشتَن بَندَه، قوم یهودی کمک کَردَشه، 55 هَتَه که چَمَه اَجداد، یعنی اِبراهیم پیغمبر و چَیی نسلی، وعده دوعَش بَه که تا اَبَد اِنتَه بِکَرِه.» 56 مریم تَقریبا سِه مانگ اِلیزابِتی وَری کا مَنده و دومله آگَردِستَه اِشتَن کَ. یحیی دنیا اومِه 57 اِلیزابِتی زایمانی وَخت آرَستَه و ایلَه زوعَه ایی دنیا وَردِشه. 58 وختی چَیی خَمسوعه اِن و چَیی خویشِن دَرَسِشونَه که خِداوند چِه یالَه رَحمتی اِلیزابِتی را کَردَشه، اَیی نَه شادی کَردِشونَه. 59 هشتمین روزی کا، اومینَه خِردَنی خَتنَه بِکَرِن و پیستِشونَه خِردَنی دَده نومی که زکریا بَه، خِردَنی کا پِنَن. 60 امّا خِردَنی نَنه واتِشه: «نِه! چَیی نوم بَسی یَحیی بِبو.» 61 اَوِن واتِشونَه: «اِشتِه قوم و خویشون دیلَه کا هیچکس اِنتَه رَه نومی نیشَه.» 62 بَس ایما اشاره نَه، خِردَنی دَده کا دَفَرسِشونَه که پیستِشَه چَیی نومی چِه پِنَه. 63 زکریا پیستِشَه ایلَه تَخته ای نیویشتِه را اَیی را بواَرِن و اَ تَخته سَری کا نیویشتِشه: «چَیی نوم یَحیی یَه!» گِرد تعجب کَردِشونَه. 64 دَر دَم زکریا زَوون آبَه و خِدا ستایش کَردِشه. 65 گِردِ چَوون خَمسوعه اون جانی کا ترس دَلَکه. یهودیه کوعاتی سرتاسری کا، مردم، گِردِ اِم چییون درباره گف ژَنین. 66 هَر کسی اِم گفون دَرَسی، اِشتَن نَه فیکر بَکَردی که: «اِم خِردَن آیَنده کا چِه بَبی؟»چوم خِداوندی دَس چَیی همراه بَه. زکریا نبوّت 67 اَ موقع خِردَنی دَده، زکریا، روح القدسی نَه پور آبَه و اِنتَه نبوّت کَردِشه: 68 «مُتِوارک بِبو اِسرائیلی خِداوندخِدا. چوم اِشتَن قومی کمکی را اومَه و چَوون آزادی خِرییَشه. 69 اَ اِشتَن نوکر، داوود پاُتشا نَسلی کا، قدرتمنده نِجات دَهنده ای اَمَه را ویسا آکَردَشَه. 70 درست هَتَه که قدیمی کا اِشتَن مقدّس پیغمبرون زوونی کا وعده دوعَش بَه که 71 اَمَه، چَمَه دِشمنون و گِرد کَسونی دَسی کا که اَمَه کا بیزاری نَه نجات بِدَه، 72 تا اَ رَحمتی که چَمَه اَجَدادی وَعده دوعَش بَه، اَنجام بِدَه و اِشتَن مقدّس عَهدی ویر بوعَرِه؛ 73 و هَ قَسَّمی بِه جا بوعَرِه که چَمَه جَدّ، اِبراهیمی را هَردَشه، 74 که اَمَه چَمَه دِشمنون دَسی کا آزاد آکَرِه، تا اَمَه بیدون هیچ واهیمه ای، اَیی عبادت بِکَرَم، 75 چَیی حضوری کا، قدّوسیت و صالِحی نَه، تا عُمرِمون اِستَه. 76 و تِنَه، اِی خِردَن، خِدای متعالی پیغمبر بَواتین؛ چوم خِداوندی نارنارِه بَشیش تا چَیی راه حاضیر آکَری، 77 و چَیی قومی خَوَردار بِکَری که چَوون گناه اون بَخشِستَه بییِه نَه، اَوِن نجات پیدا بَکَردین. 78 چوم چَمَه خِدا رَحم و دیلَسوجی واسی یَه که، صِبَ آفتاو آسمونی کا اَمَه را پِرا 79 تا کَسونی را دَتاوِه که تاریکی کا و مَرگی سا دیلَه کا اینَه، و چَمَه قَدمون صُلح وسلامتی یَه راه دیلَه را هِدایت بِکَرِه.» 80 و امّا اَ خِردَن یال آبی و روح کا قوی بَبی و تا روزی که قوم اِسرائیلی را آشکارا ظاهر آبو، ویاوونی کا زندگی بَکَردی. |
@ 2024 Korpu Company