یوحنا 21 - کتاب مقدس به زبان تالشی شمالی

عیسی آشکار آبییِه هفت گِله شاگِردون را

¹ اِم اِتِفاقون پَش، عیسی هَنی تیبِریه دریاچه کَناری کا اِشتَن، شاگِردون را آشکار آکَردِشه. اَ اِنتَه اِشتَن آشکار آکَردِشه،

² ایی روز شمعون پطرس، توما که اَیی نَه دوقلو نی بَواتین، نَتَنائیل قانا دِه اَهالی کا که جَلیلی ولایتی کا بَه، زِبِدی زوعَه اِن و دِ گِله شاگرد دییر، یَندی نَه بینَه.

³ شمعون پطرس اَوون نَه واتِشه: «اَز کارا بَشیم مایَه گِری.» اَوِن واتِشونَه: «اَمَه نی تِنَه بومَیمون.» بَس شینَه بِرون، لوتکا دَنِشتینَه. امّا هَ شَوی کا چیی صِید نِکَردِشونَه.

⁴ صِبی سَر، عیسی ساحلی کا مَندَه بَه؛ امّا شاگِردِن نِزونیشونَه که اَ عیسی یَه.

⁵ عیسی اَوون نَه واتِشه: «خِردَنِن، هیچ مایی گِتَرونَه؟» اَوِن جَواو دوشونَه «نِه!»

⁶ عیسی اَوون نَه واتِشه: «ماشکی دَرَفَنه لوتکا راستَه طرفی را تا مایی بِگِرَه.» اَوِن دَرَفَندِشونَه و هَدَه مایی وِر بَه که نیمَشاین ماشکی بواَرین لوتکا دیلَه.

⁷ شاگِردی که عیسی اَیی نَه خِش بَه، پطرسی نَه واتِشه: «اِم خِداوندَه!» شَمعون پطرس وختی دَرَسِشَه که خِداوندَه، اِشتَن خَلا دَکَردِشه- چوم که کاری واسی اَوون بَروردَش بَه- و اِشتَن دَرَفَندِشِه دریاچه دیلَه.

⁸ امّا اَ ایلَه شاگِردِن لوتکا نَه اومینَه، هَتَه که ماشکی که مایی نَه پور بَه اِشتَن نَه دَرونجین، چوم خِشکی کا دور نِبینَه بَلکَم چَوون فاصله ساحِلی نَه صد متر بَه.

⁹ وختی اَوِن آرَستینَه خِشکی، ویندِشونَه که زغالی نَه آتش روشونَه و اَیی کا مایی نوعَه بییَه، و نون نی اِستَه.

¹⁰ عیسی اَوون نَه واتِشه: «اَ مایی اون کا که حِسَه گِتَرونَه، بوعَرَه.»

¹¹ شمعون پطرس شَه لوتکا دیلَه و ماشکی دَرونِتِشه ساحلی را. ماشک یالَه مایی اون نَه پور بَه، چَوون تعداد صَد و پینجا و سِه گِله مایی بَه. با اِم که مایی اون تعداد هِندی وِر بَه، ماشک پَله نِبَه.

¹² عیسی اَوون نَه واتِشه: «بایَه قِیله ناهار بَرَه.» هیچ گِله شاگِردون کا جِکَه نِکَردِشونَه اَیی کا دَفَرسِن، «تِه کییش؟» چوم بَزنین که خِداوندَه.

¹³ عیسی اومَه، نون و مایی پِگِتِشه و اَوون آدوشَه.

¹⁴ اِم سوّمین کَرَه بَه که عیسی زِندَه آبییِه پَش، اِشتَن شاگِردون را آشکار آبی.

عیسی و پطرس

¹⁵ قِیله ناهارَه پَش، عیسی، شمعون پطرسی نَه واتِشه: «اِی شمعون، یوحنا زوعَه، تِه مِنَه اِمون کا وِرتَر خِشییش؟» شمعون پطرس، عیسی نَه واتِشه: «بله آقا؛ تِه بَزنیش که تِنَه خِشیمَه.» عیسی اَیی نَه واتِشه: «چِمِن وَرَه اوون خوراک بِدَه.»

¹⁶ دومین کَرَه عیسی، شمعون پطرسی نَه واتِشه: «اِی شمعون، یوحنا زوعَه، مِنَه خِشیش؟» اَ عیسی نَه واتِشه: «بله آقا؛ بَزنیش که تِنَه خِشیمَه.» عیسی اَیی نَه واتِشه: «چِمِن گوسَندون رَسیدگی بِکَه.»

¹⁷ سوّمین کَرَه عیسی، شمعون پطرسی نَه واتِشه: «اِی شمعون، یوحنا زوعَه، مِنَه خِشیش؟» پطرس اِمی واسی که عیسی سِه کَرَه اَیی کا دَفَرسِشه، «مِنَه خِشیش؟» ناراحت آبَه و واتِشه: «آقا، تِه گِردِ چییون کا خَوَرِر هِستَه؛ تِه بَزنیش که تِنَه خِشیمَه.» عیسی واتِشه: «چِمِن گوسَندون خوراک بِدَه.

¹⁸ حقیقتن، تِنَه بَواتیم، وختی که جَوونتَر بیش اِشتِه کَمری دَوَسیش و هَر جِگا که پیستِرَه بَشیش؛ امّا وختی پیر آبیش اِشتِه دَسون آکَری و ایی نفر دییَر اِشتِه کَمری دَوَسِه، تِه بَبَردی جِگایی را که نِپیستِرَه بِشی.»

¹⁹ عیسی اِمی واتِشه تا نِشون بِدَه پطرس چِنتَه بَمَردی که خِدا جلال بِدَه. دومله عیسی اَیی نَه واتِشه: «چِمِن دومله بِری.»

²⁰ اَ موقع پطرس آگَردِستَه و ویندِشه اَ شاگردی که عیسی اَیی نَه خِشَه چَوون دومله بومَی. یعنی هَ کسی که سوری موقع عیسی کا تَکیَه ژَندِشَه و اَیی کا دَفَرسِشَه: «آقا، کییَه که بَه تِن خیانت بَکَردی؟»

²¹ وختی که پطرس اَیی ویندِشه، عیسی کا دَفَرسِشه: «آقا، بَس اَ چِه بَبی؟»

²² عیسی، پطرسی نَه واتِشه: «اَگم اَز بِپیم تا چِمِن آگَردِستِه موقع اَ زِندَه بَمَندی، تِه چِه کارِر هِستَه؟ تِه چِمِن دومله بِری!»

²³ بَس اِم گف بِرا اون دیلَه کا شایعه آبَه که اَ شاگِرد نِمِرِه، در حالی که عیسی پطرسی نَه نواتِشه که اَ نِمِرِه، بَلکَم واتِشه: «اَگم اَز بِپیم تا چِمِن آگَردِستِه موقع اَ زِندَه بَمَندی، تِه چِه کارِر هِستَه؟»

²⁴ اِم هَ شاگِردَه که اِم چییون را شهادتی بَدای و اِمون نیویشتَشَه. اَمَه بَزنیمون که چَیی شهادتی راستَه.

²⁵ عیسی وِر کارون دییر نی کَردَشه که اَگم ایلَه ایلَه نیویشته بِبی، گَمون نِکَرِم که حتی گِرد دنیا نی بِشای اَ نیویشته اون اِشتَن دیلَه کا جِگا بِدَه.