یوحنا 20 - کتاب مقدس به زبان تالشی شمالیعیسی زِندَه آبییِه 1 هفته اوّلین روزی کا، صِبی سَر، وختی که هَوا حَلا تاریک بَه، مریم مَجْدَلیّه اومَه مَقبره وَر و ویندِشَه که سِنگ مَقبره بَری پیشی کا پِگِتَه بییَه. 2 بَس مریم ویریتَه شَه شمعون پطرسی وَر و اَ ایلَه شاگِرد که عیسی اَیی نَه خِش بَه، و اَوون نَه واتِشه: «آقا مَقبره کا پِگِتَشونَه و نیمَزنَم کییا کا نوعَشونَه.» 3 بَس پطرس اَ ایلَه شاگِردی همراه اومَه بِرون، شینَه مَقبره طرفی را. 4 و هَر دِ نفر یَندی نَه کارا ویریتین؛ امّا اَ ایلَه شاگِرد پطرسی کا پیش دَلَکه و اوّل آرَستَه مَقبره سَر. 5 بَس شَت آبَه، مَقبره دیلَه دَیشتَه و ویندِشه که کَفَنی پارچه اِن اوآ کا اینَه، امّا مَقبره دیلَه نِشه. 6 دومله شَمعون پطرس نی چَیی دومله اومَه و شَه مَقبره دیلَه، ویندِشه که کَفَنی پارچه اِن اوآ کا اینه، 7 امّا دَسمالی که عیسی سَری دوری کا دَوَستَشون بَه کَفَنی پارچه اون کَناری کا نِبَه، بَلکَم سیوا دَسته بییَه و دییر جِگایی کا نوعه بَه. 8 بَس اَ ایلَه شاگِرد نی که اوّل آرَستَه بَه مَقبره وَر، اومَه دیلَه و ویندِشه و ایمان وَردِشه. 9 چوم حَلا شاگِردِن مقدّس نیویشته اون دَرک کَردَشون نِبَه که اَ مَرده پَش بَسی زِندَه آبو. 10 اَ موقع اَ شاگِردِن آگَردِستینَه اِشتَن کَ. عیسی آشکار آبییَه مریم مَجْدَلیّه را 11 و امّا مریم مَقبره بِرونی کا مَندَه و داد بَکَردی. هَتَه که داد بَکَردی شَت آبَه تا مَقبره دیلَه دَیِسه. 12 اَ موقع دِ گِله مَلائیکه ویندِشه که اِسبیَه خَلاشون دَکَردَه بَه و اوآ که عیسی جنازه نوعَه بَه، ایلَه چَیی سَری جِگا کا و اَ ایلَه چَیی پایون جِگا کا نِشت بینَه. 13 اَ مَلائیکه اِن مریمی نَه واتِشونَه: «اِی ژِن، چیرا داد بَکَردیش؟» مریم جَواو دوشَه: «چِمِن آقا پِگِتَشونَه و نیمَزنِم کییا کا نوعشونَه.» 14 وختی اِمی واتِشه، آگَردِستَه و ویندِشه عیسی اوآ کا مَندَه، امّا آنِزونستِشه که اَ عیسی یَه. 15 عیسی اَیی نَه واتِشه: «اِی ژِن، چییرا داد بَکَردیش؟ چیکی دومله گَردی؟» مریم خَیال بَکَردی که اَ باغَوونَه، اَیی نَه واتِشه: «آقا، اَگم تِه اَیی پِگِتَره بَردَره، مِنَه بوآج کییا کا نواَرَه تا بِشوم و اَیی پِگِرِم.» 16 عیسی مریمی نَه واتِشه: «مریم!» مریم اِشتَن چَیی طرفی را آگردَه و عِبرانی زوونی نَه واتِشه: «رَبّونی!» (یعنی اُستاد). 17 عیسی اَیی نَه واتِشه: «بَه مِن دَس مَژَن، چوم حَلا دَده وَر کفا را شَه نیمَه. امّا بِش چِمِن بِرا اون وَر و اَوون نَه بوآج که چِمِن دَده وَر و شِمَه دَده وَر، چِمِن خِدا وَر و شِمَه خِدا وَر بَشیم کفا.» 18 مریم مَجْدَلیّه شَه و شاگِردون را خَوَر دوشَه که «اَز خِداوَندی ویندَمه!» و اَ چیی که اَیی نَه واتَش بَه، اَوون نَه واتِشه. عیسی اِشتَن شاگِردون را آشکار آکَرِه 19 هَ روزی مَغریبی را، که هفته اوّلین روز بَه، شاگِردِن یهودیون تَرسی کا بَرون قِفل کَردَشون بَه و کَ دیلَه کا جمع آبَه بینَه که عیسی اومَه و چَوون دیلَه کا مَندَه و واتِشه: «سلام بَر شِمَه!» 20 وختی اِمی واتِشه، اِشتَن دَسون و اِشتَن تَکی اَوون نِشون دوشَه. شاگِردِن خِداوندی ویندِه نَه شاد آبینَه. 21 عیسی هَنی اَوون نَه واتِشه: «سلام بَر شِمَه! هَتَه که دَده مِن وَیسا آکَردَشَه، اَز نی شِمَه ویسا آکَرِم.» 22 وختی اِمی واتِشه، فو دَکَردِشه و واتِشه: «روح القدسی ویگِرَه. 23 اَگم شِمَه کسی گناه اون بِبَخشه، اَوون را بَخشِسته بَبی؛ و اَگم کسی گناه اون مَبَخشه، بَخشِسته نییَب.» عیسی و توما 24 وختی که عیسی اومَه، توما، ایلَه اَ دونزَه گِله شاگِردون کا، که اَیی نَه دوقلو نی بَواتین، چَوون همراه نِبَه. 25 بَس دییَر شاگِردِن توما نَه واتِشونَه: «خِداوندی ویندَمونَه!» امّا توما اَوون نَه واتِشه: «تا از اِشتَن، مِخون جِگا چَیی دَسون کا مَوینِم و چِمِن اَنگِشتی مِخون جِگا دیلَه کا مَژنِم و چِمِن دَسی چَیی تَکی خِلی کا مَنَم، باوَر نِکَرِم.» 26 هَشت روزَه پَش، عیسی شاگِردِن هَنی کَ کا بینَه و توما اَوون نَه بَه. هَتَه که بَرِن قِفل بینَه، عیسی اومَه دیلَه و چَوون دیلَه کا مَندَه و واتِشه: «سلام بَر شِمَه!» 27 اَ موقع عیسی، توما نَه واتِشه: «اِشتِه اَنگِشتی اییا کا بِنَه و چِمِن دَسون بِوین، و اِشتِه دَسی بوعَه پیش و چِمِن تَکی خِلی کا بِنَه و بی ایمان مَبِن، بَلکَم ایمان بِدار.» 28 توما عیسی نَه واتِشه: «چِمِن خِداوند و چِمِن خِدا!» 29 عیسی واتِشه: «چوم مِن ویندِرَه ایمان وَردِرَه؟ خَسَه کسونی بِبو که نَدید ایمان بوعَرِن.» اِم کتابی هدف 30 عیسی وِر علامت و معجزه اون دییَری شاگِردون ناری کا اَنجام دوشَه که اِم کتابی کا نیویشته بییَه نییَه. 31 امّا اِمِن نیویشته بینَه تا باوَر بِکَرَه که عیسی هَ مسیح موعودَه، عیسی خِدا زوعَه یَه، و تا اِم باوَری نَه چَیی نومی کا زندگی بِدارَه. |
@ 2024 Korpu Company