یوحنا 18 - کتاب مقدس به زبان تالشی شمالیعیسی دَستگیر بییِه 1 عیسی اِم گَفون پَش، اِشتَن شاگِردون نَه شَه قِدْرونی دَرَّه اَ طرفی را. اوآ کا ایلَه باغی بَه، و عیسی و چَیی شاگِردِن دَشینَه باغی دیلَه. 2 یهودا، کسی که بِه عیسی خیانت کَردَش بَه نی، اَ مَله آزونی، چوم عیسی و چَیی شاگِردِن معمولا اوآ کا جَمع آبین. 3 بَس یهودا ایی گروه، سَربازون و مأمورونی که سَران کاهنِن و فریسی فِرقه عُلما طرفی کا بینَه، پِگِتِشه، اومینَه اَ باغی را. اَوِن، فانوسون و مشعلون و سِلاحون نَه، شینَه اوآ. 4 عیسی، با اِم که گِرد چییونی که چَیی سَر بومَی بَزنی، شَه پیش و اَوون نَه واتِشه: «چیکی دومله گَردَه؟» 5 اَوِن جَواو دوشونَه: «عیسای ناصری.» عیسی اَوون نَه واتِشه: «اَز هَ اِستیمَه.» یهودا، اَ کسی که بِه عیسی خیانت کَردِشه نی اَوون نَه مَند بَه. 6 وختی عیسی اَوون نَه واتِشه: «اَز هَ اِستیمَه،» اَوِن پَش پَشَکه شینَه بَلَکینَه زمینی سَری کا. 7 بَس هَنی عیسی اَوون کا دَفَرسِشه: «چیکی دومله گَردَه؟» اَوِن واتِشونَه: «عیسایِ ناصری.» 8 عیسی جَواو دوشَه: «شِمَه نَه واتِمه که اَز هَ اِستیمَه. بَس اَگم چِمِن دومله گَردَه، بِدارَه اِمِن بِشون.» 9 اِمی واتِشه تا اَ چیی که پیشتری واتَش بَه اِتِفاق دَلَکه که: «هیچ گِله اَ کسونی که مِن آدوعَه رَه، ایلَه نی اَز دَس دوعَه نیمَه.» 10 اَ موقع شمعون پطرس ایلَه قَمّه ای که اِشتَنَش اِستبَه، پِگِتِشه و ایلَه ضربه ژَندِشَه کاهن اَعظمی نوکَری و چَیی راست گوشی دَوِردِشه. اَ نوکَری نوم مالخوس بَه. 11 عیسی پطرسی نَه واتِشه: «اِشتِه قَمّه بِنَه چَیی جِگاکا! مَگم نَبی جامی که دَده مِن آدوعَشه، بِنجِم؟» 12 اَ موقع گروه سَربازِن، اِشتَن فرمانده همراه و یهودیون مأمورون نَه عیسی دَستگیر کَردِشونَه و اَیی دَوَستِشونَه. 13 اَوِن اوّل عیسی بَردِشونَه حَنّا وَر. چوم که حنّا، قیافا ژِن دَده بَه، که اَ سالی کا قیافا قومی کاهن اَعظم اِستبَه. 14 قیافا هَ کسی بَه که یَهودییون نَه واتِشه چاکتَرَه که ایی نفر مردمی راه کا فیدا بِبو. پطرس عیسی اِنکار بَکَردی 15 شمعون پطرس و ایلَه دییر شاگِرد شینَه عیسی دومله. چوم که اَ شاگِرد، کاهن اَعظمی آشنایون کا بَه، عیسی نَه دَشَه کاهن اَعظمی کَ سِرا دیلَه. 16 امّا پِطرس بَری پِشتی کا مَندَه. بَس اَ ایلَه شاگِرد که کاهن اَعظمی آشنایون کا بَه، شَه بِرون و ژِنی نَه که بَره پا بَه، گَف ژَندِشَه و پطرسی بَردِشه دیلَه. 17 اَ خاتکی که بَره پا بَه پطرسی کا دَفَرسِشه: «تِه نی اَ مِردی ایلَه شاگِردون کا که نییش، اِستیش؟» پطرس جَواو دوشَه: «نیمَه.» 18 هَوا سَرد بَه. نوکَرِن و مأمورِن زغالی نَه آتش روشون آکَردَشون بَه و چَیی دوری کا پا مَنده بینَه و اِشتَن گَرم آکَرین. پطرس نی اَوون نَه مَند بَه و اِشتَن گَرم آکَری. 19 اَ موقع کاهن اَعظم عیسی کا، چَیی شاگِردون و چَیی تعلیمون درباره دَفرسِشه. 20 عیسی جَواو دوشَه: «اَز دنیا نَه آشکار گَف ژَندِمَه. اَز هَمیشه عِبادتگاه اون و معبدی کا که یَهودیون جمع آبَه جِگایَه، تعلیم دوعَمَه و چیی خَلوَتکی واتَه نیمَه. 21 چیرا مِن کا دَفَرسی؟ اَوون کا دَفَرس که چِمِن گفون دَرَسَشونَه! اَوِن بَزنین چِه واتَمَه.» 22 وختی عیسی اِم چییون واتِشه، ایلَه اَ مامورون کا که اوآکا مَند بَه، عیسی دیمی کا ایلَه سیله ژَندِشَه و واتِشه: «کاهن اَعظمی جَواوی اِنتَه بَدایش؟» 23 عیسی جَواو دوشَه: «اَگم چیی که واتِمَه اِشتبایَه، چِمِن اِشتباه ثابت بِکَه؛ امّا اَگم چیی که واتَمَه راستَه، چییرا مِن ژَنی؟» 24 اَ موقع حَنّا اَیی دَوَسته دَس ویسا آکَردِشه قیافا وَر که کاهن اَعظم بَه. 25 هَتَه که شمعون پطرس مَند بَه و اِشتَن گَرم آکَری، اَوِن پطرسی نَه واتِشونَه: «تِه نی ایلَه چَیی شاگِردون کا که نییش، اِستیش؟» پطرس اِنکار کَردِشه و واتِشه: «نیمَه.» 26 کاهن اَعظمی ایلَه نوکَرون کا که اَ کسی خویشون کا بَه که پطرس چَیی گوشی دَوِردش بَه، دَفَرسِشه: «مَگم اَز اِشتَن تِه اَیی نَه اَ باغی دیله کا نِویندِمَه؟» 27 پطرس هَنی اِنکار کَردِشه. هَ لحظه سوک خَندِشه. عیسی و پیلاتُس 28 دومله اَوِن عیسی، قیافا کَ نَه بَردِشونَه والی کاخی را. صِبی سَر بَه. اَوِن اِشتَن نِشینَه والی کاخی دیلَه تا نِجس آمَبون و بِشان پِسَخ عیدی سوری بَرِن. 29 بَس پیلاتُس اومَه بِرون چَوون وَر و دَفَرسِشه: «چِه اِتهامی اِم مِردی ضِد هِستِرونَه؟» 30 اَوِن جَواو دوشونَه: «اَگم اِم مِرد شرورانَه کاری کَردَش نِبَه که، اَمَه اَیی نِوَریمون بَه تِن تحویل بِدییَم.» 31 پیلاتُس اَوون نَه واتِشه: «شِمَه اِشتَن اَیی بِبَره و بینا بِه شِمَه شَریعت اَیی محاکمه بِکَرَه.» یَهودییِن واتِشونَه: «اَمَه اِجازه نیمونَه کسی مرگی را محکوم بِکَرَم.» 32 اِنتَه بَه تا عیسی اَ گفی که واتِشه چِنتَرَه مرگی نَه بَمَردی، اِتِفاق دَلَکه. 33 دومله پیلاتُس هَنی آگَردِستَه کاخی را و عیسی دَخوندِشه، و اَیی نَه واتِشه: «تِه یهودیون پاُتشاایش؟» 34 عیسی جَواو دوشَه: «اِمی تِه اِشتَن کا بَواتیش، یا خَلک چِمِن درباره تِنَه واتَشونَه؟» 35 پیلاتُس جَواو دوشَه: «مَگم اَز یهودی ایمَه؟ اِشتِه میلّت و سَران کاهِنِن، تِه بَه مِن تحویل دوعَشونَه؛ چِه کَردَرَه؟» 36 عیسی جَواو دوشَه: «چِمِن پاُتشایی اِم دنیا شِن نییَه. اَگَم چِمِن پاُتشایی اِم دنیا شِن بِبی، چِمِن نوکَرِن بَجَنگِستین تا مِن دَوَسته دَسی نَه یهودیون تحویل مَدَن. امّا چِمِن پاُتشایی اِم دنیا شِن نییَه.» 37 دومله پیلاتُس عیسی نَه واتِشه: «بَس تِه ایلَه پاُتشا ایش؟» عیسی جَواو دوشَه: «تِه بَواتیش که اَز پاُتشاایمه. اَز اِمی واسی متولد بَه ایمَه و اِمی واسی بِه اِم دنیا اومَیمَه تا حقیقتی را شهادت بِدَم. بَس هَر کسی که حقیقتی شِنَه، چِمِن گفی گوش بَدای.» 38 پیلاتُس اَیی نَه واتِشه: «حقیقت چَه؟» وختی اِمی واتِشه، هَنی شَه بِرون یهودیون وَر و اَوون نَه واتِشه: «اَز هیچ تَقصیری اَیی کا تِلفتَم نییَه. 39 امّا شِمَه را دَبی اِستَه که اَز بَسی پِسَخ عیدی کا ایلَه زندانی شِمَه را آزاد آکَرِم. حِسَه پیستِرونَه یهودییون پاُتشا شِمَه را آزاد آکَرِم؟» 40 اَوِن هَنی خِلِع ژَندِشونَه و واتِشونَه: «اِم مِردی نِه، باراباسی آزاد آکَه!» باراباس ایلَه راهزن بَه. |
@ 2024 Korpu Company