یوحنا 17 - کتاب مقدس به زبان تالشی شمالیعیسی دعا بَکَردی 1 اِم گَفون پَش، عیسی آسِمونی دَیشتَه و واتِشه: «دَده، اَ وخت آرَستَه. اِشتِه زوعَه جلال بِدَه تا اِشتِه زوعَه نی تِه جلال بِدَه. 2 چوم تِه گِرد اِنسانون اِختیاری بَیی دَسپاردَره تا گِرد کسونی که اَیی آدوعَرَه، اَبَدی یَه زندگی بِبخشه. 3 و اَبَدی یَه زندگی اِمَه که، اَوِن فقط تِه که خِدای یگانه حقیقییش، و عیسایِ مسیحی که تِه اَیی ویسا آکَردَرَه، آزونِن. 4 اَز اَ کاری که تِه مِن دَسپاردَره، تمون آکَرِم، و اِنتَه تِه زَمینی کا جلال دوعَمَه. 5 بَس حِسَه تِه اِی دَده، مِن اِشتِه حضوری کا جلال بِدَه، بِه جلالی که پیش اَز اِم که دنیا بِه وجود با بَه تِنَه داریم. 6 «اَز اِشتِه نومی مردمی را که دنیا کا بَه مِن بَخشِستَره، آشکار آکَردَمه. اَوِن اِشتِه شِن بینَه و تِه اَوون مِن بَخشِستَره، و اِشتِه کلامی اَنجام دوعَشونَه. 7 حِسَه اَوِن بَزنین که هَر چِه که بَه مِن بَخشِستَره، اِشتِه طرفی نَه یَه. 8 چوم کلامونی که تِه مِن آدوعَرَه، اَز آدوعَمَه اَوون، و اَوِن اَیی قبول کَردِشونَه و حقیقتن فَهمستَشونَه که اِشتِه وَری نَه اومَیمَه، و باوَر کَردِشونَه که تِه مِن ویسا آکَردَرَه. 9 اَز اَوون را دعا بَکَردیم، اَز دنیا را دعا نِکَرِم، بَلکَم کسونی را دعا بَکَردیم که تِه مِن آدوعَرَه، چوم اَوِن اِشتِه شِن اِستینَه. 10 هَر چِه چِمِن شِنَه، اِشتِه شِنَه و هَر چِه اِشتِه شِنَه، چِمِن شِنَه؛ و اَز اَوون کا جلال گِتَمَه. 11 اِمی کا وِرتر دنیا کا نِمونِم، امّا اَوِن دنیا کااینَه؛ اَز بومَیم اِشتِه وَر. اِی دَده ی قدّوس، کسونی که تِه مِن دَسپاردَره، اَوون اِشتِه نومی کا حفظ بِکَه تا یَکی بِبون، اِنتَه که اَمَه یَندی نَه یَکی ایمونَه. 12 تا وختی که اَز اَوون نَه بیمَه، کسونی که مِن دَسپاردَره، اِشتِه نومی کا حفظ کَردِمَه. اَز اَوون کا محافظت کَردَمَه و هیچ گِله اَوون کا هلاک نِبَه، مَگم اَ هلاکتی زوعَه غِیراز، تا مقدّس نیویشته اون پیشگویی اِتِفاق دَلَکِه. 13 امّا حِسَه بومَیم اِشتِه وَر، و اِم گَفون وختی بَواتیم که حَلا دنیا کا ایمَه، تا چِمِن شادی اِشتَن کا کامل بِدارِن. 14 اَز اِشتِه کلامی اَوون آدوعَمَه، امّا اِم دنیا اَوون کا بیزار بَه، چوم اِم دنیا شِن نینَه، اِنتَه که اَز اِم دنیا شِن نیمَه. 15 چِمِن پیستَه اِم نییَه که اَوون اِم دنیا کا بِبَری، بَلکَم پیستِمَه اَ شَریری کا اَوون حفظ بِکَری. 16 اَوِن اِم دنیا شِن نینَه، هَتَه که اَز نی اِم دنیا شِن نیمَه. 17 اَوون حقیقتی کا تَقدیس بِکَه؛ اِشتِه کلام حقیقتَه. 18 هَتَه که تِه مِن ویسا آکَردَرَه دنیا را، اَز نی اَوون ویسا آکَردَمَه دنیا را. 19 اَز اِشتَن چَوون واسی وقف بَکَردیم، تا اَوِن نی اِشتَن حقیقتی کا وقف بِبون. 20 «چِمِن پیستَه فقط اِمون را نییَه، بَلکَم هِنتَه، کَسونی را اِستَه که چَوون پیغومی واسطه نَه بَه مِن ایمان بواَردین، 21 تا گِرد یَکی بِبون، هَتَه که اِی دَده تِه مِنَه اِستیش و اَز تِنَه. تا اَوِن نی اَمَه نَه بِبون، تا دنیا باوَر بِکَرِه که تِه مِن ویسا آکَردَرَه. 22 اَز جلالی که تِه مِن آدوعَرَه، اَوون آدوعَمَه تا اَوِن یَکی بِبون، هَتَه که اَمَه یَکی ایمونَه؛ 23 اَز اَوون کا و تِه بَه مِن کا. تا اَوِن نی کاملاً یَکی بِبون تا دنیا بِزونِه که تِه مِن ویسا آکَردَرَه، و اَوون نَه هَتَه خِشیش که مِنَه خِشیش. 24 اِی دَده، پیستِمَه کسونی که بَه مِن آدوعَرَه نی، جِگایی کا که اَز اِستیمَه مِنَه بِبون، تا چِمِن جلالی دَیِسِن، جلالی که تِه مِن آدوعَرَه؛ چوم پیش اَز اِم که دنیا خلق بِبو تِه مِنَه خِش بیش. 25 «اِی دَده ی عادل، هر چَن دنیا تِه آنِزونِه، امّا اَز تِه آزونِم، و اِمن زونستَشونَه که تِه مِن ویسا آکَردَرَه. 26 اَز اِشتِه نومی اَوون آزونِستَمَه و هَنی آزونِم، تا اَ محبتی که تِه بَه مِن کَردَرَه، اَوون کا نی بِبو و اَز نی اَوون کا بِبوم.» |
@ 2024 Korpu Company