یوحنا 13 - کتاب مقدس به زبان تالشی شمالیعیسی شاگِردون پایون شورِه 1 پِسَخ عیدی پیش، عیسی که بَزنی چَیی وخت آرَستَه تا اِم دنیا کا بِشو دَده وَر، اِشتَن شاگِردون که اِم دنیا کا اَوون نَه خِش بَه، بَرک محبت کَردِشه. 2 سوری موقع اِبلیس یهودا اِسْخَریوط، شمعونی زوعَه؛ دیلی کا نوعَش بَه که عیسی دِشمِنی تسلیم بِکَرِه. 3 عیسی که بَزنی دَده گِردِ چییون بَیی دَسپردَشه و اِم که خِدا وَری نَه اومَه و آگَردِه چَیی وَر، 4 سوری سَری کا پِرِشته. اَبا اِشتَن جانی کا بَروردِشه و ایلَه حوله‌ای پِگِتشه، دَوَستِشه اِشتَن کَمری کا. 5 دومله لَگنی کا آو دَکَردِشه و دَمَنده شاگِردون پایون شوشتِه و اَ حوله‌ای نَه که اِشتَن کمری کا دَوستَش بَه چَوون پایون خِشک آکَردِشَه. 6 وختی آرَستَه شَمعون پطرسی، پطرس، عیسی نَه واتِشه: «آقا، تِه چِمِن پا بوشوری؟» 7 عیسی جَواو دوشَه: «کاری که اَز بَکَردیم تِه حِسه نِفهمی، امّا دومله فَهمی.» 8 پطرس اَیی نَه واتِشه: «چِمِن پایون هَرگز نِشوری!» عیسی جَواو دوشَه: «اَگم تِه مَشورِم چَمَه رابطه قطع آبو.» 9 بَس شَمعون پطرس واتِشه: «آقا، نِه فقط چِمِن پایون، بَلکَم چِمِن دَسون و چِمِن سَری نی بوشور!» 10 عیسی اَیی نَه واتِشه: «اَ کسی که حَموم کَردَشه چَیی پا اون غِیِراز جِگایی شوشتِه اِحتیاج نیشَه، چوم که سَرتاپا پاکَه. شِمَه نی پاکیرونَه امّا نِه گِردِ شِمَه.» 11 چوم عیسی بَزنی که کی بَیی خیانت بَکَردی، اِمی واسی واتِشه: «گِردِ شِمَه پاک نیرونَه.» 12 بعد اَز اِم که عیسی چَوون پا اون شوشتِشَه، اَبا دَکَردِشه و هَنی سوری سفره سَری کا نِشته. اَ موقع اَوون کا دَفَرسِشه: «زونِسترونَه شِمَه نَه چِه کَردِمه؟ 13 شِمَه مِن اُستاد و شِمَه آقا دَخونَه و دُرست نی بَواتیرون، چوم که اِستیمَه. 14 بَس اَگم اَز، که شِمَه آقا و اُستادیمَه شِمَه پا اون شوشتَمَه، شِمَه نی بَسی یَندی پایون بوشورَه. 15 چوم که اَز اِم کاری نَه، ایلَه سَرمشقی شِمَه آدوعَمه تا شِمَه نی هَتَه بِکَرَه که اَز شِمَه نَه کَردَمه. 16 حقیقتن، شِمَه نَه بَواتیم، نِه نوکَر اِشتَن اَربابی کا یالتَرَه، نِه قاصِد اِشتَن ویسا آکَری کا. 17 حِسَه که اِم چییون بَزنیرون، خَسه شِمَه بِبو اَگم اَوون عَمل بِکَرَه. 18 «شِمَه گِردی درباره گف نِژَم. اَز اَوون که اِنتخاب کَردَمه، آزونِم. امّا مقدّس نیویشته اِم گف بَسی اِتِفاق دلَکه که ”اَ کسی که چِمِن نونی بَردی، مِنَه دِشمنی بَکَردی.“ 19 بَس حِسَه پیش اَز اِتِفاق دَلَکِه، شِمَه نَه بَواتیم تا وختی که اِتِفاق دَلَکِه، ایمان بواَرَه که اَز هَ اِستیمَه. 20 حقیقتن، شِمَه نَه بَواتیم، هَر کسی چِمِن ویسا آکَری قبول بِکَرِه، مِن قبول کَردَشه، و هَر کسی مِن قبول بِکَرِه، چِمِن ویسا آکَری قبول کَردَشه.» ایلَه شِمَه کا بَه مِن خیانت بَکَردی 21 بعد اَز اِم که عیسی اِم چییون واتِشه، روح کا پریشون آبَه و شهادت دوشَه، واتِشه: «حقیقتن، شِمَه نَه بَواتیم، ایی نفر شِمَه کا بَه مِن خیانت بَکَردی.» 22 شاگِردِن یَندی دَیشتی نَه، تعجب بَکَردین که اِمی چیکی درباره بَواتی. 23 ایلَه عیسی شاگِردون کا، که عیسی اَیی نَه خِش بَه و سِفره سَری کا عیسی کَناری کا نِشت بَه، 24 شَمعون پطرس اِشاره نَه اَیی کا پیستِشَه تا عیسی کا دَفَرسِه چیکی درباره گف ژَنِه. 25 بَس اَ شاگرد تِلی پِشتی را آگَردَه و دَفَرسِشه: «آقا، اَ کییَه؟» 26 عیسی جَواو دوشَه: «هَ کسی که اِم نون پَله قَدَره کا ژَندِه پَش آدَم یَیی.» اَ موقع ایی پَله نون قَدَره کا ژَندِشَه و اَیی آدوشَه یهودا، شَمعون اَسْخَریوطی زوعَه. 27 یهودا وختی لُقمه ویگتِشه، شیطان چَیی دیلَه دَشه. اَ موقع عیسی اَیی نَه واتِشه: «اَ چیی که پیستِرَه اَنجام بِدی، اَلبَحَل اَنجام بِده.» 28 امّا هیچ گِله کَسونی کا که سِفره سَری کا نِشت بینَه، نِزونیشونَه که چیرا عیسی اِمی یهودا نَه واتِشه. 29 بعضی خَیال کَردِشونَه که چوم، گروه خرجی پول کیسه یهودا دَسی کا بَه، عیسی اَیی نَه بَواتی چییونی که عیدی را لازم دارَم بِخِرِه، یا اِم که چیی آدَه فَقیرون. 30 لُقمه ویگِته پَش، یهودا اَلبَحَل شَه بِرون. و شَو بَه. ایلَه تازه حُکم 31 یهودا بِرون شییِه پَش، عیسی واتِشه: «حِسَه اِنسانی زوعَه جلال گِتِشَه و خِدا اَیی کا جلال گِتِشَه. 32 اَگم خِدا اَیی کا جلال گِتَشَه، بَس خِدا نی اَیی اِشتَن کا جلال بَدای و اَیی اَلبَحَل جلال بَدای. 33 روکه خِردَنِن، روکته زمانی شِمَه نَه ایمَه. چِمِن دومله گردَه و هَتَه که یهودییون نَه واتَمَه، حِسَه شِمَه نَه نی بَواتیم که اوآ که اَز بَشیم، شِمَه نیمَشایه بایَه. 34 ایلَه تازه حُکمی آدَم شِمَه، و اَ اِمَه که یَندی نَه خِش بِبییَه. هَتَه که اَز شِمَه نَه خِش بیمَه، شِمَه نی بَسی یَندی نَه خِش بِبییَه. 35 اَگم شِمَه یَندی نَه خِش بِبییَه گِردِ مردم بَزنین که شِمَه، چِمِن شاگِردیرونَه.» 36 شمعون پطرس واتِشه: «آقا، کییا بَشیش؟» عیسی جَواو دوشَه: «تِه حِسَه نیمَشای چِمِن دومله بای اَ جِگایی که اَز بَشیم؛ امّا بعدها چِمِن دومله بومَیش.» 37 پطرس واتِشه: «آقا، چیرا حِسَه نیمَشام اِشتِه دومله بام؟ اَز چِمِن جانی اِشتِه راه کا بَنایم.» 38 عیسی واتِشه: «اِشتِه جانی چِمِن راه کا بَنایش؟ حقیقتن، تِه نَه بَواتیم، سوکی خَندِه پیش تِه سِه کَرَه مِن اِنکار بَکَردیش.» |
@ 2024 Korpu Company