یعقوبی نامَه 5 - کتاب مقدس به زبان تالشی شمالیهشدار دوعِه بِه ثروتمندون 1 و امّا شِمَه اِی ثروتمندِن، زاری و شیون بِکَرَه، چوم مصیبَتِن شِمَه اِنتظاری کا اِستینه. 2 شِمَه مال و منال نابود بییَه و شِمَه خَلااون پِت ژَندَشه! 3 شِمَه طِلا و نقره مورانه ژَندَشه، و چَوون مورانه ژَندِه شِمَه ضِد گَواهی بَدای و ایلَه آتشی شیوار، شِمَه بَدنی گوشتی بَردی. شِمَه آخِرین روزون کا هِنتَه مال و منال جمع آکَردَرونه! 4 حِسَه اَ کارگرونی مُزد که شِمَه زمینون سَری کا دِرو کَردَشونه، و شِمَه حُقه بازی نَه چَوون پولی هَردَرونه، شِمَه ضِد خِلِع بَکَردی. ها، بِرزَه بِرون خِلِع، قُشونون خِداوندی گوش آرَستَه. 5 شِمَه زَمینی سَری کا ناز و نعمتی نَه و عیش و نوشی دیلَه کا زندگی کَردَرونه، و شِمَه دیلون کُشتاری روزی را کوک آکَردَرونه! 6 شِمَه اَ صالِحَ مِردی مَحکوم کَردِرونه و کِشتِرونه، اَ شِمَه پیشی کا مقاومت نِکَری. صَبر، اَذیت آزارون کا 7 بَس اِی بِرا اِن، تا اَ روزی که خِداوند بومَی صَبر بِکَرَه. دَیِسه چِنتَه کَشاورز اِنتظار کَشِه تا زَمین اِشتَن با اِرزِشَ محصولی بِه بار بواَرِه؛ چِنتَه صَبر بَکَردی تا پاییز و بهاری وارِشِن زمینی سَری کا بِوارِن. 8 شِمَه نی صبور بِبییَه. شِمَه دیل قُرص بِبو، چوم چَمَه خِداوندی اومِه نِزدیک اِستَه. 9 بِرا اِن، یَندی را غُرغُر مَکَرَه، تا بَر شِمَه نی داوری مَبو، دَیِسه: ’داور‘ بَری وَری کا مَندَه. 10 بِرا اِن، اَ پیغمبرونی کا که خِداوندی نومی نَه گَف ژَنِن، مصیبت و صبوری درسی یاد بِگِرَه. 11 اَمّا خَسَه بِبو کسونی که صبر و تحمل بَکَردین. شِمَه، ایوبی صبر و تحملی درباره دَرَسَرونه، و بَزنیرون که آخِرسَر خِداوند اَیینه چِه کَردِشه، چوم خِداوند بی حد و اندازه میهرَوون و بَخشنده اِستَه. 12 چِمِن بِرا اِن، امّا همه چی کا مُهمتَر، قَسَّم مَرَه؛ نِه بِه آسِمون، نِه بِه زمین و نِه بِه هیچ چی دییَر. ولی بِدارَه شِمَه ’ها‘ هَ، ها بِبو و شِمَه ’نهِ‘ هَ نِه بِبو، نَبادا مَحکوم بِبییَه. دعا ایمانی نَه 13 شِمَه دیلَه کا کسی عذاب کَشِه؟ بِدارَه دعا بِکَرِه. شمه دیلَه کا کسی خوشحال استه؟ بِدارَه حمد ثنا نَه سرود بوخونه. 14 شِمَه دیلَه کا کسی مریض اِستَه؟ بِدارَه کلیسا شیخون دَخونِه و اَوِن اَییرا دعا بِکَرِن و خِداوندی نومی نَه اَیی روعَنی نَه مَسح بِکَرِن. 15 ایمانی نَه دعا کَردِه، مریضی نجات بَدای و خِداوند اَیی پِرِزاونه، و اَگم اَ آدَم گناهونی کَردَش بِبو، بَخشِسته بَبین. 16 بَس، یَندی وَری کا شِمَه گناه اون اِعتراف بِکَرَه و یَندی را دعا بِکَرَه تا شفا بِگِرَه. صالح آدَمی دعا، وِرَه قُدرتی نَه عَمل بَکَردی. 17 ایلیای پیغمبر نی چَمَه شیوار آدَم بَه، امّا وختی غِیرتی نَه دعا کَردِشه که وارِش مَوارِه، سه سال و نیم زمینی سَری کا وارِش نِوارِسته؛ 18 و اَ موقع که اَ، هَنی دعا کَردِشه آسِمونی کا وارِش وارِسته و زمین اِشتَن مَحصولی دوشَه. 19 چِمِن بِرا اِن، اَگم ایی نَفر شِمَه دیلَه کا حقیقتی کا دور آبو، و ایی نَفر دییَر اَیی آگاردِنه، 20 اَ آدَم، بِزونِه که هَر کس ایلَه گناه کاری گمراهی کا آگاردِنه، چَیی جانی مرگی کا نِجات دوعَشَه و وِرَه گناه اون پوشوندَشه. |
@ 2024 Korpu Company