یعقوبی نامَه 3 - کتاب مقدس به زبان تالشی شمالیزوونی رام آکَردِه 1 چمِن بِرا اِن، نَبی که شِمَه کا وِر کَسِن خِدا کلامی معلّم بییِه دومله بِبون، چوم بَزنیرون که اَمَه مُعلّمون را، داوری چَتین تَر بَبی. 2 چوم که اَمَه گِرد وِر راهون کا خَطا بَکَردیمون. اَگم کسی اِشتَن گَف ژَندِه کا خَطا مَکَرِه، کامِلَ اِنسانی اِستَه و بَشای گِردِ اِشتَن بَدَنی پیشی بِگِرِه. 3 اَگم اَمَه اَسبی گَ کا نِختَه بِنَیمون، اَیی، چَمَه مطیع بَکَردیمون و بَشایمون اَ حَیوونی گِردِ بَدنی هَر طرفی را که پیستِمونه بِبَرَم. 4 کَشتیون دَیِسه، هَر چَن اَوِن وِر یالی نَه و تِندَه وا اون نَه تَکان بَردین، ولی ایلَه روکَه سُکانی نَه هَر طرفی را که ناخدا پیستِشَه بَردَه بَبین. 5 بَس هِنتَه نی، زَوون نی که ایلَه روکَ عُضو اِستَه، امّا یال یالَه اِدعااونی اِستشَه. ایلَه روکَ جَرقه بَشای ایلَه یالَ جنگلی وَش بِژَنه. 6 و زَوون نی ایلَه آتشی اِستَه؛ ایی دنیا نادرستی کا که چَمَه بَدنی گِردِ اعضا دیلَه کا دَرییَه و اِنسانی گِردِ وجودی کثیف بَکَردی و چَیی زندگی گِردی آتش بَژَی، آتشی که جَهَندَم اَیی روشون آکَردَشَه! 7 اِنسان هَمه جورَه حَیوون و پرنده و خَزنده و دریای یَه حَیوونون رام بَکَردی و کَردَشه، 8 امّا هیچ اِنسانی نیمَشا زَوونی رام آکَرِه. زَوون ایلَه نا آرومَه شَروری اِستَه که کُشنده زَهری کا پُورَه! 9 چَمَه زَوونی نَه خِداوند و دَده نَه مُتِوارک بَواتیمون و هَ زَوونی نَه اِنسانونی که خِدا شیوار خَلق بَیینه، لَعنت بَکَردیمون. 10 ایلَه گَ کا، هَم بَرکت بِرون بومَی، هَم لَعنت! اِی چِمِن بِرا اِن، چاک نییَه اِنتَه بِبو. 11 مَگم بَبی ایلَه خانی کا هَم شیرین آو بِرون بَرا، هَم سورَه آو؟ 12 چِمِن بِرا اِن، مَگم بَبی اَنجیلَ دار، زیتون بواَرِه؟ یا اَنگِرَه رَز، اَنجیل بِدَه؟ هِنتَه نی سورَه خانی نیمَشا شیرین آو آدَه. حکمت آسِمونی کا 13 شِمَه دیلَه کا حکیم و عَقلمَند کییَه؟ بِدارَه اَیی اِشتَن چاکه زندگی نَه نیشون بِدَه، اَ، اَعمالی که فروتنی نَه اِستَه و حکمتی کا سَرچشمه بَگتی. 14 امّا اَگم شِمَه دیلی کا تِلَّه حَسودی و خودخواهی هِستِرونه، اِشتَن مَگِرَه و حقیقتی ضِد گَف مَژَنَه. 15 اِنتَه رَه حکمتی آسِمونی کا نا، بَلکَم زَمینی و نَفسانی و شیطانی اِستَه. 16 چوم هَر جِگا کا حَسودی و خودخواهی بِبو، اوآ کا بَلوا و هَر جورَه زِشتَ کِردِکار نی بَبی. 17 امّا اَ حکمتی که آسِمونی کا اِستَه، اوّل پاک اِستَه، دومله صلح جو و آروم اِستَه، نصیحتی گوش آکَرِه، و رحمت و چاکَه ثَمرَه کا لِبآ لِب اِستَه و فرق نوعه و دِ دیمی کا دور اِستَه! 18 صالِح بییِه، محصولی اِستَه که صُلح و صفا کا، و صَلح جویَه آدَمون دَسی نَه کاشته بَبی. |
@ 2024 Korpu Company