یعقوبی نامَه 1 - کتاب مقدس به زبان تالشی شمالی

¹ یعقوبی طَرفی کا، خِدا و عیسایِ مسیحِ خِداوندی نوکر، دونزَه گِله قبیله را که دییَر جِگا اون کا وِلا اینه. سلام!

شِمَه ایمانی آزمایش کَردِه

² چِمِن بِرا اِن، هَر موقع که جور بَه جورَه آزمایشون دیلَه کا دَلَکیرونه، گِردِ اَوون بَرکَ شادی بِزونه!

³ چوم بَزنیرون که وختی شِمَه ایمان آزمایش بِبو، صبر و تحمل بِه بار بواَردی.

⁴ بَس بِدارَه صبر و تحمل کاملا اِشتَن ثمَرَه آدَه تا شِمَه بی عیب و کامل بِبییَه و چیی کَم مَدارَه.

⁵ اَگم کسی شِمَه دیلَه کا حِکمت نیشَه، اَیی خِدا کا بِپی. هَ خِدایی که دَس دیل بازی نَه و بیدون سَرکوفت ژَندِه، گِردی آدَه، و اَیی نی آدوعَه بَبی.

⁶ ولی اَ شخص بَسی ایمانی نَه بِپی، بیدون اِمکه شک بِکَرِه، چوم کسی که شَک بَکَردی، دریا موجی شیوار اِستَه که وا نَه اِم طرف اَ طرف بَشی.

⁷ اِنتَه رَه کسی خَیال مَکَرِه که خِداوندی کا چیی ویگِرِه،

⁸ چوم اَ دِ دیلَه آدَمی اِستَه و اِشتَن گِردِه راه اون کا ثُبات نیشَه.

⁹ فقیرَه بِرا اِشتَن سَربِلَندی کا که هِستِشه فَخر بِکَرِه،

¹⁰ و ثیروتمندَه آدَم اِشتَن فروتنی را فَخر بِکَرِه، چوم که اَ، ویاوونی واشی گُلی شیوار از بِین بَشی.

¹¹ هَتَه که آفتاو اِشتَن سوزانَ گَرما نَه پِرا و واشی خِشک آکَرِه و چَیی گُل ویبو و چَیی قشنگی اَز بِین بَشی، ثیروتمندَه آدَم نی اِشتَن کَسب و کاری دیلَه کا از بِین بَشی.

¹² خَسَه بِبو اَ کسی که آزمایشون باری جیری کا صبر و تحملی نَه تاو بواَردی، چوم وختی آزمایشی کا سَربِلند بِرون بومَی، اَ زندگی بَخشَه تاجی ویگِرِه، اَ تاجی که خِدا بِه کسونی وعده دوعَشَه که اَیی نَه خِشینَه.

¹³ هیچکس وختی وسوسه بَبی، مَواجِه: «خِدایَه که مِن وسوسه بَکَردی،» چوم خِدا هیچ بَدی نَه وسوسه نییَب، و هیچکسی نی وسوسه نِکَرِه.

¹⁴ ولی وختی که ایی نفر وسوسه بَبی، چَیی اِشتَن هوا هَوَس اِستَه که اَیی گول بَژَی و تَله کا دَرَفَنه.

¹⁵ دومله وختی هوا هَوَس حامیله بَبی، گناه بَزَندی و گناه نی وختی کامِلاً یال بَبی، مرگ بِه بار بواَردی.

¹⁶ چِمِن عزیزَه بِرا اِن، گول مَرَه!

¹⁷ هَر چاکَ هدیه ای و هَر کامل هدیه ای آسِمونی کا اِستَه، نورون دَده طرفی کا که چَیی دیلَه کا هیچ تغییری نییَه، و نِه هیچ سایی که تغییری کا به وجود اومَه بِبو.

¹⁸ اَ، اِشتَن اِراده نَه کلامی حقیقتی نَه اَمَه خلق کَردِشه تا چَیی مخلوقاتی نوبَر بِبییَم.

کلامی دَرَسِه و اَنجام دوعِه

¹⁹ چِمِن عزیزَه بِرا اِن، اِمی بِزونه که: هَر کسی بَسی گفی دَرَسِه کا تِند بِبو، گف ژَندِه کا کُند بِبو و عصبانیتی کا نی آروم بِبو!

²⁰ چوم آدَمی عصبانی بییِه، اَ صالِحی ای که خِدا پیستِشَه بِه بار نِوَرِه.

²¹ بَس هَر جورَه فِساد و هَر جورَه شِرارتی اِشتَن کا دور آکَرَه و فروتنی نَه، کلامی که خِدا شِمَه دیلی دیلَه کا نِشا کَردَشه قبول بِکَرَه. اَ کلامی که بَشای شِمَه جانون نِجات بِدَه.

²² ولی خِدا کلامی عَمَل بِکَرَه، نِه اِم که فَقَط اَیی دَرَسَه؛ اِشتَن گول مَژَنه!

²³ چوم اَگم کسی خِدا کلامی دَرَسِه امّا اَیی عَمَل نِکَرِه، کسی شیوار اِستَه که آواینه کا اِشتَن دیمی دَیِسِه.

²⁴ اَ، اِشتَن چَیی دیلَه کا بَویندی، امّا تا آواینه پیشی کا دور آبو، اَلبَحَل ویر بَرکَرِه که چِنتَه رَه قَیافه ایی شی اِستبَه.

²⁵ ولی اَ کسی که کامِلَه شریعتی، که آزادی شریعت اِستَه ذول ژَندَشه و دَرَسِه و اَیی ویر بَنِرکَرِه بَلکَم اَیی عَمَل بَکَردی، اَ، اِشتَن کاری کا بَرکت بَگتی.

²⁶ اَگم کسی گمون بَکَردی دیندار اِستَه، امّا اِشتَن زَوونی پیشی نیمَشا بِگِرِه، بَلکَم اِشتَن دیلی گول بِژَنه، چَیی دینداری هیچ اِرزشی نیشه.

²⁷ پاک و خالصَه دینداری خِدای دَده نَظری کا اِمَه که، یَتیمون و ویوَه ژِنَکون مصیبتی کا چَوون دَسی بِگِرَم و اِم فاسِدَه دنیا کا اِشتَن دور غَم بَرَم.