نامَه، عِبرانیه نَتاجَه مسیحیونرا 9 - کتاب مقدس به زبان تالشی شمالی

عبادت زَمینی یَه مقدسَ جِگا کا

¹ حِسَه حتی اوّلین عهد، عبادت کَردِه را قانونونی داری و زمینی سَری کا نی ایلَه مقدّسَ جِگاش اِستبَه.

² چوم خیمَه‌ ای بَرپا بییَه بَه که چَیی اوّلین قسمت چرا پویَه، میز، و مقدّس نون بَه. اِم جِگا نَه ’قُدس‘ بَواتین.

³ دومّین پرده پِشتی کا قسمتی بَه که چَیی نوم ’قُدس‌الاقداس‘ بَه؛

⁴ اِم قسمتی کا، طِلای یَه آتشدان بوخوری سوتِه را نوعَه بَه و عهدی صوندوق که هَر طرفی نَه طِلا کاری بییَه بَه که چَیی دیلَه کا ایلَه طِلایی یَه نِرَه بَه که چَیی دیلَه کا ’مَنّا‘ غَم هَرین، و هارونی عصا که تیتَه ژَندَه ش بَه، و دِ گِله سِنگی یَه لوحِن که دَه فرمونی عهد چَوون سَری کا نیویشته بییَه بَه.

⁵ صوندوقی کَفا کا، که اَیی نَه تخت رحمت بَواتین’جلالی‘کَروبیون ملائیکه، سا دَرفندشون بَه. حِسَه نیمَشایَم اِم چییون گِله گِله شِمَه را توضیح بِدییَم.

⁶ بعد از اِم که گِردِ چییِن اِنتَه حاضیر آبین، کاهِنِن دائِم دَشین اوّلین قسمتی دیلَه تا اِشتَن وظیفه اون اَنجام بِدَن.

⁷ امّا فقط کاهِن اَعظم دَشی دوّمین قسمتی دیلَه، اَ نی فقط سالی ایی کَرَه، و همیشه نی اِشتَن نَه قِربونی خونی بَبَردی تا اِشتَن واسی و قومی گناه اون را که نادونی کا کَردَشون بَه، تَقدیم بِکَرِه.

⁸ و روح القدس اِنتَه نیشون بَدای تا وختی که اوّلین قسمت بَرقَرارَه، اَ رایی که بَشی قُدس الاقداسی دیلَه حَلا آبَه نییَه،

⁹ که اِم، اِم دورانی را ایلَه نیشونَه یَه. چَیی مطابق، هدیه اون و قِربونیونی که آدَه، نیمَشان اَ کسی وجدانی که عبادت بَکَردی، کاملاً پاک آکَرِن.

¹⁰ بَلکَم اَوِن فقط هَردِه و هِنتِه و جور بَه جورَه غُسلون و قانونونی اِستینَه که بَدنی مربوط بَبی، و فقط تا اَ موقعی اِعتبار دارِن که خِدا تازَه تَرتیبی آدَه.

رهایی، مَسیح خونی واسطه نَه

¹¹ امّا وختی مَسیح، اَ چاکَه کارونی را کاهِن اَعظمی مقامی کا اومَه که حِسَه چَمَه نصیب بییَه، اَ ایلَه یالتَر و کاملترَه خِیمَه ای دیلَه دَشه که اِنسانی دَسی نَه وَج آبَه نییَه و اِم خِلقَتی شِن نییَه.

¹² اَ، ایی کَرَه همیشه را دَشَه قُدس‌الاقداسی دیلَه، نِه بِزّون و موندَه اون خونی نَه، بَلکَم اِشتَن خونی نَه و اِنتَه اَبَدی یَه رهایی حاضیر آکَردِشَه.

¹³ چوم اَگم بِزّون و وَرزا اون خون و موندَه اون خاکستری پِشَنده نَه کسونی سَری کا که ناپاکی نَه، اَوون تَقدیس بَکَردی تا جِسمی کا پاک بِبون،

¹⁴ چِندی وِرتَر، مَسیح خون که اَ اَبَدی یَه روح واسطه نَه، اِشتَن بی‌عیب، خِدا را تقدیم کَردِشه. چَیی خون چَمَه وجدانی بیخودی یَه کارون کا پاک بَکَردی تا بِشایَم خدای زِنده خدمَت بِکَرَم!

¹⁵ و مسیح ایلَه تازه عهدی واسطه یَه، تا کسونی که دعوت بَیینَه بِشان اَ اَبَدی یَه میراثی که خِدا وعده دوعَشَه بِه دَس بواَرِن، چوم ایلَه مرگ اِتِفاق دَلَکَه تا اَوون اَ گناه اونی کا که اوّلین عهدی کا اَنجام بَه، رهایی بِدَه.

¹⁶ چوم وختی وصیت اِجرا بَبی که ثابت بِبو کسی که وصیت کَردشَه مَردَه.

¹⁷ چوم مَردِه پَش بَبی وصیتی اِجرا کَردِه، و تا وختی وصیت کَرار زِندَه یَه، نییَب اَ وصیتی اِجرا کَردِه.

¹⁸ اِمی واسی، حتّی اوّلین عهد نی بیدون خون، بَرقرار نِبی.

¹⁹ چوم اَ موقع که شریعتی حُکمِن گِلَه گِلَه موسی واسطه نَه گِردِ قومی را اِعلام بینَه، اَ موندَه اون خون و بِزّون خونی پِگِتِشه و آو و سِرَه پَشم و زوفا لاخه نَه، هَم طوماری سَر و هَم گِردِ قومی سَری کا پِشَندِشه.

²⁰ و واتِشه: «اِمَه اَ عهدی خون که خِدا شِمَه را حُکم کَردَشه.»

²¹ اِنتَه نی اَ خونی خیمَه سَر و هَم گِردِ قَبونی سَر که پرستشی را اِستفادَه بَبین، پِشَندِشه.

²² راس راسی، مطابق شریعت تَقریبا گِردِ چییِن خونی واسطه نَه پاک بَبین و بیدون اِمکه خون ویکَردَه بِبو، گناه اون آمُرزش درکار نییَه.

²³ بَس، بَسی اِم چییون که ایلَه نمونه آسِمونی یَه چیون کایَه، اِم قربونیون نَه پاک آبون، امّا آسمونی یَه چییِن اِشتَن اَ قِربونیونی نَه که اِمون کا چاکترَه، پاک بَبین.

²⁴ چوم مسیح اَ قُدس الاقداسی دیلَه دَنِشه که اِنسانی دَسی نَه وَج آبَه و فقط نمونه ای یَه اَ حقیقی یَه چیون کا، بَلکَم شَه آسِمونی دیلَه را تا چَمَه طرفی نَه خِدا محضری کا حاضر آبِبو.

²⁵ و اِنتَه نییَه که اَ، دائِم اِشتَن قِربونی بِکَرِه، ایلَه کاهن اَعظمی شیوار که هَر سال دَشی قُدس‌الاقداسی دیلَه، اَ نی اَ خونی نَه که اِشتَنش خون نییَه.

²⁶ چوم اِنتَه، مسیح بَسی دنیا خَلق بییِه موقع نَه، یِکسرَه عذاب کَشَش بِبو، امّا اِنتَه نِبَه، اَ حِسَه ایی کَرَه همیشه را آخِر زَمانون کا اومَه تا اِشتَن قِربونی کَردِه نَه، گناه از بِین بِبَرِه.

²⁷ و هَتَه که تعیین بَه که اِنسان ایی کَرَه بِمِرِه و چَیی پَش داوری بومَی،

²⁸ بَس مسیح نی که ایی کَرَه قِربونی بَه تا وِر کسون گناه اون از بِین بِبَرِه، دوّمین کَرَه نی بومَی، ولی نِه گناه اون از بِین بَردِه را، بَلکَم تا کسونی نجات دوعِه را که ذوق و شوقی نَه چَیی چِم بِه رایی نَه.