نامَه، عِبرانیه نَتاجَه مسیحیونرا 7 - کتاب مقدس به زبان تالشی شمالی

مِلْکیصِدِقی کِهانت

¹ چوم که اِم مِلْکیصِدِق، سالیمی شهری پاُتشا و خِدای متعالی کاهِن بَه. اَ، اِبراهیمی که پاُتشااون شکست دوعَش بَه، ویندِشه و اَیی بَرَکت دوشَه،

² و اِبراهیم گِردِ چییونی کا که داری، اَیی دَه یِک آدوشَه. چَیی نومی اوّلین معنی ’صالِحی پاُتشا‘ و دومله ’سالیمی پاُتشا‘ یعنی ’صُلح و سلامتی پاُتشا‘ یَه.

³ اَ مِلکیصِدق دَده نَنه نیشَه، نِه چَیی شجره نومچه مَعلومَه، و نِه چَیی زندگی اوّلین روزِن معلومی نَه، نِه آخِرین روزِن، ولی خِدا زوعَه شیوار، اَ تا اَبَد کاهِن باقی بَمندی.

⁴ دَیِسه که اَ چِه یالَ شخصی بَه که اِبراهیم، قوم اِسرائیلی دَده، غَنایمی کا بَیی دَه یِک آدوشَه!

⁵ و بینا بِه موسی شریعتی حُکم، لاوی خِردَنِن که کاهن بَبین، بَسی یهودی قومی کا که چَوون بِرااینَه، دَه یِک ویگِرِن، هَر چَن اَوِن نی اِبراهیمی نَسلی کا اینَه.

⁶ امّا اِم مِلکیصِدق که چَوون نَسلی کا نییَه، اِبراهیمی کا دَه یِک ویگِتِشَه و اِبراهیمی که وعده‌ اون صاحاب بَه، بَرکت دوشَه.

⁷ و بیدونِ شَک، اَ کسی که بَرکت بَدای اَ کسی کا که بَرکت ویگِرِه، یالتَرَه.

⁸ ایلَه طرفی کا، کَسونی کا که از بین بَشین دَه یِک ویگِرِن؛ امّا اَ ایلَه طرفی کا، اَ کسی که چَیی درباره شهادتی دوعَه بَه که زِنده یَه، دَه ویگِرِه.

⁹ حتی بَشایمون بوآجَم که لاوی اِشتَن نی که دَه یِک ویگِری، اِبراهیمی واسطه نَه دَه یِک آدوشَه.

¹⁰ چوم وختی که مِلْکیصِدِق اِبراهیمی ویندَش بَه، حَلا لاوی دنیا اومَه نِبَه.

عیسی، مِلْکیصِدِقی نَه مقایسه بَبی

¹¹ حِسَه، اَگم کامل بییِه لاوی کاهِنون رُتبَه واسطه نَه اَنجام بِبی، دِ چِه اِحتیاجی بَه ایلَه دییَر کاهنی، مِلکیصِدقی رُتبَه کا با، عوض اِمکه هارونی رُتبَه کا بِبو؟ چوم لاوی کِهانتی دوره دیلَه کا بَه که شریعت آدوعه بَه یهودی قومی.

¹² چوم اَگم کِهانتی خدمت عوض آبو، ناچارَن شریعتی قانون نی عوض آبو.

¹³ چوم اَ کسی که اِم گَفِن چَیی دربارَه واتَه بَیینَه، ایلَه دییَر طایفه ای شِنَه، که اَ طایفه کا هیچکس قربونگاه دیلَه کا هرگز خدمت کَردَه نیشَه؛

¹⁴ چوم معلومَه که چَمَه خِداوند، یهودا نسلی کا بَه و موسی، اَ قبیله کا کِهانتی درباره هیچی نِواتشه.

¹⁵ اِم اوآکا آشکارتَر بَبی که وختی ایلَه دییَر کاهن، مِلْکیصِدِقی شیوار بومَی،

¹⁶ اَ نِه شریعتی اِم حُکمی کا که چَیی نَسلی مربوطَه، بَلکَم اَ زِندگی قوّتی کا که از بِین نِشو، کاهِن بَبی.

¹⁷ چوم که مزموری کیتابی کا چَیی دربارَه اِنتَه شهادتی دوعَه بَه که: «تِه تا اَبَد کاهِن ایش، مِلْکیصِدِقی رُتبَه کا.»

¹⁸ چوم ایی طرفی کا اَ اوّلین حکم اِمی واسی که ضعیف و بی فایده بَه کنار نوعَه بَه،

¹⁹ چوم شریعت هیچ چی کامل نِکَردِشه. امّا اَ طرفی کا چاکتَرَه اُمیدی اَمَه آزونیشَه که چَیی واسطه نَه بِه خِدا نِزدیک آبییَم.

²⁰ و اِم بیدون قَسَّم نِبَه! چوم کسونی که پیشتر کاهِن بینَه، بیدون اِمکه قَسَّم بَرِن کاهِن بینَه.

²¹ امّا هِم ایلَه کاهِن بَه، قَسَّمی همراه که چَیی واسطه نَه اَیی نَه واتِشه: «خِداوند قَسَّم هَردَشَه و چَیی نظر عوض آنییَب: ”تِه تا اَبَد کاهِن ایش“.»

²² هِم، عیسی، ایلَه چاکتَرَه عهدی ضامِن بَکَردی.

²³ قدیمی یَه کاهنون تعداد بَرک وِر بَه، چوم مرگ نییَرزی که اِشتَن خدمتی اِدامه بِدَن.

²⁴ ولی عیسی تا اَبَد کاهِنَ، چوم که تا اَبَد زِنده یَه،

²⁵ بَس عیسی بَشای کسونی که چَیی واسطه نَه بِه خدا نِزدیک آبون، کاملاً نجات بِدَه، چوم که اَ هَمیشه زِنده یَه تا چَوون را شفاعت بِکَرِه.

²⁶ چوم که راس راسی اِم بِه جا بَه که اَمَه اِنتَه رَه یالَ کاهِنی بِدارَم،که مقدّس، بی گناه، بی‌عیب، گناه کارون کا سیوا، و جَلال گِتَه آسِمونون کا کفاتَر بِبو.

²⁷ اَ دییَر کاهِنون اَعظمی شیوار، اِحتیاجی نیشَه هَر روز، اوّل اِشتَن گناه اون را و دومله قومی گناه اون را، قِربونی بِکَرِه، چوم ایی کَرَه هَمیشه را اِمی اَنجام دوشَه، اَ موقع که اِشتَن قِربونی کَردِشَه.

²⁸ چوم شریعت، آدَمون چَوون ضَعفون نَه کاهِن اَعظم بییِه را تعیین بَکَردی، امّا اَ قَسَّمی کَلمه اِن که شریعتی پَش اومَه، اَ زوعَه تعیین کَردِشَه که تا اَبَد کامل آبییَه.