نامَه، عِبرانیه نَتاجَه مسیحیونرا 6 - کتاب مقدس به زبان تالشی شمالی1 بَس بایَه مسیح اوّلین دَرسون پِشت سَر بِنییَم و بالغ بییِه طرفی را بِشَم نار. امّا نَبی هَنی پاکاری، توبه کَردِه و بیخودی یَه کارون و ایمان بِه خِدا، 2 و غُسل تعمیدون آموتِه، دستگذاری یِن، و مَرده اون زِنده آبییِه و اَبَدی یَه داوری، سَر بِنییَم. 3 اَگم خِدا اِجازَه بِدَه اِم کاری نی بَکَردیمون. 4 چوم کسونی که ایی کَرَه نورانی بینَه، اَ کسونی که آسِمونی یَه هدیه مَزَه چَشَشونَه و روح القدسی دیلَه کا شَریک بَیینَه، 5 و خِدا کلامی مَزَه چاکی و آینده دورانی قُوَّتون مَزَه چَشَشونَه، 6 و دومله ایمانی کا آگَردِن، دِ نییَب اَوون هَنی از نو توبه را وَردِه، چیرا که اَوِن هَنی بِه ضرر اِشتَن، خِدا زوعَه مصلوب بَکَردین و گِردی وَری کا اَیی بی‌حرمت بَکَردین. 7 اَگم ایلَه زَمین، وارِشی که وِر موقع چَیی سَری کا بَوارِستی اِشتَن کا بِگِرِه، و کَسونی را که چَوون واسی کِشت بییَه چاکَه محصول بِه بار بواَرِه، خِدا کا برکت بَگتی. 8 امّا اَگم بِرَّه بِنَه بِه بار بواَردی، بی اِرزشَ زمینی یَه و نِزدیکَه لَعنَت بِبو، و آخِرسَر نی سوتَه بَبی. 9 اِی عزیزِن، هَر چَن اِنتَه گَف ژَنَم، امّا شِمَه دربارَه مُطمَیئنیمونَه که چاکتَرَه چییونی که نجاتی شِنی نَه، شِمَه نصیب بَبی. 10 چوم که خِدا بی اِنصاف نییَه که شِمَه کار و محبتی که چَیی نومی واسی، مقدّسون خِدمتی کا نیشون دوعَه رونَه ویر بَرکَرِه، هَتَه که حَلا نی کارا بَکَردیرون. 11 چَمَه آرزو اِمَه که هَر کمیله شِمَه کا تا آخِر هَ غیرتی نیشون بِدییَه تا شِمَه اُمید تمام کمال آشکار آبو. 12 تا تنبل مَبییَه، بَلکَم شِمَه سَرمشق کسونی بِبون که ایمان و صبری نَه وعده اون وارث بَبین. خِدا وعده اون حتمی اینه 13 اَ موقع که خِدا اِبراهیمی وعده دوشَه، چوم هیچ کس اَیی کا یالتَر نِبَه که چَیی سَر قَسَّم بَرِه، بَس اِشتَن سَری قَسَّم هَردِشَه 14 و واتِشه: «مُطمئن بِبَش که تِه بَرَکت بَدایم و تِه وِر آکَرِم.» 15 و اِنتَه، اِبراهیم بعد از اِم که صبوری نَه منتظر مَندَه، وعده بِه دَس وَردِشَه. 16 چوم که مردم کسی سَر قَسَّم بَردین که اَوون کا یالتَرَه، و چَوون گِردی جَر و بَحثون دیلَه کا، قَسَّمی اِستَه که آخِرسَر چَوون گفون ثابت بَکَردی. 17 بَس، اَ موقع که خِدا پیستِشَه وِرتَر نیشون بِدَه چَیی وعده، وارثون را عوض آنییَب، اَیی قَسَّمی نَه تضمین کَردِشَه، 18 تا دِ گِله چیی واسطه نَه که عوض آنییَب، و ممکن نییَه خِدا چَوون درباره دوروع بوآجِه، اَمَه که پناه وَردِه را دَوَشتَه ایمونَه، وِر دیلگرمی داریمون تا اَ اُمیدی که چَمَه پیشی کا نوعَه بَه، مُحکم غَم بَرَم. 19 اِم اُمید، چَمَه جانی را ایلَه لَنگری شیوارَه که قُرص و مُطمئنَه، اُمیدی که بَشی خِیمَه پَرده اَ طرفی را، اَ دَرونی یَه جِگا دیلَه، بِه قدس الاقداس. 20 اَ جِگایی که عیسی چَمَه پیشتَر و چَمَه واسی دَشه دیلَه؛ و تا اَبَد کاهن اَعظم بَه، مِلْکیصِدِقی رُتبَه کا. |
@ 2024 Korpu Company