نامَه، عِبرانیه نَتاجَه مسیحیونرا 5 - کتاب مقدس به زبان تالشی شمالی

¹ چوم هَر کاهن اَعظمی که آدَمون دیلَه کا اِنتخاب بَبی، تعیین بَبی تا اَ کارونی کا که مربوط بِه خدایَه مردمی نماینده بِبو، تا گناه اون واسی هدیه اون و قربونیونی خِدا را تَقدیم بِکَرِه.

² اَ بَشای نادونون و گمراه اون نَه، نرمی نَه رَفتار بِکَرِه، چوم که اَ اِشتَن ضَعف هِستِشَه.

³ اِمی واسی، اَ بَسی اِشتَن گناه اون را قربونی آدَه، هَتَه که مردمی را آدَه.

⁴ و هیچکس اِشتَن، نیمَشا اَ کاهنی اِفتخاری آدَه بِه اِشتَن، بَلکَم اِم اِفتخار فقط وختی که خِدا اَیی دَعوت بَکَردی بَیی آرَستِه، هَتَه که هارونی آرَستَه.

⁵ مَسیح نی اِشتَن، اِشتَن کَفا نِبردِشَه تا کاهن اَعظم بِبو، بَلکَم تعیین بَه اَ کسی واسطه نَه که اَیی نَه واتِشه: «تِه چِمِن زوعَه ایش؛ اوری، اَز تِه مولود کَردَمَه.»

⁶ و دییَر جِگا کا هَنی اَ بَواتی: «تِه تا اَبَد کاهنی اِستیش، مِلْکیصِدِقی رُتبَه کا.»

⁷ اَ روزونی که عیسی جِسمی دیلَه کا بَه، داد کَردَه اون نَه و بِلندَه خِلِع اون و اِسِرگون نَه اَ کسی وَری کا که بَشای اَیی مرگی کا نجات بِدَه، دعا و مِنَّت کَردِشَه و اِشتَن کامِلَه اِطاعتی واسی، چَیی دعا مستجاب بَه.

⁸ هَر چَن که زوعَه بَه، اَ عذابونی واسی که کَشِشَه اِطاعَتی آموتِشه.

⁹ و اَ موقع که کامل آبَه، گِردِ کسونی را که اَیی کا اِطاعَت بَکَردین، اَبَدی یَه نجاتی سَرچِشمه بَه.

¹⁰ و خِدا طَرَفی کا تَعیین بَه که کاهن اَعظم بِبو، مِلْکیصِدِقی رُتبَه دیلَه کا.

هُشدار دوعِه، ایمانی کا آگَردِستِه درباره

¹¹ چِمی درباره وِرَه چییونی اِستِمَه که بوآجِم، امّا چَوون واتِه چَتینَه، چیرا که شِمَه گوشِن سَنگین آبَه اِینَه.

¹² چوم هَر چَن که شِمَه تا حِسَه بَسی معلم بِبیرون، اِحتیاج دارَه که ایی نفر خِدا کلامی اوّلین اُصولی هَنی شِمَه باموجِه. شِمَه حَلا شِت پیستِرونَه، نِه سَنگینَ غذا!

¹³ چوم هَر کسی که شِتَه هَرَه، صالِحی کلامی کا بی تَجربَه یَه، چوم خِردَنَه.

¹⁴ امّا سَنگینَ غذا یالَ آدَمون شِنَه، کسونی را که وِرَه تمرین کَردِه نَه اِشتَن قدرت تشخیص دوعِه، تربیت کَردَشونَه تا بِشان چاک و بَدی تشخیص بِدَن.