نامَه، عِبرانیه نَتاجَه مسیحیونرا 2 - کتاب مقدس به زبان تالشی شمالیهشدار دوعِه، نجاتی کا غافل بییِه درباره 1 بَس چَمَه هَواس بَسی وِرتَر بِه اَ چیی بِبو که دَرَسَمونَه، نَبادا اَیی کا منحرف آبِییَم. 2 چوم، اوآنَه که اَ پِیغومی که ملائیکَه اون واسطه نَه اِعلام بَه، ثابت بَه که قابل اِطمینانَ، و هَر تقصیر و نااِطاعتی، حقی نَه جَزا ویگِری، 3 بَس اَگم اَمَه اِنتَه رَه یالَه نجاتی کا غافل بِبییَم، چِنتَه چَیی مجازاتی کا دَوَزَم؟ اِم نِجات اوّل خِداوندی واسطه نَه اِعلام بَه و دومله کسونی واسطه نَه که اَیی دَرَسِشونَه اَمَه را ثابت بَه، 4 هَتَه که خِدا نی، جور بَه جورَه نیشونَه و عجیب غریبَه مُعجزه اون، و روح القدسی عَطیَه اون که طبق اِشتَن اِراده آدَه، اَ نجاتی را شهادتی دوشَه. 5 چوم که خدا اَ، دنیایی که بومَی و اَمَه اَیی کا گَف ژَنَم، ملائیکَه اون مَطیع نِکَردِشه. 6 ایی جِگا، مزموری کیتابی دیلَه کا شهادتی دوعَه بییَه که: «اِنسان چَه که تِه چَیی فیکری کا بِبی، یا اِنسانی زوعَه، که اَیی اَهمیت بِدَی؟ 7 ته اَیی روکَته زَمان، ملائیکه اون کا پَست تَر کَردِره، جَلال و اِفتخاری تاجی چَیی سَری کا پِنورَه، 8 گِردِ چییون چَیی پا جیری کا چَیی مطیع کَردِرَه.» حِسَه که خِدا، گِردِ چییون چَیی مطیع کَردِشَه، هیچی باقی نِنوشَه که چَیی مطیع مَبو. حِسَه حَلا نِوینَم که گِردِ چییِن، چَیی مطیع بِبون. 9 امّا اَمَه اَیی که روکَتِه زمان، ملائیکه اون کا پَست تَر بَه بَویندیمون، یعنی عیسی، که مرگی عذابی واسی، جلال و حُرمتی تاج چَیی سَری کا نوعَه بَه، تا خِدا فیضی واسطه نَه گِردی واسی مرگی مَزَه بِچَشِه. 10 چوم اِم دُرست و بِجا بَه که خِدا، که گِردِ چیی اِن اَییرا و چَیی واسطه نَه وجود دارِن، اِمی واسی که وِرَه زوعَه اون بِه جلال آرِساوونِه، بَسی چَوون نجاتی باعیث بانی، رنج و عذابی راه دیلَه کا، کامل آکَرِه. 11 چوم اَ کسی که تقدیس بَکَردی و کسونی که تقدیس بَبین، گِرد ایلَه سَرچِشمه هِستِشونَه. چوم که عیسی عار نیَشه اَوون بِرا دَخونِه، 12 هَتَه که مزموری کیتاب بَواتی: « اِشتِه نومی چِمِن بِرااون را اِعلام بَکَردیم؛ و جَماعتی دیلَه کا، اِشتِه ستایشی بَخندیم.» 13 و هَنی اِشعَیای پیغمبری کیتابی کا بَواتی: «اَز اَیی توکل بَکَردیم.» و هَنی بَواتی: «دَیِس، از و خِردَنونی که خِدا بَه مِن آدوعَشه.» 14 بَس اوآنَه که خِردَنِن جسم و خونی کا شریکی نَه، اَ اِشتَن نی اِم چیون دیلَه کا شریک بَه، تا مرگی راه دیلَه کا، اَیی که مرگی قوّتی هِستِشه یعنی اِبلیسی، نابود بِکَرِه. 15 و گِردِ کسونی که مرگی تَرسی واسی، گِردِ اِشتَن عمری کا اَسیری کَشَشونَه، آزاد آکَرِه. 16 چوم راس راسی اَ، ملائیکَه اون کمک نِکَرِه، بَلکَم اَ، اِبراهیم پِیغمبری نسلی کمک بَکَردی. 17 بَس لازِم بَه که اَ هَر چیی کا اِشتَن بِرا اون شیوار بِبو، تا اِنتَه خِدا خِدمتی کا ایلَه بَخشنده و وفادارَه کاهن اَعظم بِبو، تا قومی گناه اون بَخشِشی را کفّاره آدَه. 18 چوم اَ اِشتَن وختی که آزمایش بَه، عذاب کَشِشَه، و بَشای کسونی که آزمایش بَبین، کمک بِکَرِه. |
@ 2024 Korpu Company