نامَه، عِبرانیه نَتاجَه مسیحیونرا 13 - کتاب مقدس به زبان تالشی شمالی

قربونیونی که خِدا راضی آکَرَه

¹ بِرا اونَه مُحبت شِمَه دیلَه کا بَرقَرار بِبو.

² اِمی کا که غریبون را میهمون‌ نواز بِبیَه قافل مَبییَه، چیرا که اِم کاری نَه، بَعضی اِن بی اِم که بِزونِن ملائیکه اون کا پذیرایی کَردِشونَه.

³ کسونی که زِندانی کا اینَه ویر بَمَرکَرَه، هِنتَه که اِنگاری شِمَه اِشتَن نی اَوون نَه زِندانی کا ایرونَه؛ و کَسونی که عذاب کَشِن ویر بَمَرکَرَه، چوم که شِمَه نی بَدنی کا عذاب بَکَشدیرون.

⁴ بِدارَه اِزدواج گِردی دیلَه کا اِحترام بِدارِه و ژِن و شو رابطه پاک بِبو، چوم خِدا زناکارون و بی عفتون داوری بَکَردی.

⁵ شِمَه زِندگی پولدوستی کا دور غَم بَرَه و اَ چیی کا که اِستِرونَه قانع بِبییَه، چوم خِدا واتَشه: «هَرگز تِه وِل آنِکَرِم، و تِه تَنخا نییَرزِم.»

⁶ بَس اَمَه نی بَشایمون اِطمینانی نَه بوآجَم: «خِداوند چِمِن یاورَه، نِتَرسِم. آدَمی مِنَه چِه بَشای بِکَرِه؟»

⁷ شِمَه رهبرون ویر بواَرَه، اَوِن که خِدا کلامی شِمَه را واتَشونَه. چَوون زندگی رَوِشی عاقِبتی دَیِسَه و چَوون ایمانی کا سَرمشق بِگِرَه.

⁸ عیسایِ مسیح زیر و اوری و تا اَبَد هَ یَه.

⁹ جور بَه جور و عَجیبَه تعلیمون نَه راه کا بَمَرشَه؛ چوم اِم چاکَه که اِنسانی دیل، فیضی کا قوّت بِگِرِه، نِه اَ غذا اونی کا که کسونی را که چَوون دومله بَشین هیچ مَنفعی نیشَه.

¹⁰ اَمَه ایلَه قِربونگایی هِستِمونَه که اَ خیمَه خادِمِن حق نیشونَه اَیی کایَه بَرِن.

¹¹ کاهن اَعظم، حَیوونون خونی قربونی گناه را بَبَردی قُدس‌ الاقداسی دیلَه، امّا چَوون لاشَه‌ اِن اُردوگاه بِرونی کا سوتَه بَبین.

¹² هَتَه نی، عیسی نی شهری بَرنگاه بِرونی کا عذاب کَشِشَه تا اِشتَن خونی واسطه نَه، مردمی تَقدیس بِکَرِه.

¹³ بَس بایَه اَمَه نی اِم اُردوگاه کا بَرشَم بِرون و بِشَم چَیی وَر و چَیی نَنگ و خواری دیلَه کا شریک بِبییَم.

¹⁴ چوم اَمَه اییا کا شَهری نیمونَه که بِجا بومونِه، بَلکَم ذوق و شوقی نَه اَ شهری چِم بِرا ایمونَه که بومَی.

¹⁵ بَس بایَه عیسی واسطه نَه همیشه قِربونی شُکرگزاری تَقدیم بِه خِدا بِکَرَم. اِم قِربونی، هَ لِوون ثمرۀ ای یَه که چَیی نومی اِعتراف بَکَردین.

¹⁶ چاکی کَردِه کا و خَلکی شَریک کَردِه کا اَ چیونی کا که هِستِرونَه غِفلت مَکَرَه، چوم خِدا اِنتَه رَه قربونیون کا راضی یَه.

¹⁷ شِمَه رهبرون کا اِطاعَت بِکَرَه و چَوون تسلیم بِبییَه؛ چوم اَوِن شِمَه جانون کا محافظت بَکَردین و بَسی حِساب پَس آدَن. بِدارَه اِشتَن کاری شادی نَه بِکَرِن نِه آه و ناله نَه، چوم شِمَه نفع نییَه.

¹⁸ اَمَه را دعا بِکَرَه، چوم مطمئنیمونَه که چَمَه وجدان پاکَه و پیستِمونَه هَر لحاظی کا سَربلند بِبییَم.

¹⁹ شِمَه کا پیستِمَه وِر دعا بِکَرَه تا هَر چِه زودتر آگَردِم شِمَه وَر.

²⁰ حِسَه که خِدای صُلح و سلامتی اَ اَبَدی یَه خونی عهدی واسطه نَه، چَمَه خِداوند عیسی مَردَه اون دیلَه کا زِنده آکَردِشه، یعنی گوسَندون یالَ شوونَه،

²¹ هَ خِدا شِمَه هَر چاکَه چیی نَه مجهز بِکَرِه تا چَیی اِراده اَنجام بِدییَه. تا اَ چیی نَه که خِدا راضی آکَرِه، عیسایِ مسیح واسطه نَه چَمَه دیلَه کا بِه کار بِگِرِه، هَ عیسایِ مسیح که تا اَبَد و تا اَبَد جلال اَیی نَه بِبو. آمین.

²² اِی بِرااِن، شِمَه کا پیستِمَه چِمِن گفی که پند و نصیحتَه تاو بواَرَه، چوم شِمَه را خُلاصه نیویشتَمَه.

²³ بِزونَه که چَمَه بِرا تیموتائوس آزاد آبییَه. اَگم اَ، زو با، اَیی نَه بومَیم و شِمَه بَویندیم.

²⁴ شِمَه گِردِ رهبرون و گِردِ مقدّسون را سلام آرِساوونَه. کسونی که ایتالیا کا مَندینه، شِمَه را سلام آرِساوونِن.

²⁵ فیض شِمَه گِردی نَه بِبو.