نامَه، عِبرانیه نَتاجَه مسیحیونرا 1 - کتاب مقدس به زبان تالشی شمالیخِدا زوعَه، ملائیکه اون کا کَفاتَر 1 قدیمون، خِدا چِندی کَرَه جور بَه جوره راه اون نَه، پِیغمبَرون واسطه نَه چَمَه دَده اون نَه گف ژَندِشَه، 2 امّا اِم آخِرَه روزون کا اَ اِشتَن زوعَه واسطه نَه، اَمَه نَه گَف ژَندِشَه، هَ زوعَه ایی که اَیی ایلَه وارثی شیوار گِردِ چیون کا تَعیین کَردِشه و چَیی واسطه نَه جهانی خَلق کَردِشَه. 3 اَ، خِدا جَلالی نورَه و چَیی ذاتی تمام کمالَ نَخشَه، و اَ گِردِ چیون اِشتَن کلامی قوتی نَه پابَرجا غَم بَردی. اَ، گناه اون پاک آکَردِه بِه دومله، اَ کسی راستَ دَسی کا که با عظمتَه و عَرش بَرینی دیلَه کا، نِشتَه. 4 هَ اندازه که ملائیکه اون کا سَرتَرَه، اَ نومی نی که بِه اِرث بَردَشه چَوون نومی کا کَفاتَرَه. 5 چوم خِدا کَمیله ملائیکه اون نَه واتَشه: «تِه چِمِن زوعَه ایش؛ اوری، اَز تِه مولود کَردَمه»؟ و یا: «اَز اَیی را دَده بَبیم، و اَ بَه مِرا زوعَه بَبی»؟ 6 و هَنی اَ موقعی که اَ، اوّلین خِردَنی بواَردی اِم جَهانی دیلَه، بَواتی: «خِدا ملائیکه اِن گِرد، اَیی پرستش بِکَرِن.» 7 ملائیکَه اون درباره بَواتی: « اَ، اِشتَن ملائیکه اون، وا اون شیوار، و اِشتَن نوکَرون آتشی شعله اون شیوار وَج آکَرِه.» 8 امّا زوعَه درباره بَواتی: «اِی خِدا، اِشتِه سلطنتی تخت، اَبَدی یَه؛ اِشتِه پاُتشایی عصا، عدالتی عصایَه. 9 تِه صالِح بییِه نَه خِشیش و شِرارتی کا بیزاریش؛ اِمی واسی خِدا، اِشتِه خدا، تِه اِشتِه همراه اون کا وِرتَر، شادی روعَنی نَه مَسح کَردَشه.» 10 و: «تِه، اِی خِداوند، صِفتَه نَه زَمینی پاکاری نورَه، و آسمونِن اِشتِه دَسی کاری نَه. 11 اَوِن از بِین بَشین، امّا تِه پابَرجا بَمَندیش! اَوِن گِرد خَلا شیوار، کَنَه بَبین! 12 اَوون ایلَه اَبایی شیوار دَپیچی، و ایلَه خَلایی شیوار عوض دَکَش بَبین. امّا تِه هَ اِستیش، و اِشتِه سالِن تمون آنِبون.» 13 تا حِسَه خِدا کَمیله ملائیکه اون نَه واتَشه: «چِمِن راستَ دَسی کا بِنِش تا اَ موقع که اِشتِه دِشمَنون اِشتِه پا جیری کا دَرَفَنِم.» 14 مَگم اَوِن گِرد روحونی نینَه که خِدمت بَکَردین و اَ کسونی خدمتی را ویسا آبون که نِجاتی بِه اِرث بَبَردین؟ |
@ 2024 Korpu Company