نامه غلاطیَه کلیسارا 6 - کتاب مقدس به زبان تالشی شمالی

یَندی بارون بِه دوش بِکَشَه

¹ اِی بِرااِن، اَگم کسی ایلَه خطایی بِکَرِه، شِمَه که خِدا روح هِستِرونه بَسی ملایم روح نَه اَیی راستَه راه را آگاردِنه. اِشتِه هَواس جمع بِبو که اِشتَن نی وسوسه مَبی.

² یَندی بارون بِه دوش بَکَشَه که اِنتَه مَسیح شریعتی بِه جا بواَردیرون.

³ چوم اَگم ایی نفر اِشتَن چیی بِه حساب بواَرِه که نییَه، اِشتَن گول ژَنِه.

⁴ ولی هَر کسی بَسی اِشتَن کاری آزمایش بِکَرِه. اَ موقع چَیی فَخری دلیل فقط چَیی رایَه نِه چَیی خَمسوعه را.

⁵ چوم که هَر کسی بَسی اِشتَن باری بِبَرَه.

⁶ اَ کسی که خِدا کلامی کا تعلیم بَگتی، بَسی هَر چاکَه چیی، اَ کسی نَه که اَیی تعلیم بَدای شَریک بِکَرِه.

⁷ گول مَرَه، نییَب خِدا مسخره کَردِه. چوم اِنسان هَر چیی که بِکارَه، اَیی دِرو بَکَردی.

⁸ چوم هر کسی که اِشتَن جِسمی را بَکاشتی، جِسمی کا فساد دِرو بَکَردی؛ امّا کسی که خِدا روح را بَکاشتی، خِدا روحْ کا اَبَدی یَه زِندگی دِرو بَکَردی.

⁹ پَس چاکی کَردِه کا دیلسرد مَبییَه، چوم اَگم کاری کا دَس مَپِگِرَم، مناسبَه فصلی کا دِرو بَکَردیمون.

¹⁰ بَس تا فرصت هِستِمونه گِردِ مردمی را چاکی بِکَرَم، اَلَلخصوص کَسونی را که بِه مسیح ایمان هِستِشونه.

آخِرین هُشدارِن

¹¹ دَیِسه از چِه یالَ حُروفی نَه، چِمِن دَسی نَه شِمَه را بَنیویشتیم!

¹² کَسونی که پیستِشونَه اِشتَن ظاهری چاک نیشون بِدَن، شِمَه وادار بَکَردین که خَتنَه بِبییَه، فقط اِمی را که مسیح صلیبی واسی عذاب مَکَشِن.

¹³ چوم حتی کسونی که خَتنَه بَبین نی شریعتی اَنجام نِدَن. بَلکَم پیستِشونَه شِمَه خَتنَه بِبییَه تا شِمَه جِسمی کا اِفتخار بِکَرِن.

¹⁴ امّا خِدا مَکَرِه که اَز هَرگز، چَمَه خِداوند عیسایِ مسیح صلیبی غِیراز، چیی را اِفتخار بِکَرِم، که چَیی واسطه نَه، دنیا بَه مِرا مصلوب بَه و اَز دنیا را.

¹⁵ چوم نِه خَتنَه چیی اِستَه و نِه خَتنَه‌ نِبییِه؛ اَ چی که مُهمَه تازه خِلقَتَه.

¹⁶ گِردِ کسونی را که اِم قانونی نَه رفتار بَکَردین، صُلح و سلامتی و رَحمت اَوون را و اِسرائیلِ خِدا را بِبو.

¹⁷ چِمی پَش هیچکس مِن عذاب مَدَه، چوم اَز چِمِن بَدَنی کا داغونی هِستِمَه که نیشون بَدای از عیسی نوکریمَه.

¹⁸ اِی بِرااِن، چَمَه خِداوند، عیسایِ مسیح فیض شِمَه روح نَه بِبو! آمین!