نامه غلاطیَه کلیسارا 5 - کتاب مقدس به زبان تالشی شمالیمسیح اَمَه آزاد آکَردِشَه 1 آزادی واسی بَه که مسیح اَمَه آزاد آکَردِشَه؛ بَس محکم بومونَه و هَنی اِشتَن نوکری یوغی گیریفتار مَکَرَه. 2 دَیِسَه! اَز، پولس، شِمَه نَه بَواتیم که اَگم خَتنَه بِبییَه، مسیح شِمَه را هیچ فایده ای نیشَه. 3 و از هَنی شهادتی بَدایم که هَر کسی که خَتنَه بِبو بَسی شریعتی گِردی غَم بَرِه. 4 شِمَه مسیح کا جِدا آبیرونه، شِمَه که شریعتی واسطه نه پیستِرونه صالِح بِه حساب بایَه، شِمَه فیضی کا دور آبَییرونه. 5 چوم که اَمَه خِدا روح واسطه نَه، ایمانی نَه، اَ صالِحی مُنتظریمونه که چَمَه اُمیدَه. 6 چوم مسیحْ عیسی کا نِه خَتنه بییِه مُهمَه نِه خَتنه نِبییِه، بَلکَم مُهم اَ ایمانی یَه که محبتی واسطه نَه کار بَکَردی. 7 چاک کارا ویریتیرون. کی شِمَه پیشی گِتِشَه تا حقیقتی کا اِطاعت مَکَرَه؟ 8 اِم که شِمَه اِنتَه قانع بَییرونه، اَ کسی کا نییَه که شِمَه دَعوت کَردَشَه. 9 «روکَتِه خَمیره مایَه، خمیری گِردی وَر بواَردی.» 10 از خِداوندی کا شِمَه کا اِطمینان دارِم که شِمَه ایلَه دییَر نظری قبول نِکَرَه؛ و اَ کسی که شِمَه پریشون بَکَردی، هَر کسی که بِبو، اِشتَن اَعمالی جَزا آرَستِه. 11 ولی اِی بِرااِن، اَگم اَز حَلا خَتنَه کَردِه موعظه بَکَردیم، چیرا دِ اَذیت آزار بَویندیم؟ بَس اَگم اَتَه بَکَردیم دِ صلیبی پیغوم بِه کسی بَر نییَری. 12 کَشکی کسونی که شِمَه پریشون بَکَردین، اِشتَن اَختَه بِکَرین! 13 چوم که اِی بِرااِن، شِمَه آزادی را دَعوت بَییرونه. فقط شِمَه اِم آزادی، ایلَه فرصَتی شیوار جِسمی را اِستفاده مَکَرَه، بَلکَم مُحبتی نَه، یَندی خدمَت بِکَرَه. 14 چوم که گِردِ شریعت ایلَه حُکمی کا خلاصه بَبی که: «اِشتِه خَمسوعَه نَه اِشتِه جانی شیوار خِش بِبَش.» 15 ولی اَگم یَندی بِگَزَه و ویبَره، ویرا بِبییَه که یَندی دَسی نَه اَز بین مَشَه. زندگی خِدا روح نَه 16 امّا از بَواتیم خِدا روح نَه رَفتار بِکَرَه که جِسمی پیستَه اون بِه جا نِورَه. 17 چوم که جِسمی پیستَه اِن خِدا روح ضِدی نَه و خِدا روح پیستَه اِن جِسمی ضِد، چون اِم دِ گِله یَندی ضِدی نَه، اِنتَه دِ نیمَشایَه هَر چِه که پیستِرونه، اَنجام بِدییَه. 18 امّا اَگم خِدا روح کا هدایت بِبییَه، شِمَه دِ شریعتی جیری کا نیرونه. 19 حِسَه جِسمی اَعمالِن معلومَی نه: بی‌عفتی، ناپاکی، و هَرزَگی؛ 20 بُت‌پرستی و جادوگری؛ دِشمَنی، جنگ دعوا، حَسودی، خَشم؛ وِرَه پیستِه، تَفرقه، دَسته دَسته کَردِه، 21 حَسودی؛ سَرخوشی، عیاشی و چِمون شیوارَه چیی. شِمَه هُشدار بَدایم، که پیشتری شِمَه هُشدار دوعَم بَه، کسونی که اِنتَه رَه کارون بَکَردین خِدا پاُتشایی وارث نِبون. 22 امّا خِدا روح ثَمره، محبت، شادی، صُلح و سلامتی، صَبر، میهرَوونی، چاکی، وفاداری، 23 ملایمت و نَفسی پیشی گِتِه یَه. هیچ شریعتی چِمون ضِد نییَه. 24 کسونی که مسیحْ عیسی شِنی نَه، جِسمی چَیی هوا هَوَسون نَه و چَیی پیستَه اون نَه مصلوب کَردَشونه. 25 اَگم خِدا روح نَه زِندگی بَکَردیمون، خِدا روح نَه نی رَفتار بِکَرَم. 26 بیخودی مغرور مَبییَم تا یَندی خشمگین بِکَرَم و یَندی نَه حَسودی مَکَرَم. |
@ 2024 Korpu Company