نامه غلاطیَه کلیسارا 4 - کتاب مقدس به زبان تالشی شمالیزوعه اِن و وارِثِن 1 چِمِن گَف اِمَه: تا وختی که وارِث خِردَنَه، هَر چَند گِردِ چیون صاحِب بِبو، نوکَری نَه هیچ فرقی نیشَه. 2 و تا اَ وختی که چَیی دَده مُعیَن کَردَشه اِشتَن سرپرستون و وکیل وَصیون دَسَه جیرَه. 3 چَمَه درباره نی اِنتَه یَه: تا وختی که خِردَن بیمونه، اِم دنیا قانونون نوکر بیمونه. 4 امّا هِنتَه که اَ مُعیَن بییَه وخت تمام کمال آرَستَه، خِدا اِشتَن زوعَه ویسا آکَردِشه که ایلَه ژِنی کا دنیا اومَه و شریعتی جیری کا دنیا اومَه، 5 تا کسونی که شریعتی جیری کا بینَه، آزاد آکَرِه، و اِنتَه اَمَه زوعَه اون مقامی کا، فرزند خوندگی حَق چَمَه نصیب بِبو. 6 بَس چوم که شِمَه خِردَنونی رونَه، خِدا اِشتَن زوعَه روح چَمَه دیلون دیلَه کا نوشَه که خِلِع بَکَردی: «اَبّا! دَده!» 7 بَس تِه دِ نوکَر نیشَه، بَلکَم زوعَه ایش؛ و اَگم زوعَه ایش، خِدا تِه وارِث کَردَشه. پولسی نگرانی غلاطیانی را 8 چِمی بَه پیش، اَ وختی که خِدا آنِزونیرون، چیونی نوکر بیرونَه، که حقیقتَن خِدا اون نینَه. 9 امّا حِسَه که خِدا آزونَه، یا چاکتَر بوآجِم، خِدا شِمَه آزونِه، چِنتَه یَه که هَنی آگَردَه اِم دنیا سُست و بی اِرزشَ قانونون طرفی را؟ یعنی پیستِرونه اَز نو چَوون نوکری بِکَرَه؟ 10 روزون و مانگون و فَصلون و سالون غَم بَردیرون! 11 تَرسِم که مَکَرِه زَحمتونی که شِمَه را کَشَمَه هَدَر شَه بِبو. 12 اِی بِرااِن، شِمَه کا خواهیشت بَکَردیم که چِمِن شیوار بِبییَه، چوم اَز نی شِمَه شیوار بَییمه. شِمَه چِمِن حَقی کا هیچ بَدی کَردَه نیرونه. 13 هَتَه که بَزنیرون، اَ ناخوشی واسی که چِمِن بَدَنی کا بَه، اِنجیلی پیغومی اوّل شِمَه را موعظه کَردِمَه. 14 امّا هَر چَن چِمِن وضع و اوضاع، شِمَه را ایلَه آزمایشی بَه، امّا مِن بی حُرمت یا روک نِکَردِرونه. بَلکَم مِن خِدا ملائیکه شیوار قبول کَردِرونه اِنگاری که مسیح عیسی قبول کَردِرونه. 15 بَس شِمَه اَ ذوق و شوق چِه بَه؟ چوم بَشایم شهادتی بِدَم که اَگم بَشایرون، حتی شِمَه چِمون بَروَریرون و بَه مِن آدَییرون. 16 بَس حِسَه، چوم از حقیقتی شِمَه نَه بَواتیم شِمَه دِشمَن بیمَه؟ 17 اَوِن شِمَه را غیرت هِستِشونه، امّا نِه چاکَه نیّتی نَه. اَوِن پیستِشونَه شِمَه جِدا آکَرِن تا چَوون را غیرت بِدارَه. 18 غیرت داشتِه چاکَه، بِه شرطی که چاکَه نیّتی نَه بِبو و همیشَگی، نِه فَقط وختی که اَز شِمَه نَه ایمَه. 19 چِمِن عزیزَه خِردَنِن، کِه شِمَه را هَنی زَندِه داجی شیوار هِستِمَه تا اَ وختی که مسیح شِمَه دیلَه کا شکل بِگِرِه، 20 کَشکی حِسَه از شِمَه وَری کا بِبیم تا ایی جور دییَر گف بِژَنِم، چوم شِمَه درباره مات و مبهوتیمَه. هاجر و سارا 21 شِمَه که پیستِرونه شریعتی جیری کا بِبییَه، مِنه بوآجَه بیوینِم، مَگم اَ چیی که شریعت بَواتی گوش نِکَرَه؟ 22 چوم توراتی کیتابی کا نیویشتَه بییَه که اِبراهیم دِ گِله زوعَه ش اِستبَه، ایلَه خاتَکی کا و اَ ایلَه آزادَه ژِنی کا. 23 ولی خاتَکی زوعَه طبق جسم دنیا اومَه؛ با اِمکه آزادَه ژِنی زوعَه طبق وعدَه دنیا اومِه. 24 اِمی بَبی ایلَه مَثَّلی شیوار بوآجَم: اِم دِ گِله ژِن، دِ گله عهدی نه. ایلَه سینا کوه کا، که خِردَنونی نوکری را دنیا بواَردی: اَ ژِن هاجَرَه. 25 حِسَه هاجَر سینا کوه یَه، عربی دیاری کا، و اورشلیمی شهری نَه که حِسَه اِستَه برابری بَکَردی، چوم اِشتَن خِردَنون نَه نوکری دیلَه کایَه. 26 امّا کَفایی نَه اورشلیم آزادَه، که چَمَه گِردی نَنه یَه. 27 چیرا که اِشعَیای پِیغمبری کیتابی کا نیویشتَه بییَه که: «اِی نازایی که زَندَه نیرَه، شادی بِکَه! اِی که زَندِه داجی کَشَه نیرَه، شادی یَه وانگ بِژَن و بِلَندَه خِلِع بِکَه! چوم بی کَسَه ژِنَکی خِردَنِن شو دارَه ژِنکی خِردَنون کا وِرتَر بَبین.» 28 امّا شِمَه اِی بِرااِن، اِسحاقی شیوار وعده خِردَنیرونه. 29 امّا هَتَه که اَ وختی کا، زوعَه ایی که طبق جسم دنیا اومَه بَه، اَیی که طبق خِدا روح دنیا اومَه بَه، اَذیت آزار بَکَردی. حِسَه نی هَتَه یَه. 30 امّا تورات چِه بَواتی؟ «خاتَک و چَیی زوعَه بَرکَه بِرون، چوم خاتَکی زوعَه، آزاده ژِنی زوعَه شیوار اِرث نِبَرِه.» 31 بَس اِی بِرااِن، اَمَه خاتَکی خِردَنِن نیمونَه، بَلکَم اَ آزاده ژِنکی کا ایمونَه. |
@ 2024 Korpu Company