نامه غلاطیَه کلیسارا 3 - کتاب مقدس به زبان تالشی شمالیصالِح بییِه ایمانی نَه 1 اِی نادونَه غَلاطیِین، کی شِمَه جادو کَردَشه؟ عیسایِ مسیح مَرگ هِندی شِمَه را آشکارا واتَه بَه که اِنگاری اَ شِمَه چِمون پیشی کا مصلوب بَه. 2 فقط پیستِمَه اِمی بِزونِم: مَگم شریعتی اَعمالی اَنجام دوعِه نَه، خِدا روح ویگِتِرونه یا ایمان بِه اَ چیی نَه که دَرَسِرونه؟ 3 یعنی هِندی نادونیرونه؟ شِمَه که روح نَه شروع کَردِرونه و حِسَه پیستِرونه جِسمی نَه کامل آبییَه؟ 4 یعنی گِردِ اِم سختیون بیخودی تاو وَردِرونه؟ مَگم اِم که راس راسی بیخودی زحمت کَشَرون بِبو! 5 اَیی که خِدا روح آدَه شِمَه، و شِمَه دیلَه کا معجزه بَکَردی، اِم کاری شریعتی اَعمالی نه بَکَردی یا ایمان بِه اَ چیی نه که دَرَسَرونه؟ 6 هَتَه که اِبراهیم پِیغمبر: «بِه خِدا ایمان وَردِشه و اِم اَییرا صالحی حساب بَه.» 7 بَس بَویندیرون کَسونی اِبراهیمی خِردَنی نَه که ایمان هِستِشونَه. 8 و مقدّس نیویشته پیشتری ویندِشَه که خِدا غیریهودیون ایمانی نَه صالح حساب بواَردی، اِمی واسی، نارنارِه خوشَ خَوَری اِبراهیمی را اِعلام کَردِشه و واتِشه: «گِردِ قومِن اِشتِه واسطه نَه بَرَکت بَگتین.» 9 بَس کسونی که ایمانی تَکیه بَداین، اِبراهیمی نَه، اَ مِردِه ایمانی نَه، بَرَکت بَگتین. صالحِن ایمانی نَه زندگی بَکَردین 10 چوم کسونی که پیستِشونَه شریعتی اَعمالی اَنجام بِدَن، گِرد لَعنتی جیری کایینه، چیرا که توراتی کیتابی کا نیویشتَه بییَه: «لعنت بِه هَر کسی که شریعتی کیتابی نیویشتَه اون گِردی پایبند مَبو و اَوون اَنجام مَدَه.» 11 حِسَه مَعلومَه که هیچکس شریعتی واسطه نَه خِدا وَری کا صالح حساب نییَب، چوم «صالحَ آدَم ایمانی نَه زِندگی بَکَردی.» 12 امّا شریعت ایمانی کا نییَه، بَلکَم «کسی که اِمون اَنجام بَدای چَوون دیلَه کا زِندگی بَکَردی.» 13 چَمَه عَوض مَسیح لعنت بَه و اِنتَه اَمَه شریعتی لعنتی جیری کا آزاد آکَردِشه، چوم توراتی کا نیویشتَه بییَه که: «هَر کسی که دار ژَندَه بِبو مَلعونَه.» 14 اَ، اِنتَه کَردِشه تا اِبراهیم پِیغمبری بَرکت، مسیحْ عیسی کا غیریهودیون نصیب بِبو، و تا اَمَه، اَ روحی که وعده دوعَه بَه، ایمانی راه نَه ویگِرَم. شریعت و خِداوندی وَعده 15 اِی بِرااِن، بِدارَه روزونَه زِندگی کا ایلَه مثَّلی بواَرِم. هیچکس نیمَشا ایلَه عهدی که آدَم رسمی کَردَش بِبو، باطل آکَرِه یا چیی بَیی اضافه آکَرِه. 16 حِسَه، وعده اِن بِه ابراهیم و چَیی نَسلی آدوعَه بییَه. نِواجِه «و بِه نَسلون،» اِنگاری که وِر کَسون درباره بِبو، بَلکَم بَواتی «اِشتِه نَسلی،» که منظور مسیحَ. 17 چِمِن گَف اِمَه: شریعتی که چهارصد و سی سالی پَش اومَه، عهدی که خِدا پیشتری دَوَستَش بَه باطل آنِکَری، جوری که وعده هیچ آبو. 18 چوم اَگم اِرث شریعتی کا بِبو، دِ وعده کا نییَه؛ امّا خِدا اَیی وعده راه نَه آدوشَه اِبراهیمی. 19 بَس منظور شریعتی کا چِه بَه؟ شریعت تقصیرون واسی اِضافه آبَه، اَ نی فقط تا وختی که اَ ’نَسلی‘ که اَ وعده اَیی اِشاره بَکَردی با. شریعت ملائیکه اون واسطه نَه و ایلَه واسطه گری دَسی نَه برقرار بَه. 20 حِسَه، هیچ واسطه گری، فقط ایی طرفی نمایندۀ نییَه، ولی خِدا ایلَه یَه. 21 بَس یعنی شریعت خِدا وعده اون ضِدَه؟ اَصلاً! چوم اَگم شریعتی آدوعَه بییَه بَه که بَشای زِندگی بِبَخشِه، بَس راس راسی صالِحی نی شریعتی راه نَه بِه دَس بومَی. 22 امّا مقدّس نیوشته اِن اِعلام کَردِشه که گِرد گناه دیلَه کا اَسیری نه، تا اَ وعده که ایمان بِه عیسایِ مسیح راه نَه یَه، کسونی آدوعَه بِبو که ایمان وَردَشونه. 23 اَمَه پیش از اِم که ایمان با، شریعتی تَسلطی جیری کا اَسیر بیمونه و تا ایمانی آشکار آبییِه موقع، زندانی دیلَه کا بیمونه. 24 بَس تا وختی که مَسیح با شریعت چَمَه سرپرست بَه و ایمانی نَه صالِح حساب بیمونه. 25 امّا حِسَه که ایمان اومَه، اَمَه دِ اَ سرپرستی دَسی جیری کا نیمونه. 26 چوم که مسیحْ عیسی کا، شِمَه گِرد، ایمانی واسطه نَه، خِدا زوعَه اِن اِستیرونه. 27 چیرا که شِمَه گِرد که مسیح کا تعمید گِتَرونه، مسیح شِمَه بَدنی کا دَکَردَرونه. 28 دِ نِه یَهودی مَعنی هِستِشه نِه یونانی، نِه نوکَر نِه آزاد، نِه مِرد نِه ژِن، چوم شِمَه گِرد مسیحْ عیسی کا ایلَه ایرونه. 29 و اَگم شِمَه مسیح شِنی رونَه، بَس اِبراهیم پِیغمبری نَسلی رونَه و طبق وعده، وارثون نی اِستیرونَه. |
@ 2024 Korpu Company