نامه غلاطیَه کلیسارا 2 - کتاب مقدس به زبان تالشی شمالی

اورشلیمی شورا

¹ چاردَه سالی پَش، هَنی بَرنابا نَه شیمَه اورشلیمی شهری را و تیتوسی نی اِشتَن نَه بَردِمه.

² از ایلَه مکاشفه واسی بَه که شیمَه. و اِنجیلی که غیریهودیون دیلَه کا موعظه بَکَردیم اَوون نه در میون نومَه؛ البته خَلوَتَکی، و فقط کسونی را واتِمَه که چِمِن نظر با نفوذ بینَه، چوم نگران بیمَه که نَبادا بیخودی بیوریجِم.

³ امّا حتی تیتوس نی که مِنَه بَه، با اِم که یونانی بَه، اَیی مَجبور نِکَردِشونه که خَتنه بِبو.

⁴ اِم نگرانی اَ دوروعَه بِرااونی واسی بَه که نِینَکی چَمَه دیلَه کا رَخنَه کَردِشونه تا اَ آزادی که مسیحْ عیسی کا هِستِمونه جاسوسی بِکَرِن و اَمَه بِبَرِن بَردِگی را.

⁵ ولی اَمَه ایی لحظه نی چَوون تسلیم نِبیمونه تا اِنجیلی حقیقت تمام کمال شِمَه را محفوظ بومونِه.

⁶ امّا کسونی که بِه نظر با نفوذ بومَین- هَر کسی که بینَه فرقی نِکَرِه، چوم خِدا بیخودی کسی کا طرفداری نِکَرِه، اَوِن چیی بَه مِرا اِضافی نِکَردِشونه،

⁷ بَلکَم بَر عکس، اَوِن زونِستشونَه که اِنجیلی خوشَ خَوری اِعلام کَردِه، غیریهودیون را بَه مِن دَسپاردَه بییَه بَه، هَتَه که اِنجیلی خوشَ خَوری اِعلام کَردِه یهودیون را دسپاردَه بییَه بَه پِطرسی.

⁸ چوم اَ که پطرسی واسطه نَه کار کَردِشه که یهودیون رسول بِبو، بَه مِن کا نی کار کَردِشه تا غیریهودیون رسول بِبوم.

⁹ بَس یعقوب و پطرس و یوحنا که به نظر بومَی کلیسا سُتون بینَه، اَ فیضی که چِمِن نَصیب بییَه بَه، ویندِشونَه، و مِن و بَرنابا نَه دَس رفاقت آدوشونه تا اَمَه بِشَم غیریهودیون وَر و اَوِن بِشون یَهودیون وَر.

¹⁰ اَوِن اَمَه کا فقط پیستِشونَه که فَقیرون فیکری کا نی بِبییَم، هَ کاری که اَز اِشتَن نی چَیی مُشتاق بیمَه.

پولسی مخالفت پطرسی نَه

¹¹ امّا هِنتَه که پطرس اومَه اَنطاکیه، چَیی پیشی کا مَندیمونه، چوم چَیی حَق بَه.

¹² چوم پیش از اِم که کسونی که یعقوب ویسا آکَردَش بَه بان، غیریهودیون نَه همسفرَه بییَه بَه، امّا هِنتَه که اَوِن اومینَه، یهودیون تَرسی کا اِشتَن کَنار کَشِشَه و اِشتَن جدا آکَردِشَه.

¹³ بَقیَه یَهودییِن نی اِم دِ دیمی کا اَیی نَه هَمپا بینَه، جوری که حتی بَرنابا نی چَوون اِم دِ دیمی نَه راه کا بَرشَه.

¹⁴ ولی از هِنتَه که ویندِمَه اَوِن اِنجیلی حقیقتی راستی کا قدم نِنَن، گِردی پیشی کا کیفا نَه واتِمه: «اَگم تِه، که یَهودییش، غیریهودیون شیوار زِندگی بَکَردیش نِه یَهودیون شیوار، چِنتَه یَه که غیریهودیون وادار بَکَردیش که یَهودیون شیوار زندگی بِکَرِن؟»

¹⁵ اَمَه یَهودی‌ زادَه‌ ایمونه و نِه ’گناه کارَه غیریهودی‘،

¹⁶ اَمَه بَزنیمون که هیچکس شریعتی اَعمالی نَه صالِح نییَب، بَلکَم ایمان بِه عیسایِ مسیح واسطه نَه صالح بَبی. بَس اَمَه اِشتَن نی بِه مسیحْ عیسی ایمان وَردِمونه تا ایمان بِه مسیح نَه صالح بِبییَم و نِه شریعتی اَعمالی نَه، چوم که هیچ آدَمی شریعتی اَعمالی نَه صالح نییَب.

¹⁷ امّا اَگم چِمی دومله ایمونه که مسیح کا صالِح حساب بِبییَم، معلوم بِبو که گناه کاریمونه، یعنی مسیح، گناه نوکرَه؟ اَصلا!

¹⁸ چوم اَگم اَ چیی که اِشتَن خَراو آکَردَمه اَز نو وَج آکَرِم، نیشون بَدایم که خطا کاریمَه.

¹⁹ چوم اَز شریعتی واسطه نَه، نسبت بِه شریعت مَردیمَه تا خِدا را زِندگی بِکَرِم.

²⁰ از مسیح نَه صلیبی سَری کا مصلوب بیمَه، و اِم دِ از نیمَه که زِندگی بَکَردیم، بَلکَم مسیح اِستَه که چِمِن دیلَه کا زندگی بَکَردی؛ و اِم زِندگی که حِسَه جِسمی کا بَکَردیم، خِدا زوعَه ایمانی نه یَه که مِنَه خِش بَه و اِشتَن جانی چِمن واسی فیدا کَردِشه.

²¹ از خِدا فیضی باطل آنِکَرِم، چوم که اَگم شریعتی واسطه نَه بَشایمون صالح بِبیمون، بَس مسیح دِ بیخودی مَردَه.